【創業隨想】 創業有冇需要講粗口？ 呢個唔係笑話，而係一個嚴肅嘅問題
我發覺其實喺有啲情況之下，創業係有需要講粗口嘅。因為當你創業，你就冇一層又一層嘅下屬去保護你。好多嘢都需要自己親自出馬打頭陣，你遇到嘅可能係斯文人，亦都可能會遇到粗鄙嘅人。而粗鄙嘅人，基於自己嘅無知，好多時會覺得你係斯文人就係好恰，搵你笨拙
點樣handle唔同嘅人，絕對係一種高深嘅技巧。今日就同大家分享點樣handle一啲粗鄙嘅人先
先利申：
我冇講粗口已經好一段日子，因為我而家接觸嘅絕大多數都係斯文人，但對於講粗口，亦有相當嘅實戰經驗。而喺我冇講粗口嘅日子，我發覺我畀唔識我嘅人搵笨拙嘅機會的而且確係高咗嘅。我唔怕嗌交，只不過與其用精力時間去嗌交，倒不如慳番啖氣，諗下點樣去發展自己嘅事業
另一個要寫呢篇文章嘅原因係，我發覺近年香港男女老幼講粗口嘅比例真係多咗好多，但係大部分講粗口嘅人士都係為講而講，聽落特別難聽
＊入門級粗口＊
我喺街上面聽到大部分人，特別係入世未深嘅人，講嘅粗口都只不過係入門級粗口。掌握唔到粗口嘅神韻，唔能夠配合語境，就好似食薯條點豉油咁樣，一啲都唔夾
入門級嘅粗口有好多，例子如下：
「我好L攰」、「呢件衫好L貴」、「__你老母，咁on9嘅事你都會做嘅？!」
入門級粗口嘅特色就係，完全唔能夠用聲調、表情或者身體動作，將語境同埋粗口字融為一體，畀人嘅感覺係為講而講，甚至乎係因為淆底先至講
情況就好似一隻細小嘅生物受到威脅或者感到驚慌嘅時候， ，會豎起自己嘅毛，令自己顯得大隻啲一樣。實質上嘅戰鬥力並冇提升到
*進階級粗口*
當你喺社會打滾一段日子，接觸過唔同類別嘅人，遣詞用語掌握得到嘅時候，運用粗口可以對於另一啲都鍾意講粗口嘅人加強感染力
例子一（要求供貨商換貨）：
如果你買咗一件貨，覺得件貨有瑕疵，並且懷疑件貨仲有一啲你發覺唔到嘅瑕疵的話，你可以揸住件貨，氣定神閑，用教誨嘅語氣，同供貨商講：
「你係L唔係呀...」
咁樣問嘅目的係提出一條open question，等供貨商知道自己蝕卓而自招
喺呢種語境同埋語氣底下，對方係會收到「坦白從寬」呢個訊息，即使有不滿亦不傷長遠關係
換轉另一個情況，呢件貨有明顯嘅缺憾，而你又把握到成件事，覺得反面亦冇損失嘅話，你就可以用冇尾音嘅說話，強調重音嘅語氣去講：
「喂！你係L唔係呀！」
當你咁樣講，對方通常都會予以否定以保護自己，例如回應：「乜L嘢係唔係呀？！」
既然對方唔招認，你就要問多一條open question，並且暗示你會將佢嘅劣行公諸於世，呢個時候你就要以扯高腔調嘅口氣同佢講：
「件貨乜 L嘢事心L照啦！你老味唔係要我爆9你響口呀？！」
要注意！ 呢一度係講「你老味」， 而唔係「__你老味」， 更加唔係「__你老母」
因為「__你老味」 帶有好強嘅人身攻擊成份，個討論隨時會變成對事不對人。Positional bargaining 不利會談，甚至引發成冇意義嘅罵戰，浪費自己嘅時間
而如果你講「__你老母」 呢？咁你就真係蝕卓嘞。因為供貨商隨時會將呢件事化成口舌之爭，從而淡化或者推卸自己對於貨品有瑕疵嘅責任。例如佢可以咁樣回應：
「而家乜嘢事呀，使唔使__老母呀？！」
雖然呢個人平時未必係一個孝順仔，但聽到你問候佢老母，佢一定會孝子上身，叫你道歉。咁你到時就霸氣盡失，件貨有瑕疵件事亦都好容易不了了之
例子二（工人工作不盡力）：
如果你好直接咁樣話工人偷懶，佢哋係唔驚你嘅。因為「好佬怕爛佬」，佢爛過你就自然以為自己可以惡過你
雖然呢種諗法係源於不知道天高地厚，但而家嘅首要工作係令到工人做嘢，與其教育佢哋地厚天高，倒不如一開口就食硬佢，慳返啲時間
例如你可以大大聲用高高在上嘅語氣講：
「__那星你琴晚同條女__嘢__天光呀？ 做嘢冇奶力嘅？」
