［用人不疑，疑人不用］假嘅，因為當你不疑，嗰個人就會take advantage，人就係咁賤。朋友又好，情侶又好，工作都係咁上下。
（其實我有啲懷疑係咪玩嘢文？）
1. 上篇講過（https://bit.ly/3bE2YDG），有人明明個人就行開咗，但搵張相或者搵段片扮自己開緊會，以逃避老細嘅attention tracking tool（你離開個Zoom Window 30杪就會發現）。咁當然，道高一尺又魔高一丈
2. WFH，其實好似好多老細都唔多鍾意，冇法。固然人人會講，「要偷懶在公司都可以」，冇錯係事實，亦好多人都係咁—但你總不能在公司睇住porn hub然後攬住條女掛？都係有個譜嘅。留唔住你個心，都留住你個人嘛。
3. Axos Financials嘅CEO就話畀員工知，拿，老大哥睇住你呀。唔好以為WFG就蛇王，公司會log晒你啲鍵盤打過乜，紀錄低你上過乜網，可能隔十幾分鐘就隨機影下你個screen（呢招先毒）。話因為太多人濫用喎，彈性上班變咗放假。所以老細就出招啦。
4. 你公司我唔知啦，但我做開嘅公司好似唔算極之相當嚴。不過基本上你上過乜網公司當然會知，你email當然全部會知（所以，自己帶多部碌卜咯）。以上種種監控呢，只要一早有同員工講，係合法嘅，至少美國係。但如果你WFC，公司要在你部機度裝，又係另一回事了。當然公司講法，就一句保安理由大晒啦
5. 而所以呢，呢啲監察軟件，而家就好有市場了。不過最有趣係，Axos就不肯評論，到底提呢樣嘢嘅CEO，本身係咪都受同樣嘅監控．梗係動物農莊啦，CEO點同呢，嘻
6. 原來呢類軟件都好多（費事列出嚟，陣間你老細睇到），除咗監控，仲可以紀錄住你做過乜，SEND過幾多個EMAIL都記低。十分1984。聽聞呢排全部都好好生意
7. 最好笑係，有啲可疑行為會被舉報：例如print CV然後又print公司嘅客戶或供應商名單 – 即係想跳槽啦？「記得拎電話影相算」
8. 而嗰啲軟件嘅開發商，就梗係話你知，不如逆來順受啦。話當係一個工具，去證明畀老細睇你可以自律喎。多謝喎。大家都知，做得嘢嘅人，好多時就塞更多嘢畀你做。
9. 我個無聊提議係，既然咁撚神通廣大，個個嘅生產力都度到仔細無遺—Fine，咁直接計入加人工條式度咯，就咪撚再做咩阿丕嫂。甚至可以炒咁一大班HR，舊錢分埋去我度。大家話好唔好？好公平啫。你話你套嘢公平咁量度到同事生產力，咁不如就用嚟做下年人工花紅標準咯，快靚正。
10. 當然有啲公司，係佛系管理。用人勿用，用人勿疑。請唔請人呢？
11. 又，我覺得根本呢，啲電腦病毒就係防毒軟件公司搞出嚟嘅（留意佢地專請啲整病毒嘅毒撚），同樣地，其實在呢個員工老細角力中，佢地等於係賣軍火—最有利就係你地勢均力敵。我賣幾件畀你，又賣畀幾畀佢。我賣啲軟件等你可以work from home，然後賣啲軟件畀員工可以蛇王，然後再賣啲軟件畀老細去track 住你—然後再賣啲軟件去繞過呢啲監控 —來來回回可以賺好多轉錢。軍備競賽咁之嘛，對面升咗呢喎，你升唔升？
12. 離題講，所以你而家明白，點解只係得南北韓（部份人）想統一，日本美國中國俄國全部都唔想—根本維持而家呢種牽制狀態大家最有利。兩韓統一必然直接挑戰日本甚至俄羅斯地位，而中國又冇可能容許邊境係美國駐軍嘅統一韓國—而家有北韓做緩衝不知幾好。
13. 埃汾覺得啦喎……其實職場係冇乜自由的。除咗「唔鍾意，做第間」外，都冇乜選擇。但其實to be fair，大家工作上嘅自由，已經比廿年三十年前多好多。你一部手機在手，真係在公司都好難綁住你。如果拎埋部碌卜更好。某舊公司呢，係冇WIFI嘅，亦唔容許駁LAN線（合理）。所以我當時索性出張電話卡用流動無線上網咁。當然啦，你亦可以話，以前放工就放工，而家好多時都唔係。
14. 所以有辣有唔辣，科技根本令返工／放工嘅界線模糊咗。而你問我，其實技術上，同埋法律上，公司可以做到好辣的，但我做過嘅公司一般都真係冇話有權用盡咁。等於唔好講咁深，講返工，一早可以知晒你地幾點打卡啦，用生物認證都仲得（我就冇試過）。但蕉行之後，我都冇遇過間公司強制要打。就算有啲公司強制要，都好似唔會衰到你遲一分鐘就出email公告天下（蕉行嗰時好似真係會），或者阿丕嫂拎返呢堆嘢出嚟講，然後減你兩百蚊人工咁
15. 畢竟，雖然先天唔多對等，但其實工作，都係雙向嘅。你間公司係玩到上Facebook出汪玲，遲到一分鐘開始扣花紅嘅，咁你咪睇下你會請到乜人咯。
16. 所以最後都係好廢，但幾時都係，你去增值自己，令自己成為個有巴京拎包華嘅人。職場就係咁現實，其實社會都係。你係粒螺絲咪任人玩咯，你係有啲食力嘅咪可以對你隻眼開隻眼閉。而好多人嘅悲劇就係高估自己嘅價值，以為自己有乜咁巴閉，「喂我過去咁多年對公司乜乜乜」（冇撚出糧畀你？）。
17. 所以可能更正下。勁就最好，但好多人都唔勁（包括我）。唔夠勁就最好知道自己在邊個位。
wifi tool 在 emoacht/Wifinian: A Windows desktop tool to enable user ... 的推薦與評價
Wifinian · Connect to or disconnect from a wireless network · Rename a wireless profile · Change automatic connection (Auto Connect) or automatic switch (Auto ... ... <看更多>