打龍門嘅好處及壞處
龍門嘅位置好特別，落得場一隊只係得一個。咁當然有啲著數或唔正嘅野。今次又黎分享下。
好處✅
1.） 長期多波踢
喺業餘衛生波，龍門的確有幾矜貴。但當自己隊波個龍門唔到，咁就一定搵「替工」。所以「替工」龍門只要有時間。就非常多波踢。版主都成日做「替工」，有得踢之餘，夾下啲新識嘅波友，挑戰感又多啲。
2.）踢波唔使錢
接上題，因為龍門缺市。而出面踢波一係收會費，一係夾場租。但好多時幫手做替工嘅龍門係好少要出錢。因為喺人地立場黎講，你肯出黎幫手已經幫左大忙。所以唔好意思同你收錢夾場租。不過有時都會夾下，因為真係幾十蚊，而自己有份踢。有來有往先會長踢長有。能力比到嘅咪夾番份囉。
3.）行行企企，食飯兩味
對於一啲唔鐘意跑，又想踢波嘅朋友。龍門一定岩晒你。事關根據非正式統計，一場90分鐘嘅賽事。龍門嘅跑動距離係不足1KM。大多數係跑動都係屬於短距離，都係10碼8碼。講求嘅係爆發力，而且都係單刀同出迎解圍先叫跑得比較多。冇咩野做嘅情況下，最多都係開下波，睇下波。當然忙起上黎就慘過場區更多。撲完起身再撲係好攰嘅。但有時冇波到，啲時間又好難捱，加上呢排涼涼地，特別有睡意😂
4.）型啲
好多人鐘意打龍門嘅原因係型過踢場區，事關當你飛到隻死角，撲左求必入。除左隊友會讚，有時對手都會讚。因為人地做唔到嘅野，我做到咪型囉。所有帶女朋友或老婆黎睇波嘅龍門，多數都特別「生猛」。救到球波就喺女友老婆面前威下。神救一球，型嘅程度比你射入一球更大。
壞處❌
1.）輸波責任
因為龍門得一個，一犯錯係特別礙眼。場區傳失波，扭波扭失波相對覺得較「理所當然」。加上有龍門幫你補鑊。就算龍門救唔到，有啲人都會賴龍門。不過近年踢波嘅朋友相對開明啲。少左賴龍門。不過只要係失波，龍門都係有責任。
2.）技術要求多
以往龍門識救波，用對手就搞掂。不過而家嘅足球趨勢，要求龍門有一定腳下功夫。除左基本長傳，而家龍門要識控球、用波、派牌，甚至可以扭到一兩下。所以對一啲唔善於用腳嘅龍門的確係吃力。練接波練飛撲不單止，仲要練埋腳底功夫。
3.）架生多
一般踢波就基本衫褲鞋襪Pad，龍門除左以上要有，多對手套。甚至護踭護膝，加埋啲Tape紮手呢啲野。個背囊就要放多啲野。重量就自然重得多，自律啲帶埋個波就更甚。
4.）練波運動量高
龍門踢比賽辛苦極都係有限，但練波嘅運動量係辛苦更多。技術多元之外，雖然唔使點跑，但飛撲起身再飛撲係好高運動量。加上唔係一兩下就完，十下八下就走唔甩。加上撲高波，彈地波，地波等，每款波十下，連續不特止，仲要好快。呢啲就更加攰。所以運動量係好高。
以上都係好處同壞處，不過壞處嘅係除左第一條，第二、三四條。只要你係好鐘意打龍。全部都唔會係壞處。可能仲有好多point，有興趣嘅朋友不妨留言分享下。
#一入龍門深似海 #其實真係好鐘意打龍門 #elitesporthk
踢足球的壞處 在 [閒聊] 踢足球的體格怎每個都壯的跟鬼一樣- 看板C_Chat 的推薦與評價