［香港才俊］睇過？俊？邊度俊呀？
1. 同事話我知，利豐私有化。都唔係好意外，問佢幾錢，答我「1個2毫半」。我話咁平，然後睇下而家幾錢，嘩，得返5毫子。（其實之前係4毫，唔知私有化有春江鴨定跟大市今日升上去）。早幾年廿幾蚊架！我唔係講97前海嘯前喎！講2012年咋喎！
2. 係喎，真係冇睇好耐。利豐咋喎，你估金利豐（冇錯係朱太）？冇呃你，金利豐市值大過利豐。而家直頭係一個double！
3. 你估仲係大藍籌，香港之神，未來領袖咩。實情金利豐市值大過利豐，都好一排了。
4. 利豐私有化。我唔會咁老土，又講咩一個時代的終結，雖則真係可以由時代講起。不如講返，埃汾讀大學嘅年代。
5. 埃汾讀大學，係好摺的。主要都係補習，溝女（唔補習邊有錢溝女），性交（溝女唔性交溝嚟做乜），睇下書睇下戲，上下網咁。當時呢，雖則讀精算，但我對金融市場係完全冇認識嘅（是真的），我當時都日日睇報紙，但好似係唔睇金融版的。死未。
6. 想講係，埃汾大學年代，剛係回歸之後。好記得，有一排搞啲咩無聊論壇，定咩領袖對話。班友我都唔係好識，好彩有得google．
7. 當其時嘅「香港領袖」，係乜人？有咩人有江湖地位？我話你知，當時有咩人
8. 有，新鴻基地產嘅郭氏三兄弟。我唔記得三個都有定點，但就肯定有「麥當勞叔叔」郭炳江（＊）。咁而家係點，不用講啦？
9. 仲有，李國章。咁其實，還好啦可？多年後估唔到佢變咗校長。
10. 而即係，做文化嘅何志平，都係黑馬。話時話，就快放出嚟啦喎，時間過得好快的—你在監外面的話
11. 當然仲有，唔係最有錢，但最撚巴閉嘅，馮國經（唔記得係定有埋另一個）
12. 而你睇下，呢班所謂嘅英殖精英，係咩貨色，係幾不堪一擊？廿年唔夠，變成點？
13. 真的，嗰個年代，主要都仲係睇商家（老董做特首嘛），公務員貪曾呢啲後來先冒出嚟。而馮國經，講有錢唔及郭氏三兄弟，但，正係個銅臭味冇咁重。喂，哈佛喎！哈佛喎！唔撚止係讀哈佛，係教哈佛喎！
14. 你恥笑話商家治港唔掂，公務員唔掂，紅人（你懂的）又唔掂，話搵學者嘅。邊位教過哈佛？馮國經就教過。利豐亦係哈佛嘅傳奇案例（之一）。
15. 利豐，廿幾蚊跌到5毫子。但馮國經當時係香港經營之神，人人爭住打飛機嘅榜樣。
16. 利豐之死，大把人講點解，其實係必然，都未必關馮國經事。簡單嚟講，利豐做乜呢？好聽啲就供應鏈ＸＸ，但核心，兩個字，「買辦」。
17. 無數咁多人寫過，香港文化係就係買辦文化，而我話利豐文化就係買辦文化，所以香港文化就係利豐文化。三為一體，同聖父聖子聖靈嘅嘉誠澤楷澤鉅一樣。
18. 問題嚟啦，借嚟嘅地方，借嚟嘅時間。Who still needs Hong Kong？係某雜誌N年前問嘅。結果香港，某程度上都成功轉型（當然未必係向一個你鍾意嘅方血轉），大陸佬話齋，未必需要香港人，但需要香港。你睇把口就鬧香港，但咪又係爭住嚟，對不？
19. 香港有得轉型，但，Who still needs Li & Fung？其實去到有間叫阿里巴巴嘅公司出現，已經極多人問呢個問題。當然唔係阿里巴巴殺咗利豐，阿里巴巴只係嗰個時代嘅產物。而係科技咁發展，中國又強大（即使你唔同意或唔鍾意）起嚟，仲有冇必要有，well，「買辦」？
20. 當然，呢個世界都係跟紅頂白，勁嗰時，2000億市值，你咪香港之神。而家市值係金利豐一半，你咪係廢老。係咁架啦
21. 不過，想fact check返嘅係，利豐其實唔係在金融海嘯中一沉不起。正好相反，海嘯後佢食住個勢，股價係再創歷史新高的。真正出事，係2011年開始，你可以搵個股價圖睇下，就知咩係一浪低過一浪。
22. 本來，我地啲做金融嘅，最大忌就係指手劃腳教人做生意。但都係冇計，股價就係一切，20蚊跌到5毫子嘅公司，係真係你講乜都冇人理你，甚至當反面教材的
23. 真的，半年前左右，利豐都仲講「貿戰締廿年最大機遇」（https://bit.ly/3bhm8ix），但已經冇人理佢了。而早兩年，都仲講「利豐趕科技快車 創「未來供應鏈」」（https://bit.ly/2xf4SMc）。2018年啦喎，仲趕快車？架車開撚到粉嶺了。當時我已經話，由貴公司講真係冇乜說服力，不如柯達諾基亞講。打後利豐股價再跌一半，反而都冇乜特別，呢期唔少公司高位都插咗一半。
24. 再落井下石講利豐嘅經營模式，冇乜意思。不過都係想講，你估人地自己唔知咩，但轉型咁易，就唔會年年咁多公司死啦。N咁多人都係高估自己能力，低估創業輸仆街嘅可能。只係睇到人地英超球員晚晚扑靚女，唔望下自己個肚腩。個個以為「換著我係柯達」「換著我係諾基亞」就點點點。換著你係美斯就左腳控定右腳一cup一個假動作再呃過一個射返遠柱丫嘛。明喎，球王都不外如是。
