【地產商「投資失敗」都有安慰獎收?】
上星期五政府宣布從新鴻基及新世界等手中收回3塊新界地，包括元朗YOHO Midtown旁核心地段，興建公共房屋。
睇落好似政府重手出擊「打地主」（連YOHO MidTown 旁黃金地段都收！），「重創」地產商發展大計，起公屋拯救水深火熱嘅基層市民？事情當然冇咁簡單。
呢3塊地，其實已經係政府兩年前表示會收嘅10塊地當中嘅3塊，並唔係新嘢。但現在不單止係拖延咗兩年，仲要得返一半都無。林鄭當時高調喺施政報告公佈計劃時嘅「全力以赴」增加公屋供應嘅精神，已經燃燒殆盡。
更加嚴重嘅係，南華早報剛剛揭發，原來呢3塊地似乎係地產商眼中發展唔到嘅「豬頭骨」地，對於地產商「可有可無」，政府主動收地仲可以幫手收拾殘局。
▍發展商收唔到「祖堂地」始「同意」政府收地
南華早報引述新鴻基發言人【註2】，承認原來位於YOHO Town 旁、5400平方米嘅地段之所以丟空多年，係因為當中夾雜「祖堂地」。「祖堂地」出售門檻高，似乎新鴻基無法收購餘下地段發展，而手持地段亦不足以發展私樓，結果土地丟空多年。所以對於地產商來講，呢啲土地已經係冇價值既「豬頭骨」，直接啲講就係投資失敗。政府現在出手收購土地，仲可以獲$2000萬收地賠償（公帑支付），好過渣都無，猶如安慰獎。
▍另有3塊土地因地主提出發展申請放棄收地
值得注意嘅係，輿論集中喺被收嘅個3塊地，往往很容易忽略為何事過2年，仍然有7塊地收唔到。政府喺一份新聞公報【註3】簡單交代咗個7塊土地嘅情況，但唔肯提供完整資料。當中3塊政府已表示放棄收回，即係公屋供應又少咗一截啦。
究竟點解？原來係因為個3塊地嘅地主，係林鄭2年前宣布收地之後，提交咗地契修訂／換地申請（即發展申請），但個3塊地位置在哪裡、地主是誰就因為「商業敏感性」而不公開，公屋供應變相比地主（發展商？）搶走咗。
奇就奇在，點解過去2年公眾一直唔知呢幾塊土地係邊度，到今日都唔肯講，但呢3塊地嘅地主竟然會識係呢2年期間提交發展申請，卡住整個收地過程？一塊地係咁仲可以話咁啱得咁橋，但3塊地同時係咁，「撞彩」嘅機會甚低。
▍唔公佈放棄收地詳情 引官商勾結嫌疑
所以，呢3塊避過收地一劫嘅土地嘅業主係邊個、位置係邊，係關鍵所在。如果相關土地不牽涉「祖堂地」，或原來又係某幾個大發展商持有，即代表呢啲避過收地一劫嘅土地，其實係發展商眼中嘅真正「靚地」(否則亦唔會提交換地申請同修改地契，準備發展）。
政府拒絕公佈呢幾塊避過收地嘅地塊嘅詳情，咁自不然會惹起公眾質疑，政府今次「十塊收三塊」嘅決定，係咪為某啲發展商度身訂造，令發展商既可以獲公帑包底，交出「豬頭骨」地、亦可以「保住」靚地自己起私樓，同時政府又可以獲得掌聲（被鬧咁耐終於肯收發展商嘅地！）嘅「三贏方案」，如果屬實，簡直係一場精心策劃嘅PR stunt。
要強調一點，根據《收回土地條例》，行政上地主並無「反對機制」，而且收地無理由可以拖兩年，甚至預先係放風，留有空間俾地主「做嘢」、同政府討價還價，或提交發展申請，卡住整個收地過程。
政府應立刻公佈被「放生」地段位置在哪，以釋除公眾疑慮，否則不要怪市民質疑是次選擇性收地，其實真係官商勾結。
#收回土地條例
#疑似打地主
【註1】
發展局 局長隨筆 2019年10月20日 善用公權收回土地 發展公營房屋
／／我們會檢視那些規劃上可作綜合發展區或住宅（甲類）發展，而地積比率比較高（一般而言，市區為7.5倍或以上，新界為5倍或以上）、現有構築物比較低矮（如只有幾層樓高），但有關業主**未有確切發展計劃的土地**。現時資料顯示，約有10組地塊符合這些條件。
https://bit.ly/2SYHdub
【註2】South China Morning Post. 14 May 2021. Major Hong Kong developer to release land for public housing, day after government says it will seize lots left idle for decades
https://bit.ly/33T388l
【註3】香港特别行政區政府 新聞公報 2021年5月13日 收回位於粉嶺及元朗的三組地塊
https://www.info.gov.hk/gia/general/202105/13/P2021051300383.htm
▍延伸閱讀
明報 2018年6月15日 改土歸流：下落不明的《收回土地條例》 https://bit.ly/3wbl7mr
蘋果日報 2021年5月14日 發展局收私人地建公營房屋 元龍街用地曾擬建400多私人住宅單位
https://bit.ly/3eT2uOe
----
🙆♀️研究到底 月捐支持民間研究工作
https://liber-research.com/support-us/
🌪FPS ID：5390547
🎩 HSBC PayMe 捐款支持：https://bit.ly/32aoOMn
👣 Follow Us: https://linktr.ee/liberresearch
idle town 在 【翻譯】Conan Gray - Idle Town | 英繁中字 - YouTube 的推薦與評價
【翻譯】Conan Gray - Idle Town | 英繁中字. Shelly. Shelly. 2.7K subscribers. Subscribe. 54. I like this. I dislike this. ... <看更多>