2021.2.24 【《Soul》（靈魂奇遇記）】
每次睇Pixar動畫電影都會被感動，今次都唔例外。
........... 馬上劇透雷線 ...........
每當投入靈魂就會出竅，渾然忘我，感覺美妙。作為畫畫人，對於Jazz樂手對夢想嘅追求特別有共鳴，回想自己正是一個「夢想實現之後，發現不外如是，活晌呢個世界仲有咩意義？」嘅迷失靈魂，到底咩係人生的意義？繼續去追求想要嘅嘢？搵令自己sparkle嘅事物？原來，人生深刻嘅Moment，往往只係最愛嘅人相伴、一個微笑、一口美味、走一段路，甚至係一片落葉一塊種子，最單純微小嘅小事情，組成咗豐盛嘅人生。
Treasure every moment活在當下，感受對人與萬事萬物嘅關係而不戀棧執著，就係降生於物質世界為人的最大意義了。好老土，真諦嘅嘢就係咁老土啦～
思想無邊界，而現實充滿限制。靈魂來到凡間轉生為人，就係為咗要體驗物質世界嘅局限，只要晌限制當中活出豐盛，就係合格畢業嘅人生了。豐盛不單只係開心喜樂、獲得圓滿，豐盛更加係體驗困難疾苦、錯過缺失。點解我哋每一次投胎，都要飲過孟婆茶忘卻前生，就係因為要再一次以不同嘅背景設定同個性去經歷每一次新生世，玩夠了受夠了得道了修成了，就會心甘情願進入那道白光之「本源」，像一滴水回歸大海，自我消失成為「合一」。
記得當年有套《師父，明白了》，其實就係咁簡單，無論咩大師，講緊嘅都係呢樣嘢之嘛。
生生世世，兜兜轉轉，最後只為咗一句——「嗯，原來如此，明白了。」
～
同過往嘅Pixar作品一樣，Soul嘅Design elements運用得照樣出色，設計界大忌嘅彩虹七色🌈其實晌New Age界代表咗脈輪七色，可愛嘅靈魂晌Character design上就輕巧融入咗彩虹嘅顏色，彷如太陽白光折射出彩虹七色，靈魂世界嘅本源白光折射出虛幻嘅虹光靈魂，藍藍紫紫正是Third Eye同Crown Chakra嘅代表顏色。
靈界Jerry和Terry係高次元嘅上師們，甚至靈界中甚有「穿越次元」意味嘅空間轉移，都係以最基本嘅「線條」設計元素去勾畫表達，亦代表層次愈高，愈回歸基本。
相信Pixar講得嘅一定係普羅大眾會有共鳴嘅故事，好開心原來可以去到呢個層次，距離全人類意識嘅揚升之日應該唔遠吧⋯⋯
#soul #靈魂奇遇記
#靛繪 #靛 #doodle #sketch #draft #cg #illustration #painting #drawing #digitalart #digitalartist