25. 不過想講，利豐呢，其實個食相都係幾難睇嘅。低價私有化唔係一個問題（邊個會高價同你私有化？同你有親？瑞士山區肺大股東搵夠想益你？）。但，之前其實利豐而家慢慢將啲資產拆晒出嚟。用我朋友嗰句（原文照錄），「咁撚多年都話轉型，使撚晒公司D錢，拆撚晒賣撚晒，得返棉骨先來私有化」（＊＊）
26. 但，唔掂嘅又點止馮國經？頭先我講咗堆香港領袖，李國章算還好，其他郭氏三兄弟，何志平，最後點？但而家我地就倒後鏡抽水啫，當年呢啲真係精英嚟架喎。
27. 所以事實就係，當年啲所謂精英，根本就華而不實，不堪一擊。就算嗰時勁都好，打後咁多年都係食老本，甚至自己都呃撚埋自己。有冇睇「乜代宗師」？香港掂？可能第一代嗰堆係掂嘅，但打後嘅，根本全部都係搵笨實，最慘係自己都呃埋，一代呃一代。
28. 唔信？畀多間丫。地產商係勁，但太銅臭，其實好多時學院派都當係rent seeking（＊＊＊），拎出嚟叫大家學，一來都難學（那有錢呀你老母），二來都唔多馨香。所以其實大家推崇啲實業家，拿，馮國經就係經營之神啦（雖然多得佢祖先）。
29. 仲有咩公司畀人覺得係經營之神？有冇聽過有個名詞叫「十年股」？可以渣十年嘅股票（＊＊＊＊）。除咗利豐畀人吹捧過，仲有乜？
30. 仲有，思捷，三SPRIT，不用多講啦下。刑李原又係另一經典例子。不過佢仲勁。幾蚊搞到上一百蚊，都其實唔難—我梗係唔得，但唔少人都得—難在甩身，佢可以一路減持，而啲股價唔即冧，到佢甩晒身先冧，呢啲就功力啦。有機會講
31. 利豐，三SPRIT，仲有乜香港企業代表？我只係諗到141。
32. 再諗遠啲，其實141個frd，341都仲算係。大家樂。但，始終真係唔同呀大佬。開間快餐店，再勁都好，同富四代哈佛教授哈化教材企業全球供應鏈乜乜，或者白手興家去到歐洲遍地開化潮牌仲食埋林青霞，真係唔係好同。所以冇人會叫陳裕光或者姓羅嘅做經營之神
33. 再遠啲？341個朋友，345，維他奶都仲勉強算係。但一樣，冇咁型咯。而反正341 345家族都有淵源。
34. 另外仲睇唔睇到共通點？利豐同三SPRIT，都係步向全球嘅。咪領嘢。反而大家樂維他奶，基本上都仲係香港，頂多少少大陸（其實好多時不出華南）。畀你見到，嗰時啲咩環球領袖，香港仔精神，全世界乜乜，假象嚟嘅。
35. 所以相比之下，仲有最後一間香港嘅代表公司，其實真係都不錯。邊間？梗係因航啦。真的，我見啲人日屌夜屌，但有冇諗過航空公司幾咁難做？未查，但呢浸國泰嘅股價，應該跑贏全球9成同業。你話高位股價都差不多跌一半？咁你睇下利豐同三SPRIT？不過，因航其實，就係英國公司啦下。陳南祿都係打工仔啫，唔係馮國經，未來領袖。
37. 最後賣多次廣告，收費文章今日仲有最後一篇試閱。睇啱可以之後課金支持，都有一定數量嘅人訂咗，暫時我都滿意。詳情睇最底嘅「版務」
（＊）埃汾有面盲，其實到而家我都未識分郭炳ＸＹＺ，主要係囡囡話我知，佢正係做過新鴻基。
（＊＊）BTW，呢位朋友係女仔，仲係人妻人母，個樣幾賢良淑德的。我成日話同佢合作搞個粗口財經台，大家有冇興趣？
（＊＊＊）唔係搵間屋返嚟租畀人就叫rent seeking，呢個字有時有啲難解，有機會解下。但正如「左膠」一樣，凡我反對嘅就係左膠，所以但凡話人地嘅行業不事生產對社會冇貢獻，都可以話人rent seeking。
（＊＊＊＊）其實，應該係rent seeking 嘅股票先好渣十年。例如港交所
——————————————————————————
版務：會同homeblogger 合作推出新專欄《事先張揚》
逢星期一，三，五推出。會講港股美股市況分析。就唔會係無聊吹水嘢了。
專欄已推出，呢條link登記咗有70% off．
https://forms.gle/izsucvQbbTZbGYCj8
登記咗絶對唔使畀錢住，先會有三篇試閱，畀你知道到底係咩回事，睇覺啱睇先科水。十分均真。
已科水嘅大感謝！應該已收到文，滿意吧？
亦不用擔心，呢星期個三篇唔計，再下星期先起錶計你睇一季。
google 廣告收費 香港 在 Facebook 廣告VS Google 關鍵字廣告。那個適合我？(為什麼？) 的推薦與評價
石：Adwords 是按點擊收費(CPC) 。 即你的廣告在Google 出現了，但冇人點擊，也不會收費。視乎你的關鍵字是否熱門，高搜尋量的字，要出價較高價錢才能排名較高。 ... <看更多>