《同盟》動作出色，大台仍放不下《家、春，秋》情意結
大台《同盟》這劇集，上過收視平均有26點，最高收視是上周四胡定欣扮狗那一段，有27.4，成績肯定是不俗，能否破文偉鴻監製去年《城寨英雄》的收視紀錄，便要看以後的劇情發展，以首周看，最大賣點是動作場面，非常密集，連食件Pizza都要打分幾鐘，不過以電視水平來說很不錯！演員除了陳展鵬，胡定欣是重心外，另一最大賣點是鮑起靜首次在大台做黑社會大家姐，這角色相當有挑戰性，因為論外型，她真的不似，只能用演技搭夠，對於一些複雜內心戲，她單靠眼神也可以演繹出來，真的很厲害。
全劇令人感到納悶的是劇本結構，還是巴金年代《家、春，秋》式的大家族沒落的大橋，只是換了個黑社會大家族，又係一家三代共處一大屋，一張大餐枱齊齊吃飯，另外又係一個大辦公室，班黑幫頭目好似公司股東咁開會，場面同對白，一切都熟口熟面到爆！而人物設定也是一樣，張國強、敖嘉年、嘉樂仔是用來闖禍的，韓瑪莉是為爭而爭的角色，郭鋒表面上係最大敵人，但最後大老肯定唔係佢，但千其唔好係歐瑞偉，因為佢在《城寨英雄》已經做過！陳展鵬同陳山聰又會好似《乘勝追擊》咁，先係好兄弟，結局又係互相揸把鎗指住對方，一切都會是意料之內，看來這是大台創作組和核心觀眾的共識，唔好有咁多驚喜呀！
《家、春，秋》這種大家族沒落的劇情，大台一直樂此不疲，由1970年代的《詩禮傳家》、《雷雨》、《朱門怨》⋯到長劇年代的《狂潮》、《家變》、《強人》，一直到《茶是故鄕濃》、《酒是故鄕醇》、《金粉世家》、《關西大少》、《巾幗梟雄》、《溏心風暴》…差不多五十年時間，大台都喜歡用，一個大宅，幾房人住在一起，勾心鬥角，然後又遇到外敵，一家人齊心團結⋯，這設定無疑為大台創造了不少經典，但這模式真係睇到人好悶，尤其現在小家庭當道，大多數家庭一孩化，甚至唔生，獨男獨女愈來愈多，大台還死抱這設定，基本上有點同時代脫節，令到劇集的劇情，很難令人有共鳴感。不妨重溫一下王維基HKTV的劇集，人家第一個去掉的，便是這種大家族設定，所以時代感比大台強。
2017年了，為何還要停留在民初！
#同盟 #電視劇 #鮑起靜 #陳展鵬 #胡定欣 #文偉鴻 #收視率
