Michelle係我朋友，佢問:「你幾時寫我個故事出嚟？」
我：「講得咩？」
「點解唔得？」
我：「唔係好關職場事。」
「但係我有繼續見客同返工喎。」
點講起呢？若干年前，當時做緊sales，Michelle係senior，某日下午要帶我同另一位同事出尖沙咀見客，去到加連威老道嗰陣，佢見到自己老公同另一個女人拖手行街，佢老公喺龍城大藥房嘅位置，睇唔到我哋企喺對面條路。
Michelle當時停低，拎部手機出嚟影，其實我哋係唔識佢老公，所以另一位同事好奇問咗句：「影咩呀？」Michelle:「見到我老公同第二個女人拖手行街。」
我人生未遇過呢啲場面，安慰又唔係，一齊嬲又唔係，繼續見客又唔係，重點係────佢係senior我唔係，仲擔心會上演街頭爭執之際，Michelle打破悶局：「行喇，遲到喇。」
我同另一位同事唔知講咩好，唯有跟住行，只見Michelle打咗個電話畀自己阿媽同奶奶，話見到老公有外遇，所以要離婚，另外再send咗幾個whatsapp，後來佢講返係send畀老公，連埋斷正張相，仲約咗夜晚返屋企先傾。
見完客返公司，幾廿樣嘢要follow up，quotation、出invoice，同事走嚟夾呢樣嗰樣，Michelle全程正常，其他人唔知頭唔知路同佢講笑，佢都奉陪到底，絲毫冇半點異樣，是日終了，就拎手袋放工。
第二日pantry斟水撞到Michelle，輕輕問咗一句：「ok嘛？」佢話ok，噚晚傾好咗離婚，呢啲點到即止就好，始終係人哋家事。後來熟咗，佢話當日老公原來躁返佢轉頭，先係覺得直接打畀奶奶係唔尊重，唔應該驚動老人家，Michelle冇理佢繼續執嘢，跟住佢老公再發脾氣話點解唔聽解釋，點解唔可以原諒，到最後佢老公聲淚俱下叫Michelle留低，仲認咗已經同個女人一齊兩年。
Michelle嗰段時間表面好冷靜，喺公司亦冇俾其他人睇得出有感情問題，只係請咗一日病假，其實係上咗律師樓簽字。
我：「其實你哋結咗婚幾多年？」
「喺加連威老道撞到嗰陣第6年，當時如果唔係有同事喺隔離，或者我已經崩潰咗。嗰晚攤牌先畀佢鬧，再畀佢氹，我都忍住唔爆發，返到自己媽咪屋企先至閂埋房門喊。」
有啲笑容背後，其實係咬緊牙關去度過，好高興見到Michelle振作後生活得好好。
quotation follow-up 在 Top Tips for Follow Up Emails after a Quotation [+ Templates] 的推薦與評價
... <看更多>