＜＜從設計師眼光看新鈔，點解中銀出左事?＞＞
其實我當時有睇直播，睇哂成個新鈔發佈會，不過等左好耐都唔見有一放圖可以一次過俾大家睇哂三間銀行嘅作品。我唔知係中銀公關做得好定點，好多傳媒第一手嘅報導都只係Post左中銀果套出黎，等到而家，起碼都有人cap返直播果陣d畫面，等大家可以睇住黎聽返窮生嘅評論。
等大家仲記得我其實都係一位香港設計師（笑）。
窮生雖然唔係紙幣收藏家，但由細都大都鍾意錢呢類野，中學果陣會留意以前d人到底用乜野交易，去到日本都會扭下蛋，有d仿製嘅天保金判、一分銀嘅玩具，都幾得意。今次出新鈔，我則嘗試用我本業－設計師嘅角度睇下呢3套銀紙嘅設計。
首先我先要讚一件事，就係今次首次使用嘅「直度」設計，雖然唔係世界上第一款「直度」設計嘅鈔票，但係香港第一次用，感覺依然係新鮮亮麗，容易分辨！有設計師覺得點解今次一面直一面橫，唔得統一。我反而覺得而鈔票的功能性黎講，一面直一面橫更加合適，辨識度高。
三套鈔票之中，匯豐同渣打都各有值得讚賞嘅地方；先講匯豐，我特別鍾意佢張1000元。佢少有地利用魚眼鏡拍攝香港一直以來打橫一條skyline嘅維港景，克服左「直度」影唔哂咁靚嘅維港景呢個問題，感覺新鮮得黎，保留到香港多高樓嘅宏偉壯觀感覺。相反渣打就跳唔出呢個框框，又唔知係唔係渣打要刻意甩開某d大樓，枝ifc頂左上個0字度，有d唔舒服。個人認識匯豐始終係匯豐，好多細節都做得唔錯，特別係佢大部分鈔票用左最少2種色黎令個圖案更加有立體感，特別係100元果張，我明大家都覺得粵劇主題好恐怖，佢地就巧妙利用顏色減少左呢種感覺，加埋構圖又係3款之中最好！
係幾多張入面，我相信好多人都會覺得50元係最靚，我都係咁話。3款入面，我喜歡渣打嘅構圖，匯豐嘅顏色運用。渣打的20元同50元俾我感覺好有生氣，20元的飲茶文化，渣打最能表達，因為飲茶係家庭活動，而家庭又同伙計有深厚感情，因為大家都係係度食大，土生土長，香港人真正嘅和諧應該係咁體現出黎。好可惜果兩個紅燈籠出左事，錯誤draw左attention。令到整體黎講匯豐嘅三代同堂感覺最舒服。
至於點解我講左咁耐，都唔講下中銀，原因係，冇乜好野可以講，1000元果兩個頭完全係出左事，如果我係佢，呢個直頭係要砍掉重練嘅水平，其他都冇一張可取除左1000大件事，個人覺得100同20都突顯左中銀真係非能捉得住香港文化嘅根。原因係100元的粵劇，只有中銀是單純用一個花旦表達，而冇好似其餘兩間，用一個情節，有故事性地一個小生一個花旦一個劇目去表達粵劇藝術嘅精粹。最大最大傷害我感情嘅可以話係20元，因為香港飲茶文化係香港少有可以流到出外國嘅野，外國人講飲茶，一定係講香港。所以呢樣野真係香港人最熟悉，可惜，一考就考起左中銀。其實呢個問題，就算問一個牛頭角順嫂(只要順嫂唔係新移民)都會知道，飲茶真正嘅「意義」同「情懷」係乜，香港飲茶，主角唔係茶，係點心，你睇下中銀張圖，只有北方人先會以為飲茶真係嘆杯靚茶，呢個係飲茶第一層意義。而「情懷」則係個個都知，係家庭活動，最緊要係星期日，一家人齊齊整整去飲早茶，3間銀行一對之下，有一間就露左底了。
＊我特別想讚渣打(香港)ceo禤惠儀女士，佢講得好好，鈔票真係等於一個地方嘅卡片，透過睇鈔票可以知道好多呢個地方嘅交化，所以真係責任重大。
＊本人持有中銀香港(02388.HK)股份。
#渣打銀行 #匯豐銀行 #中銀香港 #鈔票
紙幣收藏 在 chou - 張明泉藏家的台灣紙幣收藏 - Facebook 的推薦與評價
張明泉藏家的台灣紙幣收藏. ... To connect with 收藏家-chou, join Facebook today. ... Jonker88 Banknote Collection 纸钞，邮票收藏～交流区. 3.4K likes this. ... <看更多>