《其實青春，就係好多好多件「往事不堪回首」嘅事堆砌出來...》
今日報紙話有個中五學生，排咗成晚隊，為咗買平飛陪女朋友入海洋公園玩。睇到真係覺得呢件事好青春，好戇居，好傻仔，好發神經，但好sweet。如果我係海洋公園top management，我會即刻送終身free ticket 俾呢個男仔，成全呢pair 情人。個男仔嘅行為真係拍得住「孝感動天」嘅level，仲同海洋公園做咗成日免費宣傳。
香港地真係痴痴地，點解笑個靚仔戇居，根本青春就係咁戇居架啦...
好多人笑個男人戇居，係窮撚，係兵，海洋公園其實唔好玩，個女仔一定寧願同個買得起正價飛嘅男仔一齊，個男仔點解唔用排隊嘅時間讀好啲 書，第時多多女都有...
排隊排成晚買海洋公園飛戇居？點戇居都唔夠啲韓劇戇居啦...
《天國的雞批》個女主角盲咗，個男主角捐自己pair 眼出來唔戇居咩？《來自星星的你》，男主角用自己條命救女主角唔戇居咩？韓劇先係最戇居，要由第一集喊到最後一集來驗證愛情。點解愛到要生要死就好感動，排隊排成晚買海洋公園飛就係戇居？定係呢啲野發生喺劇集就浪漫，發生喺現實就災難？
「個男仔點解唔讀好啲書，第時多多女都有，排成晚，哂哂啲時間」...
我記得《義不容情》入面，黃日華為咗送個音樂盒俾周海媚，喺一個橫風橫雨嘅夜晚，喺大嶼山等咗一晚，等間精品店開門。其實由古到今都係咁架啦，求偶方法有好多，你可以靠樣靠錢，但當你又無樣又無錢嘅時候，就只可以靠真心來compensate。個男仔呢個age窮得只有時間，於是佢用佢最珍貴嘅時間來換平飛。其實我哋打工嘅都係用時間來換錢，咁點解笑個靚仔用時間來換平飛？佢無偷又無搶，只係付出佢能力範圍以內可以付出嘅代價。到個男仔長大咗，就算佢可以排隊排通宵，佢都唔會再排隊排通宵，呢份浪漫就只有呢個age 嘅死靚仔先可以experience。
過咗呢個年紀，唔會再咁pure 咁true咁戇居咁付出，就會開始斤斤計較，諗住「秒秒鐘幾百萬上落」，「不如用呢啲時間搵多份兼職快啲儲首期買樓」，會喺市面上搵個 「唔使你付出咁多」嘅女朋友。呢份「戇居」根本係期間限定，limited edition。
點解大家都鐘意睇《那些年》同《少女時代》？
因為你見到個啲男女主角咁戇居， 你見到自己。呢個買海洋公園飛排成晚嘅男仔，同佢女朋友，真係唔使驚世人恥笑，因為笑緊你哋個啲人，當中99%都做過呢啲戇居野，佢哋只係死要面，往事不堪回首，唔敢重提。
可能有一日，呢個靚仔諗返起排咗成晚隊，都會覺得自己好戇居。呢一啲「往事不堪回首」嘅事件，真係既令人痛苦，又令人回味。但青春，就係好多好多件「往事不堪回首」嘅事堆砌出來...
大家收過最戇居嘅禮物係咩？我有一個朋友... 當年喺大學一個月黑風高嘅趕功課晚上，兩條友喺碧秋行上NA嘅時間，朋友A抬頭望一望個天話「今晚，點解一粒星都無嘅...」，第二日朋友A收到朋友B一樽星星，朋友B原來聽到A咁講，摺咗一晚星星俾A。
事後有人同朋友A 講「呢啲 星星，旺中幾十蚊一大樽啦...」。香港人就係咁，點解有咁多猜忌，唔可以收起毒舌，真心相信人哋係真心。呢個靚仔同個女朋友去海洋公園，其實都係開心野，真心為個後生仔拎到平飛而開心，真心祝福，真係唔使錢架喎。
