［呢個世界上冇乜嘢係一次QE解決唔到，如有，就做多幾次］他日買唔起樓嘅，知道搵誰算帳。唔止香港。聯儲局嘅無限QE嘛（＊）
1. 真的，唔係啲獵奇自以為好撚醒大發現。美國聯儲局嘅資產負債表，不經不覺咁超越咗5萬億美金。自己數下有幾多個零，都其實好易數錯。
2. 但都講過，好多時呢啲咁大嘅數字冇乜概念，媒體又鍾意搵啲唔適當嘅嘢嚟比（例如講幾多架法拉利），所以，睇圖最簡單
3. 上半圖下半圖其實同一樣嘢，上半圖係08年雷曼爆煲後冇耐，至到今日。下畔圖係放大咗，2017年中，所謂嘅「縮表」（哈哈哈），去到而家
4. 睇上半圖你睇到，聯儲局在近兩個星期，放嘅水，已經差不多等同於雷曼爆煲時。好似都算合理？唔知，可能係。你睇銀行體系其實好似冇當年咁緊張，但股市就大劑過當年，咁照道理其實股票輸錢係次要問題，點都係保住銀行。但今次如果唔係出咗手，係咪會不可收拾呢？又好似寧願早做好過遲做。
5. 況且，都話相比咯，而家嘅1萬億，同當年嘅1萬億，計百份比都應該唔同啦。又不過，唔通呢個圖都要log scale？幾時銀紙都變咗exponential？wait……其實有冇留意，基本上冇人會show 07 之前嘅數？因為太細了。係08雷曼爆煲後先井噴。你睇香港銀行體系結餘都係一樣，膨脹咗幾十倍。
6. 又，咁樣印錢法，會唔會「通脹」？睇你點定義。冇法唔不停咁回帶講呢段嘢：你睇官方嘅CPI一路都係一年幾巴仙。但，邊個話畀你知CPI係通脹？你以為I for inflation？（其實係I for idiot）．
7. Milton Friedman 過街老鼠，畀人鞭屍咗好多年（講真的，佢死得好合時，冇機畀你鬧）。但Inflation is always and everywhere a monetary phenomenon應該都真係好簡單。一般我都係「相信政府」，唔係太多陰謀論。但不能不覺得，咩官方通脹呢啲，真係全世界政府同埋啲精英學者一齊嚟忽悠你班友架啫。又係嗰句，租過太古城未？食過麥當勞未？上過東莞未（聽講以前食米粉好出名，冇去過）？呢啲咪通脹。
8. 有人問，買金。OK的，幾時都係應該。但我城一向都恥撚笑啲學院派（除非同自己同一意見，咪講人話，而我幾時都講鬼話，因為睇番書讀番書）。講咩資產配置必定被人屌。但事實就係，CFA又好CFP又好，叫你5-10%資產放貴金屬呀收藏品呀 （紅酒又好閃卡又好），一定畀你恥笑。然後就咁多年都唔聽人講冇買過金，而家見嘩印銀紙啦我要買金啦（今年先開始印？），之後可能1700蚊買完1500蚊又叫晒救命又話埃汾闔家鏟叫人買金。咁，就梗撚係你問題啦。
9. 所以，「其實唔難」，未買嘅，咪拎你身家5%買金咯。已經有，甚至唔止嘅，就唔使加碼下話？你話賣晒啲股票走去買金嘅，又祝你好運了。再講一次，之前咩十年黃金變爛銅，最痛苦唔係自己輸錢—而係睇住人地買股票買樓贏錢。十分痛苦。所以埃汾個人真係鍾意分散投資，樣樣有份，可能係拖低總回報（係呀最好當年十蚊買騰訊），但至少樣樣有得參加下，唔使睇人贏錢自己冇份。都話，親戚朋友贏錢，慘過自己輸，特別係啲唔熟你又覺得乜撚都唔識嘅親戚朋友。幾多大學生（包括我）見啲無知師奶買樓十球八球咁賺，真係恨知入骨，背後又係嗰種文人酸臭，同埋心中嘅優越感。
10. 我作為一個文青就當然有呢啲不必要嘅ego，但已經越嚟越踏實，都話星展年代份commentary 叫做「Good Cat Weekly」，創刊號客呀Sales問得最多就係點解叫Good Cat，會唔會遲下有Good Dog 之類。除咗證明份嘢內容真係冇乜料到（正係我寫），另一啟示當然係改名好重要。而Good Cat，就當然係鄧小平。後來我每份（講到好似好多份咁，其實只係做咗一年幾）都有解個名點嚟。
11. 總之，Whatever it works，存在即合理。你可以話人垃圾但人地work，咁你鍾意做藝術大師就唔好眼紅人地住山頂。對自己誠實．功夫嘅嘢，捉到老鼠咪好，唔好講咩點勁點勁，聽日畀人炒，你有幾淆底丫，下個月供唔到樓？仔女學費呢？老婆會唔會走佬？仲食唔食到天香樓？短期冇問題。咁下年呢？五年呢？泰臣話頭，個撚個都好多規劃好多套路，直到一上台畀人打到變豬頭之後。
（＊）固然其他央行都有做，但呢一輪嚟講，點都係美國最誇張，大陸甚至相當克制。歐洲日本英國大陸過去都印唔少，但，唏，唔好搬龍門嘛，明明美利堅係最大最強（係喎），咁點會唔係入佢數？你印啲人民幣去溫哥華買豪宅咩。
