#小編去開房 之 Edan都住過嘅隱世工業風酒店
酒店就住得多啦，設計都係咁上下🤔 為求新鮮感，小編就去試下啲精品酒店，真係有意外驚喜！🤩
🎊預訂網址🎊 https://flyagain.la/g6e1
🏨 酒店
今次小編嚟到位於天后嘅TUVE酒店，Edan都有喺「今晚瞓酒店」中介紹過㗎！🤗 酒店距離地鐵站同巴士總站只係3分鐘步程，更位於天后食坊範圍內，出入定搵食都勁方便😍
酒店入口冇大大個名，唔太起眼🧐，好容易就miss，入大門已經要拍卡，保安嚴密，未有卡會有職員開門俾你～🤗 酒店大堂設計好有特色，好似喺星空下咁😂 櫃檯為開放式，冇平時酒店check in同職員個隔閡感，要稱讚一下所有職員都極為有禮🥰
大堂有一個細corner位，小編去時咁啱有香水展俾大家試唔同香水（但冇得買😂😂）另外有咖啡機同兩部電腦。而職員有特別介紹大堂另一邊嘅特色「打卡廁所」，幾有特色，就要大家去探索下啦😎
🛏 客房
每層唔大，只有兩間房，小編今次就入住酒店最貴嘅「瀰」房型 -「夜」🥳 房間面積幾大，為工業風設計，較為簡約，但頗有設計感（詳細見圖）大床正對大窗，幾好瞓！床頭就有插頭，同埋有張細枱仔，攤喺度hea一流！🥰 景觀就樓景，但望左都有少少海景睇，都叫做係海景房啦🤓（喂
最驚喜就係電視，有音響都不在話下，但有netflix、youtube同黃viu睇，係真smart tv啊！酒店罕有！😍 真係睇成日都得！但唔係個個房型都有，很想要就建議問定酒店先！🤓
床後面就有工作枱，面積夠哂大，有哂插頭位同枱燈😌 而另一面係一個大盒，一拆解就好似變型金剛，原來係mini bar，有哂茶、咖啡、水壺等，茶包同平時唔同，睇落幾高級！😛 另一邊牆上有全身鏡，可以摺埋，小編真心好鍾意呢個設計🙏
廁所面積都好大，一入去就馬桶同洗手盤，右邊就係一個勁大勁大嘅淋浴間，大到小編瞓喺度沖涼都得！😮 佢有花灑同雨淋式花灑，小編試完後完全推介用雨淋式，水力同冷熱都好校好多！💁🏻♂️ 企缸大到咁，如果係情侶一齊嚟……你懂的😏 不過如果成個係浴缸就真係不得了🤣
🍳 早餐
酒店本身冇餐廳，所以同樓下餐廳合作包大家食早餐，都幾有心！😇 餐廳行打卡cafe路線，包嘅早餐都幾多，有all day breakfast、布甸、沙律、burger等，小編就揀咗窩夫同egg benedict！🤤 不過餐廳唔大，小編費事等位就拎外賣上房食！
兩份早餐都質素好高！egg benedict醬料剛好，唔會太搶，一嘢擺入口咬爛隻蛋個感覺，係天堂呀！🥰 而窩夫就本身有tiramisu味，再淋個焙茶醬，食落有茶嘅澀味，慢慢會再回甘，一食上癮！🤤 兩個餐都包嘢飲，可揀咖啡或茶💁🏻♂️
💬 結論
小編嘅精品設計酒店初體驗，真係好驚喜！服務一流，有智能電視任睇，大大個企缸，高質早餐，全部都勁正！🥰 晚餐落樓下都好容易解決，反而選擇多到唔知食乜好😂 酒店價錢唔太貴，住慣哂典型酒店可以一試，一定有新鮮感！😎
完
