美國犯罪率出咗名高，近來又發生頗多針對亞裔人士既罪案，偏偏我個樣又生得衰：喺亞洲，啲人覺得我鬼鬼地；喺歐美洲，啲人又覺得我係支那人。哎！乜人都好啦，家人擔心我既安全，要我擺支槍喺屋企旁身。我心諗，又唔識用，擺個空城計把鬼咩。
同朋友傾開，佢地話，喺美國，每家每戶，最少都起碼有一支槍，而大部份人喺車度，仲會擺返支添，方便如果撞車講唔掂數，就開槍啡低對方😳。
為咗我既安全，其中一個朋友就決定帶我去學射槍。
去到室內射擊場，見到各種唔同大細，型號，火力既槍械，我個心開始有啲慄，但又唔好意思打退堂鼓，唯有死撐，頂硬上。
朋友幫我租咗支.357左輪手槍。
一踏入間射擊室，已經俾周圍響到令人腦震盪既槍聲嚇到成個人彈起。
去到自己條線，先至知道要跟足規矩自己入子彈，（係真子彈！）朋友唔可以幫我入。我入咗好多次先至入晒5粒子彈。點解咁論盡？因為每次隔離線一開槍，我就會俾震天動地既槍聲嚇到好似柏金遜病患者咁，握喺手啲子彈都跌晒落地，要執起再入過。
終於手騰腳震咁入完子彈，開第一槍。雖然，之前前台個哥哥已經教過我點正確地揸槍，又好詳細咁解釋過支槍發射時會發生既後座力度。雖然有晒心理準備，但一開槍，支槍既後座力仍然震到我幾乎甩手，嚇到我死死下。
開到第三槍，支槍既扳機突然間勾唔郁。我騰晒雞咁將支槍交俾我朋友。佢接過手，連續開咗幾槍，都冇問題。交返俾我，叫我再試過。我再試，都係勾唔郁。我心諗：「黑仔Tann」，你唔係黑仔到連人地支槍都整鬼壞埋係花？！
朋友見我揸住支槍，鬼食泥咁企咗喺度吟吟尋尋，就建議我換過另一支槍。
出返去前台，我面青青咁同個哥哥話，我可能整壞咗槍，要換槍。佢檢查支槍，發現支槍冇問題，有問題果個係我，果然😵💫。 佢認為係我隻手太細，食指唔夠力扣支左輪既扳機，建議我換支9mm Glock 半自動手槍試下。佢解釋話支Glock 同左輪最大既分別係：左輪手槍要用食指去勾個扳機，將粒子彈轉入個槍膛度，而支Glock就需要用手將個滑管向後chok一下來load子彈。佢即場叫我試下睇chok唔chok得郁個滑管。我騰騰雞雞咁拎住支Glock，試下向後chok，哈！竟然夠力chok個滑管啵。
返入射擊室再試過。
終於成功開到幾槍，個人冇咁緊張，開始可以集中精神學瞄準，我由一開始將啲子彈打晒喺個人型靶既外面，慢慢進步到打得中內臟位置，最尾仲有幾槍仲打中紅心添。
朋友對我由「騰雞Tann」升呢到「殺神」既極速進步讚不絕口，話我既學習曲線好勁。我雖然暗啞底覺得自己都幾叻，但始終覺得，學射槍，係要來自衛。槍械，話晒都係殺傷力好強既武器，冇必要，都係可以唔用就最好唔好用啦😓#射擊 #槍 #暴力 #槍械暴力 #左輪手槍 #Glock #腦震盪
tann講 在 【Stand Up Roland附送阿感】第182集- Tann講移民美國瀨哂嘢 ... 的推薦與評價
【Stand Up Roland 附送阿感】#移民美國#美國＃移民#美國人處事方式第182集- Tann講移民美國瀨哂嘢1️⃣Apple Podcast https://standuproland.com/3kmutpn2️⃣Spotify ... ... <看更多>