【Kongner投稿天地】
葉仔：批評使人進步 敬請正視批評
近來「被熱狗」界KOL伍公子《兄弟爬山，各自努力》一片引起廣泛討論。當中有一句令我印象十分深刻，就係「呢個社會有批評先會進步。」點解係咁？在此我就講出我個人嘅見解。
我認為人要去接受批評係為咗防止跌入一個惡性循環。首先批評係一種評論，係嘗試指出事物嘅缺點。如果評論無誤，即有缺點嘅存在，你唔理佢，缺點係唔會好似感情的傷患可以隨時間而消失。缺點存在一日不除，就會卡住咗進步嘅齒輪，更有可能不進則退，由一個問題衍生出更多問題。以現今香港政府為例，制度不行，引致部份行政機關權力過高，令民眾反抗，反抗之下行政機關繼續以權施暴，又令更多民眾反抗。兩者不停循環。正符合惡性循環詞解：惡因生惡果，惡果成惡因。兩者不停循環，令事情日益惡化。我學習上嘅恩師同我講過一句我好深刻嘅說話：「進步就係一路做，一路錯，一路改，無限循環。」錯其實根本就係進步嘅其中一環，最重要嘅係要改，而接受批評其實就係幫助人們一路改。
可能又有人問：「我做得好，點解要改？」我就會答：「做得好，就不能更好嗎？」進步空間唔會完全係無嘅，因為世界係無完美嘅事物。我唔敢講自己係絕對正確，相信大家都唔會敢講，所以希望大家可以不停進步，唔好跌入惡性循環嘅陷阱當中。而此事就又延伸到香港嘅政治人物上面，擁有最多數民意嘅泛民主派身上喇！就好似梁家傑去外國話：「法治未死，吊緊鹽水。」在此我想引用米迦嘅說法：「法律係人民嘅保障，殘而不廢嘅法律就好似一個穿咗嘅安全套咁，你覺得咁樣安唔安全？」米迦嘅說法十分之具體，我相信大家都明白，但係事實上，當現實之中有人出嚟批評梁家傑講呢樣野嘅時候，就一大群人認為批評者係分化，標籤佢係熱狗，認為佢不是同路人，否定佢一切說法，咁就真係割席喇。然後講到爭取減輕暴動罪嘅刑期，問題係呢樣嘢又同五大訴求有何關係呢？引用我上面嘅說法，錯唔係一個問題，但係錯而不改呢？如果想有進步，正視批評唔係好應該嘅咩？
最後，我對逢大時大節出外行個大運又有拍「鬼片」影「猛鬼照」嘅朋友都有啲批評，原因就係如果我係對手陣營，我就一定會睇你哋拍低嘅片段。放上網前，睇一睇，思前想後，希望同路人明白。最後，我謹望大家可以一齊共同進步，攜手 Make Hong Kong great again！
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
HappyKongner 招稿喇！！！
我哋嚟緊會喺逢星期一、五加設 【Kongner投稿天地】 ，俾廣大Kongner 弟兄姊妹能夠有發表佢哋意見嘅地方，亦都可以鼓勵大家多啲運用自己嘅闡述能力。
有興趣嘅朋友歡迎直接Facebook Send Message 俾我哋，又或者Email 去 happykongner@gmail.com 同我哋傾都得。
期待收到大家嘅鴻文大作！
納稿標準：合乎邏輯，文句通順，言之成理即可，不過編輯部同事比較嚴謹，大家自己小心。
