莊思明千字文狂呻遭空服無視，兼公開機組人員名單！是咁的，話說佢琴日搭國泰 econ 去泰國，期間想問空中服務員借枝筆填入境表，佢話禁咗兩次燈都無人理佢，到第三次，莊思明莊吓後面，佢描述：「原來有個空姐係我後面熄咗我盞燈然係就擰轉面行開咗！佢係完全冇問過我有咩需要就行開咗！」
佢決定禁第四次：「終於有個女仔急急腳走嚟，然後好有禮貎問我有咩需要，跟住我就問佢借咗支筆填表。」借完筆，仲未完㗎！莊思明禁第五次燈，決定同 senior 空服「反映事件」，於是對方同佢道歉…… 未完！莊思明將經歷打成千字文放上 ig，仲 tag 埋國泰 official page，話：「如果國泰嘅高層想了解更多關於這次事件嘅詳情，我絕對歡迎你哋同我聯絡！ 」
除咗咁，莊思明仲喺唔知咩途徑拎到佢當日嗰班機嘅全機組人員名單，無遮掩下放咗上 ig story，留言話：「嗰個服務態度有問題嘅女空中服務員就… 國泰你地自己處理啦。」之後莊思明刪咗呢個 story，但堅持問咗律師指無犯法：「我並無犯法因為我沒有公開個人資料例如身份證、電話、住址等等！」
貼晒成個 crew list 出嚟，各路網民都鬧爆佢咁做好有問題，今日國泰航空公司空中服務員工會更發表聲明，指：「對近日公司機組人員執勤名單被公開至社交平台表示高度關注。此舉涉嫌觸犯個人私隱條例。現促請公司管理層徹查是次事件，並加強保障員工個人資料的措施。工會會繼續跟進事件，亦請受影響會員聯絡我們，以便我們提供協助。」執勤名單係內部文件，咁樣傳出嚟，容乜易乘客資料都會比人咁傳出嚟㗎！？希望國泰快啲跟進吓私隱問題。
