其實我一直都覺得DSE 對於學習平庸，家境唔係好嘅學生來講，係商業詐騙嘅開始...
一年一度 DSE又開始 ，今日想同大家分享下，一齣中國紀錄片《為什麼貧窮》其中一集，《出路》.......
呢套紀錄電影講述中國高考，以及讀書可以改變命運嘅迷思.....
中國高考喺中國係好大件事 ，今時今日，大家依然覺得讀書同日後嘅經濟掛鉤，高考拎到好嘅分數入到好嘅大學，日後就有好日子過。呢個記錄片，就持相反嘅意見，講述有好多人越讀越窮。
呢套紀錄片講述三個主人翁嘅故事，第一個係高考 失敗嘅女仔.......
喺農村長大嘅呢個女仔喺高考考到三百幾分，呢個分數喺大陸就只可以入讀三本大學，喺大陸一本大學就係最頂尖嘅大學，三本大學就類似香港嘅asso 或者high dip。佢嘅 父母，係喺磚廠做搬運嘅工作，為咗畀個女入讀三本大學，仲擺酒請客，搵親戚籌錢交學費，未讀大學就先欠債。
呢個女仔好相信只要佢讀完書，就可以得到一份好嘅工作，可以還清學債，改善屋企人嘅生活，逆轉貧窮嘅命運。咁到底係咪真係咁易，單靠讀幾年書，換一張大學沙紙，就可以改變命運呢？
故事嘅第二個主人翁係一個啱啱喺大專畢業，拎到張所謂大學文憑嘅畢業生，呢個男仔唔係畢業於重點大學，仲要係喺農村出城市搵工嘅人，畢業之後， 到處搵工到處碰壁。擁有一張 三本大學嘅文憑，原來係衰過冇讀大學，拎住一張三本大學文憑，高不成低不就，好嘅工作 唔會睇得起你，搵一份差嘅工作，負擔唔到自己喺城市嘅生活，還唔清學債，兌現唔到父母對你嘅期望。
故事入面嘅第三個主人翁，就係一間民辦大學嘅推銷員，由於中國絕大部分人仍然有一種迷思，覺得讀書同經濟係有正面嘅掛鉤，覺得讀書可以改變命運，於是大陸就衍生好多民辦嘅私營大學 ， 呢個推銷員，就係走訪唔同嘅農村，推銷呢間民辦私營大學，講到入咗呢間學校，就有光明嘅前途，呃人入讀呢間學校。呢啲大學對於收生冇特別嘅要求，主要就係收錢，印大學文憑俾比得起錢嘅高考失敗者。呢個民辦大學嘅推銷員指出，中國三大暴利行業之首就係招生，一間私營大學只係一間牟利嘅公司，學生係咪真係學到嘢，老師係咪真係有質素，大家都唔會理會。
中國將最主要嘅教育資源，都投放喺重點大學度，成績愈唔好愈窮嘅學生，對於入讀大學愈趨之若鶩，有一種以小博大嘅心理，只要付出金錢換取大學嘅文憑，就可以改變命運。於是讀得越差嘅，欠嘅學債越多，越窮越讀， 越讀越窮。
~~~~
講到呢度，係唔係覺得到處嘅教育失敗個案，都係源自政府失敗嘅教育制度......
社會同家長都有以為讀到書就可以改變命運嘅迷思，而且覺得讀到書就等於搵到錢。政府有錯誤引導大眾 讀書係唯一嘅出路，俾一啲錯誤信息出來，encourage 人人都應該讀大學。政府引導讀書唔出色嘅人都應該讀大學，但又唔提供對應嘅資源，鼓勵大家畀錢讀根本唔值咁多錢嘅asso 同high dip。同私營牟利嘅教學團體，進行另類嘅官商勾結， 將教育商品化。
如果只係想用錢 去買張 大學文憑，有以小搏大嘅心，覺得用張大學文憑可以換到更大嘅前途 ，呢個投資 一開始就係失敗 ，花費嘅唔止係錢，仲係時間。
如果你唔係主流認定嘅讀書材料，跟本唔需要局自己行入主流，主動獻身受騙。
