當地球變成垃圾站（上）
「保護地球！」「守衛人類母星！」「地球唔係垃圾站！」
一聲接一聲嘅示威口號中，我舉住牌向前進，希望政府聽到我哋嘅訴求。
2500年，火星被開發成功，地球環境又愈嚟愈差，有錢人開始移民去火星。
與此同時，人類都發現咗外星人。
更準確地講，係外星人通知人類，佢哋嘅存在。
外星人嘅科技比人類發達好多倍，見到人類可以開發其他星球，先將人類歸類落「文明生物」，畀人類加入「星際聯盟」，並且將地球同火星劃為人類領地。
同為人類領地，火星同地球都有「高」「低」之分。
因為火星有好多有錢人，各種生活配置都變得更好，冇人想再開發「冇未來」嘅地球。
移民去火星，變成地球人嘅唯一目標。
到依加，地球就剩番我哋呢班窮鬼，同一個尸位素餐嘅政府。
咁都唔係問題，無論有冇星際移民，世界嘅規律就係有錢人爽歪歪，窮人苦苦掙扎。
問題係，按照「星際聯盟」嘅環保協定，成員不得將垃圾運去太空，同領地以外嘅星球。
換句話講，火星人倒垃圾嘅地點選擇，只有地球同火星。
唔知幾時開始，火星人開始偷偷將垃圾運嚟地球嘅無人區。
地球上唔係冇人發現呢件事，但大家覺得，又唔係運嚟自己屋企，本身地球都有堆填區啦，多少少垃圾有咩所謂？
有啲火星嘅良心企業，唔想將垃圾運嚟地球，就畀錢畀垃圾處理公司，想正式地處理垃圾。
但垃圾處理公司嘅處理方法……一樣係運嚟地球。
漸漸地，地球上嘅垃圾愈嚟愈多。
而且，有啲垃圾含有輻射，或者造成嚴重污染，開始影響地球人嘅生活環境。
有人患上呼吸道疾病，接近輻射垃圾嘅人，甚至患上癌症。
受影響嘅人提出反對，當反對嘅聲音愈嚟愈大，地球政府終於作出反應。
政府決定，同火星簽訂「垃圾處理協議」，正式將地球列為火星嘅垃圾處理地點。
面對群眾嘅反對，政府發言人表示，既然地球已經冇發展空間，變成垃圾站，未嘗唔係一個好嘅發展方向；而且，火星會就每批垃圾，給予一定費用……
但民間嘅環境專家計算過，按照呢個污染頻率，五十年內，地球可能唔再適合人類居住。
垃圾費用？再多嘅錢有意思咩？地球即將變成一個死去嘅星球，所有地球人都會被疾病折磨，死路一條。
呢個協議一出，頓時激起大量地球人嘅反抗。
環境專家吳博士組織咗「反垃圾處理聯會」，不斷發起示威。
我係吳博士以前嘅學生，好榮幸地成為咗大聯盟嘅其中一個幹事。
有人認為，要暴力推翻現有嘅地球政府，吳博士就主張非暴力示威。
吳博士認為，地球嘅科技遠遠比唔上火星，一旦太過暴力，同火星發生衝突，地球人肯定冇好下場。
所以，地球人應該用溫和嘅方法去示威，搏取擁有更高科技嘅外星人同情，希望「星際聯盟」出手干預，先可以一勞永逸。
而且，火星上都有環保派，佢哋都可能會同情我哋，一齊保護人類的嘅母星……
我贊同吳博士嘅主張，暴力係解決唔到問題。
作為知識份子，我哋應該用知識、理性同和平，去保衛我哋嘅地球。
好多有能力嘅人，都為「反垃圾處理聯會」無條件付出。
漫畫家會畫漫畫、中文好嘅人就寫短文……嘗試用最簡潔嘅方法，令所有地球人明白，垃圾處理對地球嘅壞處。
喺我哋嘅共同努力下，參與示威嘅人數愈嚟愈多，真係好熱血！
下集：http://bit.ly/3rdA59z
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #當地球變成垃圾站
太空科技的壞處 在 [問卦] 企鵝妹在高雄收到一件神裝外套？ - 看板Gossiping 的推薦與評價