Johnny Depp 近年捲入家暴傳聞，佢早前就控告英國太陽報嘅報導失實，不過最終都係敗訴，前妻 Amber Heard 向法庭提供家暴證據，而法官就認為太陽報嘅內容大致屬實，Johnny Depp 律師團就決定上訴。
敗訴令 Johnny Depp 事業再受影響，佢今日出 post，指佢有份演出嘅電影《Fantastic Beasts》（怪獸與牠們的產地）片商華納兄弟要求佢辭演巫師 Gellert Grindelwald 一角，考慮後 Johnny 無奈接受，佢亦留言指喺呢段艱難日子入面，見到影迷支持佢嘅留言，覺得好感動。
得知消息後，超過10萬影迷留言比 Johnny 支持佢，以 hashtag #JusticeForJohnnyDepp 力撐，部分更揚言會罷睇佢前妻有份演嘅《Aquaman》（水行俠）等。
Johnny Depp 最後指會堅持上訴，相信有一日會俾大家知道家暴指控係假嘅，亦表示佢嘅人生同事業，都唔會俾呢啲假指控所影響同定義。除咗英國呢單官司，Johnny 亦喺美國控告前妻 Amber Heard，目前尚在處理。
