上次嶠媽去青衣城玩，就發現到原來已經擴展到去2期，但因為上次趕時間，行都冇行過2期我就走左。今日咁凍，諗唔到去邊，就突發期想，約埋芊嶠表妹和姨姨，向青衣城2期出發！
我地搭巴士係長安巴士站落車，行去都唔遠！一入到去，覺得好正嘅係有匯豐銀行櫃員機，啱哂嶠媽，要禁左錢先！之後已經見到有超市、McDonald、仲有大家樂等等嘅食肆，仲有間髮型屋添🤭🤭咁之但係，出到黎，梗係要食啲特別啲嘅食物啦！
嘩，青衣城2期得三層，以為好細？其實唔細！商場入面有好多間食肆，Pizza Express、元氣壽司、OS Plus、南小館等等，可以話想食咩菜都搵到🙈🙈但最後嶠媽選左Mee，哩間舖係馬來喇沙、海南雞專門店，我同阿妹都選左海南雞飯來食，一個餐$7x，仲有埋餐飲同甜品，最緊要係有碟菜，出面幾難先搵到唔洗加錢，套餐包埋菜比你食？咁抵食梗係要試啦！
另外，嶠媽我幾鐘意青衣城2期嘅食肆，因為好多間都有 baby highchair 提供，對於嶠媽來講係好方便。一來細佬可以自己坐係 highchair 到食粥，二來嶠媽都可以鬆一鬆，唔洗一路食飯都仲要揹住佢😅😅
食野前就發現到原來有個平台花園，咁食飽，去埋廁所，就梗係向平台花園進發啦！雖然凍，但食飽都要出去行下，當參觀一下個平台花園都好！芊嶠同表妹一出去就跑跑跑，我同阿妹就慢慢行，行到盡頭仲可以望到青衣嘅美景，真係好靚！
之後上多層，商場嘅最高層仲有UA戲院，戲院新開張，做緊8折招募新會員，$96 (原價$120) 就入到會，一張飛一年內隨時用，另一張飛就生日月份內用，咁計落即是$48一張戲飛，咁抵玩，唔 join 咪好唔抵？UA 戲院外仲有部照相機📷，同小朋友一齊影相，影完仲可以scan QR code 拎返張相添！
玩完一向上望，就見到天花有水，以為落大雨，原來唔係，阿妹話似係專登製造嘅效果來。望多兩望，原來隔離有樓梯上天台花園，咁就上去睇下啦！原來上面真係有個好似水池咁嘅位，啲水不停出，下面望上來就會以為係落大雨出來嘅效果，其實係專登造到咁嘅！真係靚靚靚呀！天台花園仲要好大，有綠色草地，仲有凳比人坐係到休息，唔係咁凍嘅話，兩公婆同埋小朋友坐係到吹吹風，傾下計都幾舒服😌
行完2期，梗係行返過1期啦，又去左 Uniqlo 到入貨，入完貨芊嶠帶左表妹去上次我地影 SHIBAinc 柴犬工房，話要同表妹影返幾張靚相。我地足足玩左兩個幾鐘，小朋友都好累了😔，我地就齊齊搭巴士回家了！無論青衣城1期定2期，都好多野行，2期更加係吃喝玩樂應有盡有，大家有時間就帶小朋友去1期柴犬工房影靚相，再去埋2期食飯，睇埋戲都仲得添！記得記住，有時間去埋平台花園和天台花園行下呀！
#青衣城2期 #新擴張 #去開1期唔好唔記得去埋2期 #有得睇戲 #有得食飯 #可以去埋平台花園天台花園散散步 #好寫意 #下次同嶠爸再來過 #其實地鐵站一出一邊1期一邊2期 #芊嶠與劻霖成長日記 Pat Pat Tang Maritime Square 青衣城
pizza express 到會 在 PizzaExpress Hong Kong - Home | Facebook 的推薦與評價
龍記嘅燒味師傅即場「斬料」，再由PizzaExpress 總廚Dylan 帶領下，炮製出五道菜Fusion 晚餐，配以精心挑選紅、白酒各一杯，以意式風味重新演繹港式燒味！ 我哋將會喺9月28 ... ... <看更多>