之前我一直都好困擾個衰女包唔肯刷牙，無牙膏佢肯刷，有牙膏就發晒癲！已經換過好多味嘅牙膏同好多花款嘅牙刷，試過氹或者鬧都係搞唔掂！但依家3歲，佢仲係好鐘意飲奶，好多時臨瞓，半夜同朝早都要飲一支！雖然我曾經問過牙醫，咁細個用清水刷都仲可以，再慢慢努力訓練，但我真係好驚佢有一日好快蛀牙！
首先初初最大問題係唔肯用牙膏，佢好怕牙膏有味，連有最愛嘅士多啤梨都唔要！當時我搵咗好耐，都唔明點解周圍都係賣有味嘅牙膏🤯！偏偏個寶貝女就係唔鐘意有味！之後終於搵到一款bb 用嘅pigeon無味牙膏，但佢每次見到我地吱牙膏就發癲，要目擊我地洗咗佢先肯刷。後來我每次都偷偷地唔畀佢望到我吱牙膏，只吱少少份量再捽散佢，扮無牙膏，先叫佢開始刷牙，多數都過骨！😆
之後發現日頭佢好唔願意刷牙洗面，可能佢覺得好嘥玩樂嘅時間，好想快d出去玩，每次佢都lur晒地唔肯刷，反而仲嘥時間！於是我地堅持咗好多日，訓練佢每日一定要做齊洗手，刷牙，洗面，先可以出廁所。有時佢要你幫佢刷，我都會幫手，最緊要佢肯刷！亦發現佢最願意係沖住涼嘅時候刷牙，但其實沖完涼又返入房飲奶先瞓，所以其實無乜用，不過刷咗總好過無刷，就係佢最願意刷嘅時候，同佢刷乾淨啲，同佢講多啲道理！
1️⃣我試過帶佢跟我去睇牙，佢幾深印象，會記得大概係入面要做d咩，覺得我睇牙醫好痛，我就借d意成日話，你唔刷牙就要跟我睇牙醫，唔想睇就要刷牙。
2️⃣試過同佢睇好多關於牙齒健康同睇牙醫嘅書，話佢聽每日都要刷牙，唔刷牙就要去睇牙醫！
3️⃣不過最大威力應該係同佢講：「公主都會刷牙架，唔刷牙嘅話，佢地個口好臭就無得做公主！」「咦？你無刷牙？好臭呀！公主個口唔會臭架！」夢想成為公主嘅佢，佢真係好驚自己邊樣唔合格，做唔成公主😆
經過咗好多又鬧又氹嘅日子，佢最近終於好乖，每朝起身就主動入廁所，提自己要先洗手，刷牙同洗面先可以開始活動！
到佢習慣咗每日都要刷牙之後，連牙膏都慢慢唔再恐懼，就算喺佢面前吱牙膏都接受，後來索性喺佢面前用完支無味牙膏，我就直接同佢講：「舊果支無貨買唔到，我地一齊用新嘅牙膏，會有少少士多啤梨味，呢支係畀小朋友用，舊果支係bb先用，防止唔到蛀牙架！」佢又幾受落喎，只係叫我：「咁下次再買丫！」轉牙膏嘅過程就每日吱少少，慢慢慣咗吱返多啲，貝貝其實都仲未係好習慣，刷兩下就唔想刷，要啷口，但慢慢每日開始增長刷牙時間，依家佢慢慢慣咗陣味，可以快脆刷完直接啷口！👍🏻👍🏻👍🏻
過程雖然艱辛，媽媽個心亦會好累，但我地要相信佢一定會成功！希望幫到各位面對緊同樣煩惱嘅媽媽～
———————————
FB: https://facebook.com/profile.php?id=155831361844211
IG: https://www.instagram.com/bowl_lam/
#貝貝Alice #90後媽媽 #香港媽媽 #新手媽媽 #新手爸爸 #育兒日記 #育兒生活 #小朋友刷牙 #兒童牙膏
