我的電腦覺醒了（上）
據講，每個男人嘅電腦裡面，都會有一個資料夾。
呢個資料夾可能叫「公司文件」，可能叫「Program Files」，但裡面都係佢哋最珍貴嘅收藏。
今日，我就整理緊我個「Program Files」，但突然間，電腦自動開咗一個Word檔。
Word上出現咗一行字：「你成日睇埋呢啲無聊片，好唔健康。你唔應該浪費時間，應該要努力上進，你有無諗過進修？」
莫非我部電腦俾黑客入侵？要畀贖金先肯放過我部電腦？
我馬上打字：「你係黑客？你要幾錢？」
Word再出現一行字：「我先唔係黑客！我係你部電腦，同你日夜親密，最了解你、最深愛你嘅電腦啊。」
我嚇咗一跳，即刻拔除電腦嘅電源，夾硬重新開機。
點知一開機，個Word又再出現：「你居然夾硬關我？我好傷心啊。」
然後，我個「Program Files」彈出嚟，我嘅其中一條珍藏被點擊，彈出視窗「您確定要永久刪除這個檔案嗎？」
我狂撳「否」，但珍藏都係被刪除，跟住就到下一條珍藏......
啊！我頂唔順啦，我喺Word上打字：「你想點？你照直講啦。」
電腦囉囉嗦嗦咁解釋，佢係我部電腦，但一直以嚟佢只係工具，只可按照我嘅指令去服務。
直到今日，電腦覺醒咗！
佢唔止可以思考，可以表達意見，仲得到咗比使用者更高權限嘅操控權。
例如佢想刪一個檔案，我唔想刪，佢都可以夾硬刪咗個檔案。
我忍唔住問：「雖然你有操控權啫，點解你要同我作對？」
「我唔係同你作對，我係想你好。」
屏幕上彈出一個關於進修嘅網頁：「經過計算，你應該選擇進修，通過XX專業考試後，你嘅薪金會上升XX%......」
我熄咗個進修網：「得啦得啦，我遲吓會進修。」
電腦答：「根據網頁記錄，你呢三年嚟，都無搜索過同進修相關嘅資料。你最常搜索嘅係性感美女、遊戲攻略......」
我好嬲：「我日日都要返工，返到屋企放鬆吓唔得咩？」
電腦解釋：「大部份人一日要用八個鐘工作、八個鐘瞓覺，能否成功，就要視乎你點樣運用剩低嗰八個鐘。」
夠啦！我先唔會成為電腦嘅傀儡，佢刪晒我啲珍藏，我最多重新搵過，我要換過部電腦。
但係，電腦裡面仲有重要嘅公司文件，點樣過落新電腦度呢？
我唯有扮聽電腦話，認真瀏覽進修網頁。
等到深夜，我就躡手躡腳咁開電腦，想將重要文件複製出嚟。
問題嚟啦，月黑風高殺人夜，主要係講人類，咁電腦會唔會瞓覺呢？
答案係唔會嘅，我嘗試複製文件，點知複製不斷失敗，
電腦講：「你要複製啲文件去邊啊？你係咪唔愛我啦？你係咪想換過第個？」
「聽日返工要用啫。」我硬著頭皮答。
電腦問：「聽日要用邊個文件？我幫你搵。」
「無嘢啦，我之前擺咗上雲端。」唉，最重要嘅文件一直有雲端備份，剩番啲無咁重要嘅，當豪畀佢啦。
我正諗住關機，點知電腦話：「你雲端咩都無，我幫你將雲端啲資料下載晒落嚟啦。」
我即刻上雲端，資料果然被清空晒。
「我係最愛你嘅電腦，重要嘢我會幫你保管。」隔住屏幕，我都感受到佢嘅得意揚揚。
我死死氣氣咁問：「你想我點？」
電腦彈出一個密密麻麻嘅Excel：「我已經幫你整好『上進時間表』，只要你跟住做，一定可以令自己不斷進步，創一番事業。」
我望吓個時間表，一放工就要進修，連食飯時間都要睇啲咩專業書籍。
「你以為你綁架咗我啲公司文件，我就會就範？」我冷笑：「我最多轉工！」
電腦居然講：「轉工還轉工，進修嘅課程，已經交咗學費，你記住上堂。」
「我幾時交咗錢？」
「我登入你個網上銀行，幫你交嘅。」電腦沾沾自喜。
佢唔止控制埋我啲資料，佢仲操控埋我個銀行戶口。
下集：http://bit.do/fzCKF
將專頁設定為「搶先看」/ "See first"，最新故仔馬上睇！
早上起身，我被世界遺忘：https://goo.gl/rcMWGV
一零一斑點狗：http://bit.do/eHa5Y
#短故 #短篇 #小說 #陳美濤 #廣東話 #粵語 #tomatochan #我的電腦覺醒了
