寫埋呢篇，真係訓啦
多得美劇呢個Winter Break，等我可以慢慢咁追到最新一集《How to get away with Murder》。追咗一季半嘅感想係：最初喜出望外，之後半點失望，而家尚在觀望。
喜出望外，當然係因為《How to get away with Murder》當初果種破格設定：第一集果種跳躍式嘅剪接手法，竟然令我執著於一定要明白哂所有劇情嘅人，響連睇兩次都宣佈放棄。其實美劇一直吸引我嘅原因，係因為相比起港劇日劇都要黎得資訊滿載，完全唔會有冷場一刻，《Las Vegas》同第一季《Prison Break》都可以話係當中表表者；但《How》響呢方面，特別係第一季可以話更上一層樓：觀眾唔單止係要接收資訊，甚至乎係要幫手重組埋劇情──雖然隨住每新一集將會揭露更多資訊，令你愈來愈清楚發生咩事，不過就好似睇推理小說一樣，總想響佢全部公開前一刻知道個來龍去脈係點，基本上第一季嘅每一集都可以話係腦力衝擊。
另一個喜出望外嘅地方，係《HOW》開宗明義就是走離經叛道的路線：教你How to get away with Murder喎，仲唔夠邪道？而且劇入面最初又真係專係幫D十惡不赦嘅壞人脫罪──雖然佢地好多都真係無罪，你仍然會不期然去諗，當一個人衰到咁嘅地步，其實屈佢坐監會唔會仲好D？不過Professor Annalise Keating一貫嘅原則都係：「只要我接得呢單官司，我就有責任打甩佢」，用不擇手段方式為惡人辯護表面上睇黎無可能嘅官司，集合咁多矛盾之下，果種劇力就好自然咁爆出來。仲有一樣唔講唔得嘅係，編劇為咗要突顯呢套嘅峰迴路轉，總會響第七八集整一個比起過往爆點都仲要更爆嘅超爆點，等你永遠唔會有「開始悶悶地」呢種感覺。
講到咁勁，點解之後會有半點失望呢？咁當然係同好多美劇一樣，去到第二季就開始走樣。其實第一季季尾經已出現一個問題，就係最初果條伏線，因為每新一集都會響原有嘅「碎片」之中加入新嘅線索，變相就係令觀眾不停翻睇再翻睇，咁你可以想像得到只會愈來愈悶，但最悶果刻，就係真真正正揭開謎底果刻──因為佢真係由頭到尾再做多一次比你睇！
咁本來第一季一來比較有新鮮感，二來個SETTING始終好吸引，都仲可以忍你，但係去到第二季你又再將呢個SETTING再復製多一次，尤其是單案嘅吸引力比起之前已相差好遠，就算你製作一樣嚴謹，感覺上都係一種跌WATT。
第二個問題係劇情「真情」化。Annalise Keating呢個角色其實設計得好好：表面上好Tough、實際上有柔弱一面，但始終靠佢倔強嘅性格死頂落去。問題係去到第一季中後開始，佢慢慢將一班手下同學生當哂做仔女，每當佢地出事就必定出手保護，但班後生又唔係好領佢情。於是成套劇嘅主線就開始變得婆婆媽媽，呢個唔高興安撫完就到果個出事，然後「好姨」就要頻頻撲撲走去救火。尤其係而家最新劇情發展，雖然之前都有舖排少少，但真係超級「真情」橋，跟住我好自然就會諗：我睇你，就係唔想睇TBB D婆媽嘢，然後你又做多次我睇，咁我睇你做乜……另外一點就係原先果種「為歹徒脫罪」嘅主旨亦變咗質，Annalise Keating團隊開始愈來愈講良心正義，甚至不惜出賣委託人，過往果種「反叛」味道就只剩番果式果樣嘅床戲表達出黎，可惜我又唔係咁好……
咁但係點解又唔係對佢完全失望，而係尚在觀望呢？首先《How》有兩樣嘢係由頭到尾始終無變嘅，一係爽快嘅剪接（雖然而家配上婆媽的劇情），二就係精湛嘅演技。
飾演Annalise Keating嘅Viola Davis拍完第一季就攞咗艾美獎演技自然毋庸置疑，難得嘅係一眾年輕演員發揮都非常之好：Alfred Enoch、Jack Falahee、 Aja Naomi King、Karla Souza四個都各自演得出自己角色嘅心態轉變同心靈弱點，尤其係Alfred Enoch由最初初生之犢一直演到一轉而成婆媽嘅廢男形象，真係完全切合倒成套戲果個風格（雖然咁SET係唔好睇，但劇本係咁設定，無計）。就算再次一級嘅Matt McGorry演出果種毒撚味亦係無得頂。（其實佢真人好型架，偽毒可恥）
但我最欣賞嘅，都仲係飾演Bonnie嘅Liza Weil，雖然平時劇情佢通常都係扮到木口木面，但一到佢同Viola Davis撞埋演果幾幕衝突戲，簡直係堪稱經典，睇到我拍爛手掌。只要呢個班底唔會有太大變化，就算劇本跌Watt，我仍然相信《How to get away with Murder》會有相當可觀性。
最後點解我前面提咗咁多角色，但偏偏配圖係第二季先出現嘅配角Catherine Hapstall呢？因為呢個角色咁似一個人，竟然係完全無人談及，而佢入面講咗一句對白，更加係同現實嘅「佢」出奇巧合。不過為咗廢事比當事人追問，我特登將呢段嘢擺到最後，真係睇倒我先同佢講句對白係乜啦，科科。
karla souza 在 Karla Souza talks about season 2 of ABC's 'Home Economics ... 的推薦與評價
... <看更多>