關於網絡移民潮，都係嗰句，而家唔少人都仲係持觀望態度。喺「開咗先冇壞」(Btw我新場：https://mewe.com/p/ngkahim )嘅心態背後，其實反映咗而家好多人覺得唔鍾意嘅網絡社交模式，到底係點樣形成。
仲記唔記得最初嘅FB係點？
當初，我哋開個a/c，會po下狗仔貓仔BB仔，仲係你poke下我，我又poke下你嘅階段；會送件蛋糕畀人，你又可以請下我飲酒，之類。簡單，不過得意；虛擬，但係虛擬得嚟真實，因為你真係同一個識嘅人溝通緊。慢慢，越嚟越多人join，FB強大嘅朋友關係計算功能將一啲失散好耐嘅舊朋友舊同學重新聯繫，我會形容係網絡社交同現實生活結合嘅一次標誌性事件。(咁當然，雙面刃嚟嘅，總有啲舊同學你唔會想再見到佢🤡)
到後來，page出現，我哋呢啲做幕前工作嘅人，感覺就好似第一次擁有話語權。唔駛去特定場合，唔駛再透過報紙同八掛雜誌，都可以講到嘢畀大眾聽，亦都唔需要驚意思被扭曲，㩒幾個掣就可以分享生活。大眾對公眾人物從來好奇，社交平台嘅出現，就令大家覺得同偶像前所未有咁接近；你嘅inbox佢有機會睇到，你嘅comment佢可能會reply。咁嘅循環之下，藝人/網絡紅人勤力出post，公眾樂於互動，再加上智能電話功能越嚟越勁，幾樣嘢加埋，將FB熱潮推到高峰。
又記唔記得之後係點？
呢個世界，聚到人就代表有商機，大家開始意識到大眾娛樂由電視轉到社交平台，各大品牌進駐，用唔同方式宣傳。起初係冇事嘅，但到FB意識到原來呢邊錢途無限，遊戲規則就變成畀錢至上。喺一個人上網時間有限，但資訊量無窮嘅情況之下，邊個畀得錢多，個post出現喺大眾面前嘅機會就越大，次數亦都越多。我哋開始喺news feed度睇唔到朋友嘅生活動態，取而代之，係一個又一個嘅廣告。同時你又會發現睇唔到自己科盧嘅藝人分享生活日常，只會睇到佢嘅廣告post；因為，前者冇落錢推。
咁嘅情況下，我哋呢啲幕前人又點呢？出個post都變到瞻前顧後。本來想好好哋講兩句嘢、share張相、分享下生活點滴或者工作情況，但又會諗到：出呢啲呀？反應未必好㗎喎？reach唔到人，engagement就可能唔靚；條數唔靚，會唔會令廣告客戶卻步呢？一旦滲入咗呢啲考慮，出post次數減少，要「估計」反應好先想出，務求無寶不落；大眾睇唔到藝人嘅真實分享，又睇唔到朋友嘅最新動態，件事就變成一個走唔出嘅惡性循環，發展到今日有人敬而遠之嘅局面。
呢個世界冇嘢會係無緣無故，當初我哋鍾意用社交平台，一字記之曰「真」：真實嘅分享，真實嘅動向。當呢一種真消失，有時我都問自己，出一個post，到底真係百分百嘅自己，定還是用FB演算法支配同過濾過嘅「自己」？
所以，有時喺其他平台出post，顧慮少啲，反而好似搵返一開頭玩social media嗰種初心。嗰種感覺好難形容，係有少少似讀書嗰陣秋季大旅行前一晚嘅期待感。我成日都強調，唔同平台一定要有唔同內容，將心比己吖，如果所有嘢照dup，人哋科盧你一個平台就夠啦係咪？大眾娛樂一早已經碎片化，引用我一個朋友嘅講法，你Netflix個list都同你朋友唔一樣；我哋要做嘅，就係要喺唔同平台將唔同嘅內容做好。所以我而家喺呢度宣布，我會喺👉🏻 https://content-blogchannel.hktvmall.com/zh/media/content_partner/CP00008/ 👈🏻開闢新戰線。喺嗰度，我會放一啲其他platform都未擺過嘅內容。原因好簡單，本地嘢，香港嘢，我想支持，希望大家都會支持。
我唔認為會冇人用FB，但從今以後，社交平台肯定唔會淨係得一個FB。
