【只不過係飲餐茶】
下晝兩點鐘，一個伯伯攤左係床上面被推入急救室，緊隨在後嘅係佢老婆同埋一眾屋企人。
大概幾分鐘後，醫生一出黎，婆婆就急不及待咁同醫生交代病情。
婆婆：「佢今朝去左飲茶，返黎明明仲行得走得。佢跟住話見攰咪返房訓囉，點知岩岩入去搵佢，佢就攤左係到唔郁得啦！」
醫生：「佢係幾點返到黎屋企架？」
婆婆：「九點幾鐘啦！醫生你幫下佢呀！」
醫生：「佢而家嘅情況似係中風，而家我地會即刻幫佢做電腦掃描，我地亦都叫左腦內科醫生落黎會診。」
婆婆哦左幾聲，唔該前唔該後咁就退返出去，目送住伯伯被推去照掃描。我見婆婆相當冷靜，大概都唔覺得事情太嚴重。腦內科醫生好快亦都黎到，睇完電腦掃描之後，就同婆婆交代結果。
腦內科醫生：「婆婆，我岩岩睇過佢嘅掃描，見到佢腦入面有好大舊血塊係到，的而且確係中風。個血塊壓住左個腦，令到佢而家咁樣。我地會搵埋腦外科醫生黎睇......」
婆婆：「嗯嗯嗯！麻煩哂你地呀！係咪攞返出黎就得？你地要醫好佢呀！」
腦內科醫生：「婆婆，其實跟據經驗，血塊咁大我地都無能為力，何況伯伯年紀咁大，我地好可能連手術都做唔到。」
婆婆：「咩意思呀！佢今朝仲行得走得，而家都仲講到野喎！」
腦內科醫生：「中完風後最危險嘅時期其實唔係而家，係大概兩日之後，個腦因為發炎會漲大，唔少人都捱唔過去。我建議你地最好有心理準備。」
婆婆聽完之後，跌坐左係櫈上面，哭成淚人，望住幾個鐘前仲識行識走嘅伯伯被人推上病房。
第二日，我同朋友一齊去腦內科病房搵伯伯，翻查記錄，伯伯的而且確已經接受緊紓緩治療，生命都已經差不多行到終點。
願佢嘅家人一切安好、節哀順變。
＝＝＝我是分隔線＝＝＝
中風（Stroke）可以大概分為三種，分別為缺血性（Ischaemic Stroke）、失血性（Haemorrhagic Stroke）同埋短暫性腦缺血（Transient Ischaemic Attack，又名TIA）。
故名思義，缺血性中風即係腦血管塞左，「餓死」左腦部組織，係比較常見嘅一種；失血性中風就係腦血管穿左，血塊「壓死」左腦部組織。TIA同缺血性中風差不多，但係栓塞嘅位置好快就通返，腦部組織亦都未有永久損壞，定義係中風徵狀係24小時內自動消除。
中風徵狀有好多好多種，由壞死組織嘅位置定奪。例如運動皮質區（Motor Cortex）中風可做成半邊身癱瘓；腦幹（Brainstem）壞死則可以做成心肺功能停止，或者係影響頭部肌肉運動同埋感覺。醫學生經過多年腦科嘅訓練，學習嘅就係點樣從徵狀上判斷壞死組織嘅位置，亦即係小島學堂某名教授最鐘意講嘅一句「Where Is The Lesion?」。
當然，普羅大眾無可能記清所有中風嘅徵狀，於是醫學界就流傳住一句口訣，幫助大家記住最常見嘅中風徵狀，而呢一個口訣就係「FAST」。
Face，面部肌肉不平衡也。
Arm，單邊肢體無力是也。好多時中風病人一開始都係一邊肢體無力，可以係左手、左手左腳等等，但好少機會係雙腳、雙手、或者左手右腳等等。
Speech，亦即係口齒不清。腦部壞死令到病人不能夠控制面部肌肉，講野自然唔清楚。
Time，唔洗急、最緊要快。中風嘅確診同埋治療一定要夠快。
有說「中風黃金N小時」，係因為如果病人患嘅係缺血性中風，我地係可以用溶血栓嘅藥物或手術將塞左嘅血管打返通佢，但係呢類治療全部都有時間嘅限制（例如溶血藥只可以係中風後大概3至4.5個鐘頭之內打），如果唔係腦部組織就會壞死，血管通黎都無用。而且，呢類治療其實風險都相當高，所以醫生一定要做好檢查先至會開藥。
就係由於有時間限制，大家就要記實呢句FAST口訣，一有懷疑就記得立即求醫啦！
（特別係糖尿病、高膽固醇、高血壓、食煙嘅病人就要加倍留意啦！）
