要成功，就要自宮（上）
我係一個失敗嘅人。
由細到大，我做嘅每一件事，冇邊件係成功嘅。
家境唔好、讀書成績唔好、運動又差、冇咩專長、生得唔靚仔、仲要矮……
古語有云：「上天為你關咗一道門，必然會為你開番一扇窗。」
但時至今日，我都未搵到屬於我嗰扇窗。
我覺得，我間屋係封實晒，連煙囪都塞埋，一樣優勢都搵唔到。
中學畢業後，我出嚟打工，當然係工時長、人工低，仲要成日俾老闆鬧我係廢柴，借啲意克扣我人工。
我嘅人生一片灰暗，我完全睇唔到未來同希望。
呢個時候，政府出咗一個招募廣告，招募「女性」。
咩叫女性？就要從世界歷史講起。
話說喺好多年前，地球上嘅性別分為「男」同「女」，女人係一種非常美好嘅生物，既可以承擔生育嘅重任，又可以令大部份男性產生激情同愛意。
本來，男女比例係接近1：1，男女雙方都可以搵心儀嘅對象，配成一對。
但唔知幾時開始，女嬰出世嘅比率愈嚟愈低。
各國科學家一齊研究呢個問題，但依然改變唔到呢個趨勢。
然後，最後一個女嬰出世……幾十年後，地球上最後一個女人死亡。
從此，世上只有男人，唔再有女人。
為咗延續人類文明，政府喺「人工繁殖胚胎」同「變性」兩個課題嘅研究上，消耗大量資源。
事到如今，「人工繁殖胚胎」嘅技術已經好成功，每年都有嬰兒出世，但只可以繁殖男嬰，而且繁殖成本高昂，未完全滿足到人口需要。
至於變性技術就更加先進，可以將男人完完全全變為女人，有埋完整嘅生殖系統，可以同男性交配，懷孕生育。
你以為咁就解決咗問題？其實冇。
就算技術上可以將男人變成女人，但肯變成女人嘅男人，始終都係少數。
你嘅性別認同係一個男人，依加要你做女人，你接唔接受到？
所以，除咗少數「天生性別認同係女人」嘅男人，會自願做變性手術之外，其他男人都好難接受。
女人嘅數目依然極少，遠遠滿足唔到人口繁殖需求，同廣大男士嘅需要。
所以，各國政府每五年都有一個「變性quota」，需要一定數量嘅男人，變性為女人。
政府會先出招募廣告，希望男人主動報名，變性做女人，手術當然係免費。
可能你會問，除非性別認同係女，否則點會有男人肯主動肯變性？
對於主動變性嘅男人，政府會給予「自願變性津貼」。
人數唔夠嘅話，政府再從全國適齡男性中「隨機抽取」，強制「變性役」。
而且，做女人本身就有極高嘅「性別紅利」。
喺「男多女極少」嘅情況下，只要你係女人，無論你靚唔靚，都一定會受到眾多有錢仔嘅追求。
只要從中揀一個有錢仔，就可以過住少奶奶嘅生活，保證唔洗返工都有車有樓。
就算唔想嫁人，就上網做女神、收吓兵，一樣收入豐厚，周身名牌。
我本來都冇諗過要做變性，但我嘅好兄弟阿邦，居然send個廣告畀我，問：「要唔要一齊變性？」
做得兄弟，阿邦嘅水平當然唔會同我差好遠，大家都一無所有。
如果將成個城市嘅男人，按條件分級，我同阿邦都一定係最低級嗰類。
阿邦愈講愈興奮：「一齊做女人，即刻變『人上人』！」
下集：https://bit.ly/3rDiyHk
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #要成功就要自宮
