［點解嘅？］真係架！其實我覺得首歌好好聽，就係比較K，同埋大過TVB咁咯
1. 版務，去越南工作數天。先去河內再去胡志明市。星期日回港。
2. 「而家仲去越南？」傻啦，越南先安全！其實冇乜地方危險得過香港。除咗大陸，同埋新加坡！
3. 「唔係停飛咩？」yes and no。今次真係一波N折。首先係屈質（Viet Jet）航空取消咗我胡志明回港班機，搞到我要訂因航。然後就到因航取消埋我去河內班機，所以變咗神咁早出發。但因航本身係仲有飛越南嘅（否則我坐乜？）。之前就係越南仔唔畀中國航班入境，即時閘埋香港同台灣嘅機—但後來又好快解除埋。
4. 「好似話唔出簽證喎？」又係yes and no．你一早做咗簽證得。但我其實冇。咁越南呢，係停咗中國護照，同埋香港護照嘅簽證。但，登登登，BNO係咪「香港護照」呢，就真係冇人知了。而我去申請越南嘅pre approval，暫時都係得嘅。暫時亦都寫我係British，港英餘孽。BTW，BNO幾時都係一樣好神奇嘅嘢，本人並不特別戀殖，但more is more，得罪講句你去外國而家有啲咩唔畀中國人甚至香港人入嘅舖，你拎個BNO扮英藉，我估有機會放行。以前在歐洲（大佬歐洲唔只得歐盟），亦都有一大堆情況係好似BNO要簽證佢都照畀你放，甚至係問返你「老細你明明唔使簽證做乜整個簽證」（＊）
5. 「咁但會唔會入唔到境？」係，唔知的。入到話你知，或者入唔到再話你知。一日未入境都係唔知。的確係咁，我拎住嘅只係封信，落到地要再搞簽證，之前去越南都係咁。況且，邊個話你知有簽證就入得境？事實你去免簽嘅地方一樣可以唔畀你入境，唔使任何解釋，此乃國家主權。所以，you are not入境until you are。不過你出唔到張信，就應該機你都唔使上。
6. 「咁啲文點算？」作為一個負責任嘅作者，又唔係第一次離港，就梗係有一早預備定啲罐頭文啦。有啲有趣嘅突發嘢亦會寫，或者當地嘅奇怪嘢都會。不過就預會少啲更新咁咯，但應該一日點都有返一篇，或者幾篇—而如果我入唔到境，咪一切如常咯！
7. 「會唔會有口罩賣？」根據越南當地接頭人嘅講法，係好難搵嘅。當然搵到我都顧掂自己同囡囡先。不過真係有多嘅，可能拎返嚟派讀者。但呢個機會應該細過你中六合彩。
8. 呀，其實早兩晚去高流灣（尖沙咀啦）打邊爐，經過河內道，原本都想影張相，第一站去河內嘛，不過趕坐巴士影唔切。
9. 又無巧不成話，越南越愛，聲雅廊就係在河內道的。識嘅自然明。
10. 真係最後了，河內道固然係越南嘅河內，唔係三國演義「河內名將方悅」嘅河內。但海防道亦真係越南嘅海防，睇英文就知。西貢街亦係越南嘅西貢，唔係西貢區（＊＊）。而當然東京街亦唔係日本，係東京灣/北部灣，越南嘅東京，又即係河內！但緬甸台，就真係唔係緬甸。正如巴富街，唔係阿塞拜疆Baku，係Perth-但居然係蘇格蘭Perth，唔係澳洲柏斯！（雖然澳洲柏斯嘅正係name after蘇格蘭Perth）
（＊）呢度要懺悔一件事。2010年我在巴爾幹，唔記得係黑山去塞爾維亞定掉轉，坐半夜火車，軟臥，但在邊境當然會叫醒你查護照。我唔知畀咗本BNO定特區護照佢，結果成班塞爾維亞定黑山友，依依哦哦講咗一大輪，搞唔掂。出咗去請示上級，上級嚟，又講咗一大輪。然後搞咗大半個鐘，卒之有個靚仔，用英文，友善但堅定地同我講「老細，你要簽證喎，麻煩你要落車了」。然後我再拎另一本護照出嚟，問佢，「會唔會呢本唔使簽？」。然後佢地成班陶大宇式掩面，我唔識聽塞爾維亞語或黑山語，但我睇表情都知道佢地講：「仆街，你唔撚早響？」。結果好快，就有另一靚仔嚟用英文同我講，「拿，下次你唔好再用頭先嗰本護照入境呀下」。結果，就係班車過境搞咗一粒鐘—雖然可能平時都要搞半粒鐘嘅。
（＊＊）其實成件事好神奇，越南西貢同香港西貢區，係完全冇關的。香港西貢區就真係西方來貢，但越南就應該真係音譯，柴棍／堤岸Saigon，然後譯返中文。當然譯做中文時有冇特登都係西方來貢嘅意思就唔知了。
jet中文意思 在 jet中文(繁體)翻譯：劍橋詞典 的相關結果
jet 翻譯：飛機, 噴射機, 流, （水、氣體等的）噴射流, 噴嘴，噴射口, 石頭, 煤玉， ... jet 在英語-中文（繁體）詞典中的翻譯. jet ... 查看全部意思». ... <看更多>