［歐洲股市］Spot the odd one out
FT的圖，篇文其實係講英國脫歐，諗下會唔會可以維持歐盟—瑞士嘅關係模式（https://on.ft.com/32rLiHE Will London be Berned like the Swiss?） 。但我只係想講張圖
歐洲最大嘅股市，計唔計俄羅斯🇷🇺都冇關，因為唔上榜。係每日平均成交，但望過計市值都差不多，留意市值係該交易所所有公司，唔係間「交易所」本身。即係388就3000億市值，香港股市就300,000億市值嘅分別
英國🇬🇧最大唔奇，英國並唔係歐洲最多人口（明顯），亦唔係最大經濟體系（你以為係？）。但因為係全球金融中心，金融業特別發達，亦都好多跨國企業上市。市值當然最大。亦所以英國股市唔代表英國經濟（你以為係？），正如美國股市不代表美國經濟（你以為係？），香港股市不代表香港經濟（你以為係？）。但在此context 下，日本韓國股市就真係代表日本韓國經濟。
德國🇩🇪第二，不用多講。歐洲最大經濟體，兼最多人口（不計俄羅斯，又，好快土耳其🇹🇷過頭，如果你當歐洲。土耳其仲係北約美國外第二大軍力，膽正命平，所以你見又獨裁又乜都冇人敢搞）。
法國🇫🇷作為三哥亦係好易估到。
四五係小國，但瑞士🇨🇭又係金融中心，亦都多跨國企業上市。荷蘭🇳🇱不太算金融中心，但都有唔少跨國公司，經濟體系亦唔細。
第六名就過癮啦，居然係西班牙🇪🇸馬交所。即使以歐洲標準，馬德里/巴塞羅那都並非金融中心，亦都冇乜跨國公司（Inditex嘅Zara當然都賣全世界，但我講係 Shell，雀巢或者聯合利華之類真係「冇祖國」嘅公司）
有乜唔妥？一路個講法係歐洲迫科（你要迫快乎都得但冇乜人講），英德法⋯⋯仲有就梗係唔係西班牙。歐洲頭四，計經濟體系計人口，都係嗰四大，冇西班牙份。正如最早嘅七大/八大工業國 G7 G8，都係迫科，西班牙冇份。G20都冇西班牙。
咩話？你上個月見到西班牙首相同侵侵傾計？哦，西班牙拎外卡啫。係guest。
係好多guest，但其他東盟非洲盟係輪流揸莊，今年尼日利亞下年尼日爾（just saying ，又，非洲咁多國家，好多輪到2047都未到）。不過其實關係不大，因為係以個會嘅身份，唔係你國家嘅身份出席。但西班牙就年年外卡永久嘉賓，唔知咩玩法。好似長期散工咁。
而除非世界大戰，否則可見將來都好難見西班牙上返G20。後面一堆泰國伊朗埃及尼日利亞（台灣就⋯⋯你懂的）。根本G20呢樣嘢就係因為去到千禧年前後，大家發現你不能再無視中國印度巴西印尼東盟非洲之類，到金融海嘯後正式成功「奪權」。你講全球央行救市講排放，唔搵中國印度搵西班牙咩！所以西班牙都有自知之明，官方取態係唔要求入G20，但求保住個永久外卡。有得睇就夠。（而其實計經濟規模西班牙暫時都仲入到頭20，但又係歷史原因了，迫科冇佢份就G7G8冇佢份，所以G20又冇）
講咗咁耐，缺席嘅，你估到啦。登登登，當然係歐洲小強意大利。明明就係迫科，爛船都有三斤釘，衰咗咁多年，其實仲係歐洲迫科，亦係G7 G8 G20。但股市就特別不振。原因嘛，我都唔知。地下經濟特別活躍掛（咪講笑，黑社會度度有，但好似黑手黨咁大規模仲要行埋老正嘅實在唔係咁多，黑手黨唔止奸淫攎掠賣老翻，仲倒埋垃圾賣埋蕃茄出埋陳醋賣全世界，最新搞作係做埋潮童玩Supreme Italia，即使日本嘅暴力團都唔係嗰回事）
