［是日發財大計］加個液精體顯示，成件事就high tech晒，賣貴幾十倍！
TLDR：「數碼」驗孕棒，賣貴幾十倍，其實就係用返low tech驗孕紙，不過加個display話你知有冇中獎。真係冇誠意，至少都識發聲先係嘛。或者會識去通知經手人。
BBC 原文：The surprising secret hidden in a pregnancy test（https://bityl.co/3Tkx）。係喎，BBC我都睇的。除咗要睇得多，仲要睇得快。但睇得多自然睇得快。
1. 人生除咗金融，仲有好多嘢好有意義好過癮嘅。例如繁殖下一代（特別係個過程）。唔過癮就唔會有你同我啦，對不？
2. 周末輕鬆啲，睇呢啲。不過驗孕呢啲嘢，搞錯咗就可大可小，都係小心啲好。
3. 埃汾就肯定唔係專家，照計女讀者一定清楚過我。男讀者嘛？我估十居其九都唔識，除非係醫生，或者播落好多種。
4. 驗孕棒，或紙，我就真係唔熟。唯一見過就係睇戲，或者睇漫畫（有集金田一用呢個做主題！）。咩一條線定兩條線之類，唔識。有錯請諒
5. 但，話說家陣外國（唔知香港興唔興？）有「數碼驗孕棒」？咩東西？幸好唔係「智能驗孕棒」或者「大數據驗孕棒」（開個Excel儲起佢），「雲端驗孕棒」（放上Dropbox通知經手人）甚至「區塊鏈驗孕棒」（屙咗落去冇得改掛）。
6. 「數碼驗孕棒」是甚麼東西？就係圖中呢支嘢。價值7蚊美金，兩支。一支25蚊港紙左右，當然係不能循環使用啦（唔得架？）。有啲貴啲嘅牌子，賣到成舊水港紙一支。而聽聞傳統嘅非數碼low tech驗孕紙，應該兩蚊港紙搞掂。
7. 咁但，當然有人玩開箱文，仲係男人（！）（其實冇講明係男人，但我估係）。但佢冇屙落去（佢話），只係淋水，同埋拆開嚟睇下！（成個開箱文詳情可睇https://bityl.co/3Tlg）
8. 拆開，發現係乜？哈哈，基本上就係low tech驗孕紙！再加堆LED（發光二極管，簡單嘢，你見啲指示燈嘅紅色就係，用嚟照明都得）同Photodetector（光敏電阻之類？）。用嚟做乜？就用嚟讀下張low tech驗孕紙係一條線定兩條線。應該係如果有條線就會阻咗光，之類。
9. 然後？再加個LCD（液晶體顯示器，可惜唔係精液體顯示器），顯示畀你睇，有咗，定冇（英文啦，不過照計中文都唔難）。
10. 係咪十分低能呢！
11. 聽聞入面仲有粒IC（集成電路，亦即係晶片，芯片），Holtek HT48C06（唔知係乜），8-bit microcontroller. 64 bytes of RAM（唔識，照抄），唔係流嘢嚟架！勁過元祖IBM PC，不過你就在上面屙篤尿然後掉走，so sad．但反正，求其一部早期嘅智能電話（埃瘋科或快乎之類），運算功能都係當年NASA阿波羅11號登月部電腦幾千倍了。而你拎嚟玩Candy Crush或者當鬧鐘
12. 但，完全唔知塊晶片係用嚟做乜的。咁當然，仲要有電池啦，唔係水力發電。
13. 結論？咪就係why bother，扮high tech，根本個核心技術（！）就係同個幾兩蚊low tech驗孕紙一樣。買一支high tech嘢，夠你用low tech驗孕紙驗幾十次，仲唔使生產咁多電子垃圾。
14. 埃汾感想？呢個年代，咁呃人唔得嘅，硬件實畀人拆開。即係你話銀行搵條友縮在櫃員機入面都仲得啫，因為人地冇得拎你部機返屋企拆。但賣畀零售客嘅，實畀人拆開睇。其實以前都會，但以前資訊唔流通咁解。即係你咩智能咖啡機都係，如果係縮條女在入面（鄭融？）沖嘅，你Demo都仲呃到人，但賣出街實死啦
15. 所以，雖則我唔識，但呃人都係整software好啲。啲乜鬼大數據機器學習AI，你唔公開個梳屎code，應該可以呃一段時間掛？冇咁快reverse engineer 到？
16. 不過，都係有啲人仲係覺得「數碼嘢」令佢安心啲。話傳統驗孕紙條線，唔同人可能睇到唔同結果喎（埃汾按：舍利子咩）。有啲人可能見到條線，有人話唔係，咁喎。有個LCD Display安心啲，pregnant or not pregnant，如是我聞。畀多一百幾十買個安心都好喎。再一次見到，tech人嘅諗法，同真正用家又未必一樣
16.5 但開箱男反駁，我都同意。其實只係個精液體顯示，畀啲假嘅安全感你。你肉眼會睇錯，唔通入面堆cheap雞 photo senor 就唔會錯咩！好平架咋
17. 同場加映，其實數碼驗孕棒，入面仲有粒藥丸狀嘅東西—有人以為係事後丸！（https://bityl.co/3To7）．大佬，防潮珠嚟的……唔食得的說（＊）．防止個電路板受潮生鏽的
（＊）不過埃汾有一鑊食日本飛驒牛莎樂美腸，將包防潮鐵粉當係山椒粉咁落，仲食咗大半包先起疑問埃汾太「」，「做乜山椒粉變咗黑椒粉，啲味都唔多同，冇乜山椒味，呃錢？」。結果第日啲大便都唔同色。咩啫！點撚會將包鐵粉整到好似調味料咁架！我以為係山椒變咗黑椒！
支持埃汾食更多山椒粉，請訂Patreon ：https://bit.ly/31QmYj7
———————————————————
Ivan Patreon 狼耳街華人，一星期至少三篇港美市場評點，一個月一舊水唔使，開張一個月已500人訂！仲有兩篇免費試睇：https://bit.ly/31QmYj7
——————————————————————————
［收費短片第九擊］美股科技股是否泡沫爆破？價值投資之選
課程資訊：https://homebloggerhk.com/course_detail/?code=CC009
內容:
*美股急跌點算好
*科技股係咪泡沫爆煲？
*有乜價值投資之選？
本星期內特惠售價: $80
課程編號：CC009
觀看期限：首次播放後一星期及限每影片４次
客服whatsapp: 63832145
另外想買返第八擊（美國總統大選股票部署）都仲可以：https://bityl.co/3NPn
