https://www.patreon.com/posts/52943579
李家超升政務司，一堆時事KOL乘機大放厥詞呃Like呃課金：例如立場蔡子強燒山之流又走去質疑究竟紀律部隊出身嘅佢究竟有無資格出任呢個特衰政府「第二把交椅」嘅位置，然後又講埋啲乜嘢「武官政府」、「香港已成警察城市」云云。
首先第一樣嘢，由兩年前612開始，香港根本經已進入「差佬大哂」嘅Police State歲月：所有施暴警察不予起訴，一般市民隨意被拘留、無搜查令下爆門搜屋、資產被凍結而毋須任何解釋──我想問你班黃屍KOL係咪訓撚咗兩年？要去到比卡超升做政務司先驚覺香港成為「警察城市」？
至於「專業記者」林妙茵就更好笑，竟然走去質疑李家超響送中修例「徹底失敗」點解反而有職升：睇黎呢位「專業記者」仲係停留響飯民同政府有傾有講，政府官員得閒會不分立場約下記者出黎飲茶放風嘅美好歲月，仲未訓醒。
好撚心啦，自從中央決定辣手鎮壓後，過去所謂「修例失敗」定性經已完全逆轉：韓正南下親自主理香港局勢後，你估特衰政府官員仲有自由意志？最多都係好似張建宗咁頹做、定係好似李家超咁唔怕面懵貫徹到底而已
如今反送中條例胎死腹中，但國安法立法全面成功，當然係功足抵過，甚至係大功一件；以區區保安局局長身份，卻足以超越政務司、等同律政司，成為美國制裁名單上一員，更顯示佢國安法立法角色舉出輕重，響共慘黨眼中，唔升佢升邊個？
不過今次想講嘅主題卻係，由於比卡超由保安局長升到政務司長，結果突然間一堆香港人又突然睇倒政務司呢個位好撚重要，又講到乜撚中共徹底放棄「AO治港」，搵警察出身嘅李家超坐政務司係「軍人干政」云云。
呢班時事KOL首先完全漠視咗，特區政府自從回歸後一連串（同民主無關嘅）政制改革，就係要去公務員化：2002年董建華推「集體負責制」，唔撚通真係學林妙茵之流走去質問點解局長唔負責咩，人地就係想將各部門首長由公務員轉成政治任命，為安插非公務員內閣舖路嘛！
然後去到2007年曾蔭權時代，搞副局長同政治助理制度其實就係對公務員進一步削權，結果碰得焦頭爛額，成為結束佢治港蜜月期嘅分界線，其實就係公務員系統同飯民媒體一次對政治任命制度嘅反擊戰。但當時唐英年就任為第一個非AO政務司長，其實已係準備來屆政府正式推動「非AO治港」。
點知去到特首選舉最後直路，多得飯民左膠夾擊令唐英年墮馬，梁振英倉促上馬下唯有先用林鄭月娥穩定軍心，再去到佔中時期梁振英民望跌至低點無得連任，中央為打壓曾俊華，於是先再行回頭路搵林鄭上場。
喂大家唔撚該睇下，陳茂波接任曾俊華做財政司，本身已唔係AO出身啦，聶德權轉任公務員事務局長亦曾被公務員工會批評，佢響2017年已脫離公務員體制，唔能夠了解公務員睇法──要講公務員削權根本由來已久，只係班跟紅頂白嘅KOL同記者集體失憶而已。
