［蘋果咬一口］Steve Jobs死後，蘋果股價仲升咗8倍。投資有幾難？
TLDR：根本蘋果人人皆知時都任你買。投資反映性格，最大嘅敵人，就係你自己嘅貪念同短視。我都係。
1. 介紹返，篇文唔係講蘋果。係講投資，講股票as a whole。當然我發現好多人好鍾意講「一見篇文開頭講乜乜已經唔想睇落去」。何其傲慢，好似你啲時間好值錢咁。埃汾一向都話，never judge a book by its cover．「同樣地，未上床唔好講真愛」。I am serious。睇完幾千字覺得個作者廢，咪畀多次機會。睇多幾篇都唔得嘅，咪唔好睇。
2. 話時話，呢排記得keep 住like and share，主動入嚟睇，同埋設定做see first．真係搵食艱難。但感激大家，Keep住做，呢排啲Reach係好返好多的，但唔好鬆懈。一個都不能少呀
3. 其實唔少朋友讀者都有蘋果股票（＊），唔好話發達，但回報已經叻過絶大多數人。基本上你任何位買都贏錢，你見到呢篇文時係星期一，蘋果出完業績。升10%，歷史新高，所以任何位買都贏錢（＊＊）。而家係間市值18000億嘅公司。有幾驚人？冇，就係全世界最大市值咁解。就係早兩年都講緊齊齊鬥快10000億，four comma club （one trillion，12個零，4個comma）．而家分分鐘今年有人去到20000億。
4. BTW，見到啦？早幾年先10000億，而家20000億。不投資，往下流。即使呢個Page或明報專欄（今日有，記得買份，我冇得分，但支持下明報），我都至少講左幾年。
5. 但呢篇文唔係講蘋果業績，係講投資股票，as a whole。「其實唔難」。但點解咁多人做唔到（包括小弟，但已改進好多）？好簡單，畢菲特講嘅依然啱—冇人想慢慢發達。
6. 蘋果做乜，不用多講。埃瘋咯。冇錯仲有埃扑（其實係咪冇咗？），埃劈，埃窩廚，埃覓及其朋友覓卜等等。但主要都係埃瘋單天保至尊。勉強講而家仲有「服務」，上得快，但而家都係埃瘋佔近半收入，況且沒有埃瘋那有服務。有機會另文講下。
7. 所以，的確好多人講蘋果「冇創意」，食老本，一招走天下—但吹咩，就係一招走天下就夠做全世界最大市值企業。《絶世好BRA》有講，花式唔使多，女人要嘅唔係呢啲。同樣地，投資者要嘅，好簡單，給我盈利，其他免問。
8. 遲下我再寫篇文，寫另一個對比：Google，夠多元化，乜招式都有。當然都好勁，但，同蘋果比如何？一句，搵唔搵到錢？而家我地講股票下話？咁巴閉，點解賺唔到錢？哦我地唔係為錢咁庸俗。咁唔好上市咯。你私人公司任你點玩都得。上市公司股東就係睇利潤，你以為Steve Jobs因為脾氣臭畀人炒？
9. 聽聞李小龍都係咁講，唔怕你式一百種體位，至怕你一招傳教士練一百次。
10. 嚟啦喎，睇圖。應該好易明。藍色係蘋果嘅收入，十億美金計，左邊軸。紅色係純利，一樣十億美金計，都係左邊軸。灰色線？紅色除藍色，純利率，net profit margin，右邊軸。
11. 當然蘋果唔係2002先成立，再早嘅數我都有。揀2002主要因為2001年蝕錢。而我原本用log scale 後來唔用，費事再搞，但不影響討論。
12. 因為，我地唔好離地到講咩10蚊買騰訊呀，九十年代買蘋果咁痴線先。我地講啲realistic 嘅嘢。
13. 我係一個蘋果用家，但只限埃瘋埃劈埃扑，冇其他。我更加唔會半夜睇發佈會（好似睇過一次，冇由頭到尾睇完）。但我想講，我好記得教主Steve Job係幾時死嘅。
14. 因為嗰日，我在馬六甲，出緊差，其實係啲無聊添標定，標到去馬六甲，真爽。當日有啲分組活動，開始時，呀主持人好凝重咁講「我地開始前呢，想同大家分享一個唔係幾好嘅消息」我心諗，做乜春？。原來係教主死咗。咁咋？我係用埃瘋，但好似太痴線啦！
15. 無論如何，嗰日係2011年10月5日。
16. 點解講呢啲？因為教主死嗰日，已經係無人不識咁滯，蘋果亦都已經無人不識。大家只係擔心之後點算。
17. 然後回返帶，用埃瘋嘅你，幾時開始用？或者唔用嘅你，幾時見到有人用？我有個狂熱同事，好似埃瘋吐已經開始用。但我地呢啲正常人，應該係瘋科飛，或者埃瘋科先用。埃瘋科有幾紅？紅到李克勤有首歌叫「埃瘋科」
18. 就由埃瘋科，全城狂熱開始講。時為2010年6月。教主釘蓋前一年。我地睇睇，教主死嗰年，2011年，蘋果收入突破1000億。純利係260億。
19. 似乎豬肉在前，好似莫耶斯教曼聯咁（又係李克勤！），點超越前人？
20. 但就係唔係咁。
21. 打後十年，即係去到今年左右，蘋果收入係當年差不多3倍。其實唔係好多，10年3倍喎。一年11%左右。聽講我啲網友一個月都賺幾成。純利呢？升得更少，一個double 左右。
