一，「一國一制，又有乜好驚？十幾億人都係咁生活啦！你有冇返大陸睇下近年嘅經濟發展？」 #Nancies 一定咁講；甚至乎再加多句：「都話咗你吔鬥唔過共產黨㗎啦！激嬲共產黨，佢吔一定唔放過你。」
二，「係囉。唔好咁多事啦。我都唔明，你哋有乜咁不滿？吵吵鬧鬧，香港又點會有發展？」我估大家都聽過類似嘅說話。
三，香港人，大把人想做順民；可以嘅話，我都想。其實，我係一個好怕事嘅人，相信大家都係。
四，根本問題係，共產黨唔信香港人，點解香港人要信共產黨？共產黨唔信香港人，香港就要硬食各種嚴刑峻法；香港人唔信共產黨，所以要制度上有所保障，有乜唔掂？
五，「國家，就好似我哋嘅父母；父母就算有乜不是，你都唔會⋯⋯」Nancies 呢個講法，對唔住，真係接受唔到，真嬲。當然，佢哋嘅邏輯係：「父母，你冇得揀，國家都係。」之前都有寫過，Nancies 嘅忠孝，其實係不容置疑嘅服從。某程度上，呢種唔容許「個體」存在嘅意識形態，就係 Nancies 同我嘅最大分歧。
六，個體嘅存在，唔代表個體同其他個體唔會相親相愛，唔會同氣連枝。Nancies 成日好鍾意話洋人唔照顧老竇老母，但實情係我見到嘅不孝仔女，真係應該天打雷劈，唔少滿口忠孝仁義。洋人嘅倫理，簡單講，就係愛；愛你的近人如你愛自己。
七，唔自愛，又點識得愛人？愛又係乜？愛係一種好強烈嘅 empathy ；憂戚與共，係好大嘅承擔。愛自己都唔係人人識，愛人更難，愛國，係歷史英雄級數，愛全世界人，好似得耶穌同佛祖先有咁嘅境界。所以話，個啲開口埋口愛國愛黨嘅，一係偽君子，一係好膚淺。
八，膚淺？係，膚淺。因為佢吔搞錯咗，依附（attachment）同愛嘅感覺。BB 仔唔會識得愛，只會有不安、恐懼。所以尋求安全感，要依附。
九，又有一種心理狀態，就係希望被依附。依附同希望被依附，呢對關係，可以話係變態。所謂嘅愛國者同國家，就係建立響咁嘅關係之上。
十，關鍵在於，我哋有冇為「個體」定下界線，set a boundary。再講一次，個體嘅存在，唔代表離群，唔代表絕對獨處。
十一，就算父母仔女，假如只係因為「冇得揀」，所以要永遠維持依賴同被依賴嘅關係，咁樣，係唔會有真正嘅愛。只有當個體之間有明確嘅 boundary，咁先至可以互相尊重。
十二，「所以美國要尊重中國嘅主權囉，要認清條界線囉。」我估，會有 Nancies 咁講。正如 **八** 所講：「膚淺？係，膚淺。」我講緊嘅係群體唔會蠶食吞噬個體嘅自主，Nancies 就將整個「中國人」當做一個個體，「美國人」係另一個個體。大家唔同層次，好難溝通。
十三，「我唔明你講咩個體群體；究竟你係咪中國人？」我，就係一個人，this is the undeniable fact。完。中國人又好，美國人又好，都係一個人。康德叫我哋要 treat humanity as an end in itself，意思就係，對自己，對其他人，都要將每個人視為個體，唔好視任何人為達到其他目的嘅工具。要記得，人，本身就係為最終目，呢個就係道德嘅定義。
十四，所以，我選擇唔要某種身份，唔一定因為仇恨一班人，一個國家；亦唔可以話因為我冇得揀，所以要焗撐某個身份。每個人都為自己嘅所作所為負責，亦冇責任為其他人嘅所作所為付出。只有出於自由選擇嘅，先係真愛。
十五，有朝一日假如世界各地都有人話：「我想做中國人，我想學中國文化，過中國人嘅生活。」咁就真係民族復興喇；做一個中國人，唔單止係國籍，而係身份文化認同。講真，本來都有唔少洋人仰慕中華文化，但硬係要將中華民族同中國共產黨綑綁，咪世紀攬炒囉。
十六，傳統中華文化同個人主義可唔可以共融呢？歡迎大家討論。
