［嚇死寶寶］是日標題黨。
1. 嚇得我丫，以為全部接摺埋，變大灣區航空。
2. 我明白起題嘅嘢要搶要簡，但你話唔係呃收視我真係唔多信。正常人睇到都會覺得係摺埋倫敦，紐約同華盛頓。（1950 edit：睇真啲，人地有寫select airport，明顯係我問題）
3. 原來只係摺埋Gatwick（但飛Heathrow），摺埋Newark（但有JFK）．
4. 不過另外仲有馬爾代夫就全摺。同埋有一期因航搞過Brussels，Dublin而家都摺。我記得呢兩度係同一期開的，仲有Düsseldorf（＊），埃汾至愛 – 我以為唔摺，原來係一早死咗。嗰時我都諗，「有乜人坐？」。咁但人地開得總評估過嘅，Düsseldorf商務客去展覽喎，Dublin就歐洲科企之都喎。Brussels？「歐洲總部掛」。或者去食薯條食青口，唔通去睇原子塔咩（＊＊）
5. （又我當然真係飛過Düsseldorf，但係由倫敦飛。但睇返相先發現嗰次根本係香港出發倫敦轉機。唔知時間唔啱定貴定乜，總之係寧願轉機都冇坐國泰直航，定嗰時根本未有？睇返應該國泰剛剛開）
6. 拿，正題已講完，剩低嗰啲全部離題兼冇公共性，不過經驗都係呢堆嘢先多人睇。
7. Gatwick嚟講，我當然坐過。第一次去德國就係Gatwick飛不來梅，夠晒偏門，應該唔係好多人知道不來梅有個機場，仲要飛國際線，而明明漢堡就隔離。
8. 而雖然都講過，但重複講多次。我年代，倫敦有5個國際機場（係5個機場，唔係Heathrow 5個Terminal），當年未有Southend．而呢5個機場，我居然坐過4個，都係個創舉，可惜當年冇貪得意去埋Luton坐Easy Jet．
9. 咁，Heathrow不用講，Gatwick樓上講咗。仲有窮撚英國學生必定識嘅Stansted，老年咁遠，但廉航集中地。我嗰時啲鬼仔同學直頭早一晚坐巴士入去機場訓。Luton冇坐過
10. 仲有一個係乜？就堅咯，就係City Airport．當年仲在耆英證券，有trip出，做Roadshow，巡迴演唱會。咁同埋個跟歐洲客嘅英國鬼佬同事。黃昏完成倫敦站，即時就入機場，飛……慕尼黑（安聯嘛）。你知啲德國佬忽忽地的，8:00 （定7:30？）meeting，朝早啦，去到佢office喎。真係當年後生先頂得順。
11. 咁因為咁安排，自然就夜晚飛去慕尼黑。而安排嘅同事當然亦都有common sense，唔會飛Heathrow（固然可以坐Heathrow Express，但都會搞你好耐），就飛London City Airport
12. 然後點？然後梗係出事。居然係我一個香港朋友話我知，「老細，你班機cancel咗喎」—應該係多得我乜都打卡擺上網，佢發現我坐佢公司班機。
13. 咁但，去到一半啦，唔通即時改Heathrow咩。結果都係入咗機場，當然係取消咗（唔通會翻生咩）。航空公司話可以安排你去Gatwick坐，我同事（梗係以夷制夷）梗係唔制。最後點？理論一輪，變咗坐尾班機，半夜十二點。我幾懷疑係佢唔夠客兩班客煮埋一碗水。「拿坐啲細機場就有呢種風險」
14. 最後？咪同呀鬼佬吹足成晚（水）。食劣食（英國人嘛，仲要機場）。由1997講起咁咯。
15. 然後？然後幸好冇delay，咪去到慕尼黑去到酒店都半夜兩點—然後第二朝8點定7點半會（德國人嘛）。都唔記得講，客個office仲要在慕尼黑外圍（而我唔知慕尼黑有乜外圍，新天鵝堡？條友做國王的？）。所以好似6點鐘就叫床，呼。勁？未算。之後搞完呢件King Ludwig，再踩入機場，飛法蘭克福！德意志銀行喎（好似）。然後即晚返咗倫敦。真係訓醒唔記得自己在邊。
16. 咁呢啲出trip嘅日子，就係廢老回憶啦。雖則累同忙，但亦十分過癮。最重要係當年體力仲支持到。仲有得坐長途商務，空姐啲面口都唔同啲，我擺隻勞蘇在位同佢影相空姐都仲話好得意，而唔係仆街變態怪叔叔咪阻住阿姐開工，就算講都只係心中講。最重要係啲miles落自己袋（聽聞而家啲公司唔得了）—我飛嗰一次 倫敦-香港商務，已經夠分上銀波蘿。都自high咗幾日。
17．去到星展年代，我嘅巡迴演唱會，香港站外，仲有星馬泰。但我已經力不從心，結果在個客度講講下講到訓著咗（我講喎！唔係佢講，講講下嘢訓著，大家試過冇？）（＊＊＊）。所以真係歲月不饒人。不過點都係要講，星航啲空姐真係冇得頂！冇得頂！
（＊）我懷疑除咗某啲行業嘅人，有幾多人識Düsseldorf。當年學德文（在香港啦），本Themen Neu第一課就講Düsseldorf ist international，證明德國人同個世界果然脫節。雖然又不能話錯，Düsseldorf真係多外國人，特別係日本人。另外，Düsseldorf另一景點當然係Esprit旗艦店！我去過！真係去過！Esprit開撚到愛沙尼亞呀，幾勁。又講真，我係相當鍾意Düsseldorf的。有人問有乜嘢睇？就係冇嘢睇（當然你可以去Esprit旗艦店）。就係貪佢冇乜嘢睇。佢係一個大城市，但冇旅遊景點，變咗啲配套好，但又唔會太多人，十分舒服的。而當年我去係…….睇歐聯。Düsseldorf都踢歐聯？冇。但隔離嗰隊有。咁總冇理由去慕遜加柏住下話（但最後，我真係走去住咗晚）。
（＊＊）再講一次，呢舊嘢真係十分鳩流流，完全衝擊我對歐洲或比利時嘅想像。2000時已經覺得流撚到仆街。
（＊＊＊）我教書年代試過企係度講書都講到訓著！十分正。之前已經開始胡言亂語，學生暗笑，然後講講下我撞咗埋個黑板度先醒！
-------------------------------------------------
Ivan Patreon，港美市場評點，專題號外，每日一圖，好文推介。一個月一舊水唔使，三個月已近700人訂！仲有免費試睇：https://bityl.co/4RBj
-------------------------------------------------
Instagram @ivanliresearch．七成金融（短打）兩成嘢食一成其他嘢。