22. 想講嘅係，教主釘嗰時，蘋果股價，應該50蚊左右。而家400蚊樓上。十年八倍，not bad。你有冇一隻股票升8倍？
23. 而我呢個，已經係極之唔屈機嘅一個講法。根本埃瘋飛埃瘋科嗰幾年，連你阿爺都知道呢件玩意好新奇。但，嗰時你又覺得，扯，賺得一浸錢啫。
24. 係咯，到出埃瘋快乎，你又覺得，扯，咪又係咁，冇乜創意（的確係）。但，請睇多次第7段。到教主死埋，你就覺得，玩完咯，帝國崩潰。而唔知道，教主雖則係極其cult，果粉去到邪教咁地步（你排過生果舖見到有人出嚟同你拍手就知有幾痴線）。但，企業才是永恒。你要質疑嘅，永遠都可以「但係呢如果咁不過呢」，但公司就係不停咁迎難而上，唔係啲友點拎咁高人工？
25. 寫到呢度，你絶對可以質疑一樣嘢。喂，教主死咗之後真係唔得喎。我地就講錢，首先，見唔見個margin 跌咗落嚟？教主死時去到24-26%，近年係20%左右。的確如此。亦畀你見到，近年蘋果收入升得慢，純利更加升得慢。近兩三年其實原地踏步
26. 計長啲？頭先講過，教主死嗰年到而家，收入係當年三倍，純利係當年兩倍多啲。但股價升咗8倍！呀哈！GotCha！仲唔係「股價同基本因素脫節」？
27. 咁，你就諗漏咗兩樣嘢。嚟啦喎。第一，埃瘋飛埃瘋科出嗰時，美國10年國債，5厘息。教主死嗰時，2里半左右。而家，半厘。你覺得冇影響？咁你最好讀少少書先。好喱文講句：借畀美國政府都有5厘息嘅，我買公用股4厘冇乜吸引。但借畀美國政府得0.5厘息嘅，我買公用股3厘都仆到去啦
28. 第二，亦係重點。特登trap你的。冇錯，教主死嗰年至而家，純利只係一個開多啲。但，Earnings per share 每股純利唔係嘛！計EPS，就升咗四倍咁滯了！
29. 點解有咁混帳嘅嘢？簡單數學，每股純利=純利/股數。咁當然係股數少咗！
30. 點解少咗？因為回購！點解回購？因為多錢！唔止，蘋果甚至發債。咁多錢都發債？咁平息，唔借就笨！我借錢嚟回購股票，得咗。但當然要你間公司本身有錢同發債成本低。
31. 回購唔道德？痴線，你見匯控啲乜乜小股東，4月嘈到8月，咪又係嘈人派息。回購同派息效果相似，但唔使畀美國政府抽稅。
32. 加上，再講一次，聯儲局將啲息壓到咁低。公司根本發債回購都有so．所以低息點會冇助股市？
33. 睇完呢篇文，你就真係明白，唔使睇坊間好多垃圾文。
34. BTW，收費專欄今星期會重出江湖。留名……係冇discount嘅。不過會第一時間通知你。之前冇訂嘅。話你知，你就當呢篇係sample，雖則未必寫咁長。一個星期三篇。收費應該平過之前。
（＊）我冇統計過，但讀者好似係果粉多。而我幾肯定香港嘅果粉佔比係比全世界高。好簡單，有錢。但呢個唔係重點。唔係果粉先要買蘋果。係相反，你係叔粉巿粉先更加要買蘋果！Keep your friend close, but your enemy closer。所以我雖則討厭香港，但一樣買香港股票—因為，萬一我錯呢？
（＊＊）包拗頸嘅，咁嗰時day high個位買咪唔係咯，四百幾蚊輸六毫子。你係嘅，影張相畀我，我請你食飯又點話。
————————————————————————————————
最新收費影片：第一次推介跑贏大市，同你回顧檢討下。仲有新推介。40分鐘，都係賣返$80
簡介及以前嘅片（未睇可訂）：https://bit.ly/3iYMD0F
報名嘅，課程編號CC006：https://bit.ly/3eXVX1K
報完名交咗錢，呢度log in：https://bit.ly/3gYXu9e
之後按最頂「按此觀看」就得
仲搞唔掂嘅，睇埋下面，或者搵客服，或者PM我。
-------------------------------------------------------------------------------
【最新李聲揚收費影片】題目: 回顧第一段專欄片有幾勁！今段落多幾個Number賺死你！40分鐘，都係賣返$80
影片/課程編號：CC006
播放平台：https://homebloggerhk.com/web-class-player/
付款及收看步驟：
1/點擊報名收看 [影片/課程編號：CC006]
2/利用信用卡網上付款
3/及後有登入資料可以立即收看
查詢：whatsapp 63832145
遠 傳 so net 在 Re: [業介] 全台-遠傳/So-net/GT-ADSL光纖網路申辦- 看板 ... 的推薦與評價
在新竹可推薦
300m sonet方案嗎
--
※ 發信站: 批踢踢實業坊(ptt.cc), 來自: 27.242.126.16 (臺灣)
※ 文章網址: https://www.ptt.cc/bbs/Broad_Band/M.1589301500.A.30C.html
... <看更多>