［新年第一炮］熱烈地彈琴熱烈地唱！新年有乜好得過睇人仆街？我知你班友嘅心態啦。
1. 又真係，其實舊年（2019）咁嘅市，都要輸錢嘅，都真係唔抵可憐的。有咩人輸錢？淡友啦，沽空嘅人啦，唔投資嘅人啦。（記住任志剛名句我嘅演化版—zero position 即係沽空）。仲有就係，買馬來西亞股票咯。
2. 但講返，豪景花園，真係細細個就聽過。實不相瞞細個時，外公外婆原本住石圍角（外公其實我好耐之前寫過下，有機會講，但冇公共性，主要係帶我食西多飲茶走睇不文集咁），外公死後外婆就同埋佢啲女，即係我啲姨媽（*）搬去豪景。所以我成日去。當然亦細細個就知華懋有乜出名。但公平講句，唔介意升得慢，只係住嘅，其實幾抵玩。正係資本市場鐵律：任何垃圾都有個價變到好抵買，再好嘅嘢去到某啲位都係搵笨實。
3. 講返，車位。真係以前寫過。以前寫過更加登峰造極嘅：露營車位（！）（http://bit.ly/2SuzySF）。唔止係騙唔騙局。有朋友話啲露營車位好似係違法的，咁另一回事。但豪景車位當然合法，你買得貴或者買完金融海嘯，唔係叫騙局，怪你唔好彩或眼光太差
4. 在呢度我想再重申一次我嘅理論（當然唔係原創）：門檻低嘅投資，係好易瀨嘢的。數學啲嚟講，個瀨嘢率（或瀨嘢度），同入場門檻，應該有個幾強嘅負相關。
5. 舉例：納米樓啦（其實還好），窩輪啦，劏舖啦，日本山卡啦（例如四國之類）樓啦。車位，更差就露營車位，再差就係電單車位。仲有緬甸樓一劏十啦（http://bit.ly/2ZGsnI2），炒靈位啦，每人夾幾皮做生意啦，之類
6. 我唔知學術上點叫，係咪叫convexity （定concavity？凹凸睇你邊面望啫）。或者叫做 散叫貴過套餐理論，賓度寧，唔知乜。
7. 但背後原因好簡單：如果套餐貴過散叫，咁我咪分開漢堡包薯條可樂三次叫咯。所以唔會成立的。
8. 同樣道理，門檻低嘅嘢，贏面一定係below the line，偏低。因為如果唔係嘅話，有錢人就仆到去買啦，自然就炒到變門檻高。即係威士忌幾舊水玩意變成幾千銀咁咯。
9. 再另一角度睇，再哲學啲，有錢人可以拆細啲錢，買一萬個車位。但你唔可以用你可恥嘅財富泵大一萬倍買佢買嘅嘢。
10. 你要低門檻，因為你窮，咁自然就要畀折讓。
11. 車位仲有一啲獨特嘅問題：首先，有啲根本唔可以畀非業主，但你當然事後先發現。另外，我買間納米樓，可以入去住，可以當炮房，拎嚟做迷你倉都仲得。我買支威士忌，飲咗佢又得，影相鳩威又得
12. （順手提啲黑歷史，呢啲都係當年我炒埃瘋炒月餅甚至炒月餅券（！！）嘅哲學：燶咗咪自己用，自己食，有乜問題？我又唔係買一百盒嘉麟樓。再唔係送禮換個人情都仲得）
13. 我摸頂買個電單車位，除咗賤價租出去，仲有乜選擇？自己半夜訓落去（其實得唔得的？）？定影相鳩威？你話呢？
14. 當然啦，唔使話我知你有個朋友炒車位發達，唔使話我知你炒車位發達。梗係有，有人中六合彩添，有人去葡京發達添。但我講贏面。而我理解，炒車位搵大錢嘅人，就真係一百幾十個咁買，再賣畀人—賣畀咩人？咪呢單新聞主角嘅一類人。
15. 我都識朋友炒車位。即係我班門弄斧講句，咩時侯炒車位？梗係豪宅又升完，到中產屋苑升，到細價樓都升—然後仲有班人係以上嘅嘢都買唔起，或者錯過咗個浪。最後一流咪去到車位，電單車位，靈位。可能好燦爛，但亦係近尾水，甚至爆煲。
16. 我識炒呢啲低門檻資產成功嘅人，不外乎兩個條件。一：本身就相當有錢（你心諗，屌！唔公平。係喎，世界係咁的）。二：快手。一你就冇架啦（我都冇），二你可以學（我就學唔到）。但到啲乜乜KOL都講嘅，就梗係水尾啦，分分鐘佢就係出貨畀你嗰個添。
17. 如果真係資深炒家（任何資產嘅），其實做刁之前，仲會諗一個問題：邊個係你對家？畢菲特定芒格話齋（？），你在賭枱坐低，應該知道邊個係廢柴水魚。如果你坐低十分鐘都唔知嘅，好簡單，嗰個就係你。
18. 最後抄返舊文一段：
19. 雖然股票或各種資產一般長期係升，但贏家永遠係少數嘛。有錢人精甩邊，咁要落嚟個細場同你玩嘅，會係咩人？梗係貪你人數多又夠傻啦。有錢人一單刁等於你幾百幾千單，佣金手續費冇得比。咁嚟到細場嘅，梗係要你口入面嘅錢啦。唔多？唔緊要，人數多咪得。呢度一皮，嗰度一皮，都幾好
20. 如果細場贏面高過大場嘅，你地嘅財富增長得快過大場啦，貧富懸殊收窄咗啦，你有冇見過有咁嘅事？人類嘅歷史就係打仗，同埋收稅。兩者都係財富再分配
21. 如果你係文中嘅苦主，（寫撚完千幾字後）講句唔好意思先。Nothing personal．但亦真心講句，2019咁嘅市況都仲要輸錢，真係檢討下，或者疏遠你嘅理財顧問或經紀。
22. One more thing，啲2019金融回顧同埋2020展望之類陸續有嚟。但我仲要寫埋啲個人啲嘅回顧先。呢篇又係畀你攝住牙先。
＊我老母七姐妹，得一個細佬。而我老母同我老豆又早離婚，我對下有妹，我老豆離婚再娶都係生女，所以我細個係在一堆女人間長大的。呢個亦係本Page名稱由來（望下張海報？）—而我發現係從來冇人知，亦冇人問。最叻頂多有人以為係草蜢嘅節目。
concavity 在 How to determine quantity of concavity? - Mathematics Stack ... 的推薦與評價
I assume, what I meant with quantity of concavity is actually called Curvature. At least that's the keyword, where I found my "quantity" on wikipedia. ... <看更多>