注意嘅地方係，你係講「__那星」，而唔係「__你老母」， 唔會畀機會佢孝順仔上身而反你枱
如果你想講嘢嘅力量強一啲嘅話，你可以將「__那星」 改為「__你老味」， 輕微提升衝擊性
一個要注意嘅地方係，呢句說話係褒貶混合嘅，即係__中有讚，讚中有__
點解呢？ 因為你係假設佢同一個異性進行房事直至天光，突顯咗佢擁有異性呢一件事。喺生物邏輯層角度，有異性代表有地位。而且可以搞到天光，其實係暗讚佢體魄強健
所以當呢一位工人聽到呢一句褒貶混合嘅說話，通常都會轉唔切，唔識點反駁，就唯有乖乖咁聽你講落力做嘢
例子三（不怒而威）：
喺員工面前顯示憤怒，會傷及大家長遠嘅關係。最好嘅做法就係顯示你能夠大大力咁樣__人， 只不過因為佢係你嘅自己人，所以你先唔__佢
你可以睇報紙或者日常生活遇到唔滿意嘅事，就加插啲「__佢老母！」嘅評語
由於你問候嘅係一個唔存在或者唔在場嘅第三者，你__「佢」老母都唔會得罪任何人，但就足以顯示出你有必要嘅時候係可以__人哋老母的
例子四（建立親和力／同聲同氣）：
無可否認，對於某一啲人，如果你講嘢斯斯文文一句粗口都唔講嘅話，佢就會主觀咁認為你唔知道前線嘅辛酸，覺得你著西裝打呔就係日日喺冷氣房嘆冷氣
要令其他人幫你，你首先要學識佢嘅語言
所以你可以喺閒談之中加插一啲冇攻擊性嘅粗口，主要係幽默式嘅自嘲，拉近大家關係，例如：
「琴日貪方便笨L7咗，喺超級市場買啤酒添，佢老闆原來今日大減價！」
呢句說話有好多含義嘅：
第一，笨L7係一個自嘲，顯得自己都係一個活生生嘅人，唔係冷血無情嘅管理層
第二，你飲嘅係大多數人都飲嘅啤酒，而唔係路易十四。咁樣做會顯得你同大家品味相投
第三， 大部分嘅打工仔都係鍾意__9啲大老闆嘅，你話「佢老闆」可以帶來親切感
好啦，舉咗咁多個例子，不如同大家分享一啲研究生級嘅粗口
*研究生級粗口*
研究生級嘅粗口，係要喺粗口之間隱含一啲寓意，帶來反思，或者令人會心微笑
例子一（鼓勵下屬要有責任感）
例如你想話以前帶過一個下屬好懶，希望而家嘅下屬唔好學佢咁懶嘅話，你可以講：
「以前帶過個工人，佢就真係 關人9打韆鞦 嘅，夠鐘就乜都唔理即刻換衫收工」
關人9打韆鞦，好具體咁樣勾起咗大家童年時候打韆鞦嘅暢快感覺，令大家會心微笑
例子二（強調醒目嘅重要性）
例如你想講有一啲人好懵閉閉(但係又冇破壞性嘅)，而想佢醒目啲呢？ 你就可以講：
「條友真係 7L懵懵食甜筒，幫下手醒少少都唔得」
同樣地，揸住支甜筒，個樣確實又真係冇攻擊性得嚟又天真無知嘅
例子三（開解畀人鬧錯嘅下屬）
有啲人鍾意鬧人，如果你有下屬俾其他人鬧錯咗，鬱鬱不歡，你可以咁樣開解佢：
「條友又正一係豬賓__嚟嘅，係又__唔係又__」
呢句說話要補充少少背景資料，話說豬打種嘅時候係用機器嘅，而隻豬公又冇乜腦，分唔到佢搞緊豬乸定係搞緊機器。所以豬賓__ 就係比喻嗰啲係又__唔係又__嘅人
呢個比喻，我第一次聽嘅時候都忍唔住笑咗
戴返頭盔先：
如果大家睇到呢度仲睇緊嘅話，可能會覺得喺創業嘅時候無論係處理其他 counterparts或者下屬都需要講粗口。大家可能問：「半宅職薯，咁你係咪認為我要講多啲粗口？」
喺呢度我帶返頭盔先，我自己而家已經唔鍾意講粗口，因為除咗字眼之外，我掌握到善用語境、身體語言、語氣，同埋提出反問句嘅技巧，喺唔需要講粗口嘅情況之下亦都可以達到講粗口嘅效果
我唔否定粗口喺某啲場合對某啲人有某啲功能，但亦都唔贊同佢嘅缺點。所以大家如果要學嘅話，其實可以選擇直接學更高階嘅修辭用語技巧，跳過粗口呢一part佢
至於點學更加高階嘅修辭用語技巧呢？的而且確係有啲難度嘅。 我遲啲再同大家分享
圖片：上網隨便搵
工人偷懶 在 [新聞] 快訊／高雄透天厝「電梯夾人」 目擊者嚇- 看板Gossiping 的推薦與評價