【Desporte五人足球鞋簡評】
.
Desporte，日本2003年創立嘅品牌，阿靴之前就同大家實測過佢其中一對五人足球用波Boot。唔講唔知，Desporte成立於靜岡縣，佢地期望製作出完美嘅五人足球鞋。輕量，舒適，貼地，赤足感覺等等，一直係Desporte做Boot嘅大原則。佢哋期望製作出好嘅波Boot，提升大家响五人足球層面嘅表現。
.
五人足球响狹窄嘅環境進行，每樣細微嘅位置亦變得非常重要，同樣地，Desporte波Boot嘅造工同樣非常細緻，佢嘅五人波Boot亦有幾個系列。而今次，阿靴就會同大家簡單講解下幾對Desporte常見嘅波Boot，讓大家了解一下佢地當中嘅特性及分別。
.
【Tessa Light ID2】黃色
Tessa Light ID2 鞋面用料用上優質袋鼠皮，質感柔軟。佢係咁多對波boot𥚃面最多鞋帶窿嘅一對，佢鞋帶範圍較大，目的係讓波boot更包腳更貼腳。此外，Tessa Light ID 2於一眾Desporte波Boot裡面擁有最大範圍嘅透氣網面，設計可以大大提升波Boot嘅透氣功能。不過，多鞋帶窿及大透氣網面設計亦有唔好嘅地方，例如Tessa Light ID2 嘅袋鼠皮用料範圍會變得較少。著上腳時，Tessa Light ID 2會較貼地，鞋型上亦非常合適闊腳波友。
.
【Sao Luis KL2】白色
Sao Luis 話說就有兩兄弟，用料較高質素，價錢亦較高昂嘅版本叫做Sao Luis KL2。Sao Luis KL2 前腳掌位置用上袋鼠皮，不過新版本Sao Luis KL2袋鼠皮質料會較其他頂級版本薄及硬。Sao Luis KL2 兩側同樣擁有透氣網面設計。不過，再次與其他頂級版不同，Sao Luis KL2鞋墊位置用料並不是麂皮，用的是普通網製用料，Lockdown相對也會相對差點點，不過Sao Luis KL２嘅優勢係定價相對其他頂級版本平一點。至於鞋型上，Sao Luis KL2同樣適合闊腳波友。
.
【Sao Luis SL2】黑色
Sao Luis SL2 係Sao Luis KL2嘅細佬，鞋型設計非常相近，唯一唔同嘅係鞋面嘅用料，Sao Luis SL2 嘅係全對合成皮，質感則會較硬。Sao Luis SL2 鞋籠位置，包括鞋踭及鞋墊，均用上較普通嘅網製質料。至於透氣網面設計及緩震層面，Sao Luis SL2大致同Sao Luis KL2一樣。基於Sao Luis SL2用料較次一級，定價亦會相對較便宜，阿靴亦認為佢非常適合初嘗Desporte波Boot嘅波友。至於鞋型上，阿靴認為佢適合中至闊腳波友，畢竟合成皮質料唔會好似袋鼠皮質料咁隨時間少量擴張。
.
【Campinas JP5】灰色
如果預算唔多，又想一試Desporte袋鼠皮波Boot，阿靴會建議大家一試Desporte嘅Campinas JP5。Campinas JP5 前腳掌用上軟熟袋鼠皮，但定價則約為其他頂級版本嘅七至八成，的確係性價比之選。不過，定價較低亦有佢嘅原因，Campinas JP5並無透氣網面，鞋籠位置用料為次一級嘅網製質料。雖然如此，Campinas JP5鞋型係咁多對波Boot最闊嘅一對，絕對係闊腳波友嘅恩物，加上Campinas JP5 最近推出咗彩虹標誌嘅特別版本，外表真係無得輸。
.
【Boa Vista KL2】紅色
Boa Vista KL2，之前啊靴就曾經同大家實測過，佢亦係而家阿靴踢五人聯賽嘅波Boot。Boa Vista KL2用料為頂級版嘅配置，包括腳掌袋鼠皮，兩邊透氣網面，鞋籠麂皮用料。Boa Vista KL2 整體發揮非常理想，尤其Lockdown嘅表現，唯一要挑剔嘅係鞋舌位置較硬。至於鞋型上，Boa Vista KL2 屬於Desporte波Boot裡面稍為修腳嘅一款，不過本身Desporte設計為闊腳，阿靴認為佢會合適中至闊腳嘅波友。至於實測係如何，大家可以望望之前Boa Vista KL2嘅實測Post。
.
今次啊靴就同大家簡單講咗Desporte旗下常見嘅波Boot，如果大家著慣又睇慣大牌子嘅波Boot，Desporte亦會係一個幾唔錯嘅選擇。至於個別Desporte波Boot發揮又係如何？就睇睇遲下有無機會再同大家實測喇！
.
感謝 Kemari Sports 提供嘅波Boot。
.
----------------------------------------------------
【屎波裝備多Instagram】Follow: instagram.com/hkfootballreview
【波Boot實測】蜘蛛俠Nemeziz 19+ FG: https://youtu.be/NxJcr40CNWI
【波Boot實測】白飯魚: https://youtu.be/-dbvs0_YgiY
