《終於由「好難約」進展到「其實約定都無用」》
阿強作為一個稱職嘅Gathering 搞手，身處「朋友金字塔」嘅最底層，慘過做泥工，感受亦都特別多。
當一般人仲係慨嘆緊「好難約」嘅時候，
阿強高瞻遠矚，睇法「超前」，同時灰到極點，
已經領悟出「朋友聚會」呢家嘢，
「唔係難約，而係約咗都無用」嘅新境界。
事緣是咁的，有日傾閒計，Mary突然收到個Wtsapp，然後振臂高呼：「Yeah！條友仔終於應機！餐生日飯約得成啦！Yeah！」
原來Mary約緊班姐妹食生日飯，偏偏有條友唔覆機，明明睇到個Group Msg都唔肯俾個時間出嚟。
呢種「睇咗唔覆」嘅現象流行多年，早就見怪不怪。
大家都於自己未覆Wtsapp都由「罪惡感」變到有「少少快感」。
而Mary狂呼嘅原因就係嗰條友仔良心發現，終於覆機，約實一個時間。
講到呢度，大家都想開支香檳賀賀佢。
但「搞手王」阿強只係冷笑一聲，用沙啞嘅聲線同佢講：
「一個Gathering，約好時間係無意思架，一日未見到班友仔坐喺你面前，都未算贏。」
哇，佢嗰把歷盡滄桑嘅語調，將你深深打動，令你有一個想法：「佢一定有好多故事。」
阿強將白開水一飲而盡，開始自言自語：
「每次聚會，愈早約定，愈易去唔成。」
總有人覺得早一個月約，就可以Lock咗你個期先！
諗法無錯，但其實只係「嗰一刻Lock咗」，
一旦出現「女神約我」、「同客食飯」或者「嗰排好攰」等等因素，主人翁就可以「主動解鎖」，向大家講句：
「Sorry，嗰日原來唔得！下次！」
就算無人提前放飛機，
對於一個20日後嘅聚會，阿強都要喺個Group度瘋狂提住個Gathering，炒熱個氣氛。
成個痴漢咁問「食咩好呢？」「明仔嗰日會唔會渣車呢？」「黃仔會唔會遲到呢？」之類。
總而言之就要喺個Group度「自High」，目的得一個，不斷間接提醒班友「嗰日要食飯架」。
點解咁做？
因為阿強試過有一次約好咗時間地點，就大安旨意，嚟個「我有我生活；你有你忙碌」，
無再喺個Group提起「我和你哋有個約會」。
終於去到約會日子，阿強突然感到不妙，因為完全無人問當晚安排。
根據佢嘅搞手經驗，每個約會都存在「黃金12小時」，即係約10PM嘅話，10AM就係黃金時段。
如果去到嗰日10AM都無人問「今晚點」。
咁就大鑊，代表大家對Gathering嘅期待度已經接近零。
有啲人真係唔記得；
有啲人就明明記得，但諗住無人提就由佢。
大部份人都出現「聚會冷感」症狀，啟動咗「迴避功能」。
阿強硬住頭皮開聲：「大家今晚記得架可？」
講真佢好無信心。
果然明仔一招收佢檔：「Sorry ar，今日應該唔得啦。」
明仔秒速放飛機，只因佢都Feel到大家對聚會士氣低落，如一盤散沙。
一不離二，Peter即刻補一刀：「明仔唔得，都唔齊人，不如再約啦！」
嗱，永遠有呢啲人，會用「因為邊個唔得，為咗佢大家再約過」做借口，地圖炮式摧毀一個約會。
其實佢先係最唔想去嗰個，又唔想背負「飛機仔」罪名，所以扮下偉大，進可攻、退可守。
正常一個Gathering嘅黃金比例係70%，多過7成人出席，去！
但一跌穿依條保險線，大家就好似啲師奶散戶咁衝去沽貨！
碟三文魚刺身自然係ifc跳樓，大家都唔使食。
如果得返一半人肯去都照食，只能讚嘆你哋嘅友情好堅貞！
經歷咁多，難怪阿強看破塵世。
已經明白現今世代，大家分佈港九新界，要食餐飯，約個時間好難，真係應約更難。
大家都跪哂喺度問阿強大師有無辦法可以防止呢類「滅門慘案」發生。
而佢都說出一個「大師級」答案：
「要體諒、別勉強、一切隨緣。」
都係嘅，早知解散後各自有際遇作導遊。
生活各有難處，
今次見到面係緣，
見唔到又唔代表完。
一日仲呼吸，一日都有機會。
IG: cheungson88
PS. 小弟的散文《人類總要重覆同樣的回憶》已慢慢於各大書局上架，希望大家見到掀兩下~本書成部GameBoy咁!好易認!多謝大家!!
ifc跳樓圖 在 香港交易廣場天台生成器 的推薦與評價
Su, Mo, Tu, We, Th, Fr, Sa. 1. 2, 3, 4, 5, 6, 7, 8. 9, 10, 11, 12, 13, 14, 15. 16, 17, 18, 19, 20, 21, 22. 23, 24, 25, 26, 27, 28, 29. 30, 31 ... ... <看更多>