▶ 美劇咁樣睇 共同發佈
#男神地中海 😯 #BenedictCumberbatch #男神
#Brexit #脫歐之戰 #HBO #NowTV
【 #煲劇介紹番】
劇名：《Brexit》（脫歐之戰）
集數：全一集
頻道：Channel 4／HBO／NowTV BBC Frist
產地：英國
IMDB評分：7/10
英國早前大比數否決咗文翠珊向下議院提交嘅脫歐協議草案，並對佢提出不信任動議。
打鐵趁熱，小編亦急急睇咗呢套由男神Benedict Cumberbatch主演，化身甩毛脫歐政治顧問Dominic Cummings嘅英國電視電影《Brexit》，成個故事主要講述當年脫歐派點樣透過大數據分析去左右選民意向，從而達成脫歐公投勝利嘅歷史時刻，並唔係單純嘅重現歷史，而係更深入咁去睇英國社會分裂之源！
專寫政治劇嘅James Graham今次親自執筆做編劇，搵埋《 Black Mirror-USS Callister 》嘅導演Toby Haynes助陣，仲有男神加持，照理都應該都好睇得過架！
但係喺英國呢個敏感時刻，似乎大家連睇劇都帶有政治情緒，結果個劇當日都未出街，只係出咗條預告，就已經引起英國國民嘅反感，甚至辱罵創作團隊，又叫HBO停播個劇！
先要俾個歷史基本概念大家先，2015年英國首相卡梅倫履行當日競選承諾，就係將英國去留歐盟交俾全國公投，最終定於2016年6月23日為公投日！
而兩方陣營各自施展混身解數要爭取游離票，但係由Benedict做顧問嘅脫歐派更進一步，佢哋針對從未投票群爭取佢哋嘅選票，又用唔少新嘅社交科技以及大數據，針對性咁投放競選廣告，結果喺投票當日，成功以51.89%嘅票數，贏得脫歐公投！
不過事後就被揭發，當中涉及違法取得5000萬Facebook用戶數據嘅「Cambridge Analytica/劍橋分析」，而喺拉票期間，脫歐派又不斷散播不實資訊影響選民意向，事件已經交上法庭審理，劍橋分析公司亦已宣佈停止營運及破產！
講返個劇，導演刻意唔設立場，但以Benedict 嘅視點去講故事，又將脫歐代表人物：倫敦市長Boris Johnson講到成個傻仔一樣，似乎已有一定取態（呢樣亦係俾最多人垢病佢唔中立嘅地方）！Benedict今次咁大犧牲，但表現上其實有少少擺脫唔到Sherlock Holmes嘅影子，而且當中有太多過程過於簡化，加上勁多英國議會術語，小編睇得有少少吃力。
當然成個劇個重點唔係真係去解構個大數據科技（想睇呢類嘢嘅觀眾可以慳返），相反係要講英國社會如何因為今次嘅公投而陷入分裂之中，而當中其實好大程度係受到政治操控！小編一路睇一路諗起香港近年嘅狀況，藍黃之爭同英國In Out之爭何其相似？Dominic喺聽證會入面所講嘅想要令政治Reset重來，又何嘗唔係同香港近年成日講嘅焦土政策相類似呢？
劇集喺英國1月7日Channel 4播咗（香港嘅話可以喺 Now TV 嘅 BBC Frist睇到），Channel 4節目總監 Ian Katz本身就係做新聞編輯出身，佢舊年接任節目總監，係咪有意借呢個劇去為反脫歐協議草案做助選呢，你話唔係小編都唔信囉！
