《走到懷疑人生-鬼手岩遊記》
一直將鬼手岩放喺 wish list ，一來諗住 fit 啲先去挑戰，二來一聽到行程咁長途又艱辛，好難搵到死士一齊去。琴晚突然有股強烈嘅探險慾望，決定今朝一個人出發。
朝早瞓過籠，10點先出發，由洞梓慢跑3km去水壩當熱身，本來諗住食啲嘢先，但又未有胃口，於是空肚上山😅 袋裡面得幾塊餅同兩包gel，水就帶夠3L。
水壩至鹿湖峒係幾靚，但我跑住上，冇乜打咭。重點來了，鹿湖峒出咀方向，是延綿不斷大約5km茂密刮刮矮樹林，一邊走會一邊瘋狂刮你全身，又會勾實衫褲背囊同襪，我又大件，開入去簡直同破林冇乜分別，仲要個頭不下二十次撞到橫枝，撞到嘭嘭聲⋯開頭都會用手擋，但係你諗吓，5km都係咁嘅境況，我直情放棄對抗，由佢地勾爛曬啲衫褲。最大問題係冇得加速，焗住減速，即係我出返去食下午茶嘅算盤打唔響🤡
沿途跌死狗、鳳凰笏頂地勢險要，有幾段落山要手腳並用，頗考膽色。雖然累積爬升只有1600米左右，但上落非常急，對體能挑戰頗大，不過主要令人崩潰嘅，都係無窮無盡嘅密林，一個人行真係行到懷疑人生⋯
行到20km左右，終於到達咀尖，要喺極斜同鬆散嘅沙地急速下降130米，雖然有繩，但個人唔建議用，因為專心選擇點樣落腳會安全得多。
落到海邊仲要喺大堆大石上搵路去鬼手，大約一、二百米，我興奮得滯唔小心拗咗一下柴，好彩熱曬身，冇事，但大家真係要小心。
潮退時會有路兜過鬼手，但我去到啱啱潮漲，要攀過兩面石牆先過到去，最高嗰度牆有十幾呎，又係要小心。不過石上面有較多裂痕，所以冷靜搵位落手落腳，其實唔難。
終於到達鬼手，比想像中細隻，但潮漲又大浪，十分之有氣勢。鬼手前有個平坦嘅小石灘可以休息，但我怕日落都未落到山，所以只逗留了幾分鐘。
原路折返，又要面對令人崩潰嘅密林，仲要中途行錯路，又拖慢進度。個人開始攰，有幾次俾啲樹枝撞跌，好彩我肉厚，插唔傷，建議大家著返啲防刮衫褲。回程完全唔想影相唔想休息，一心諗住餐蛋麵同可樂，返到鹿湖峒前已經KO晒3L水，沿途完全冇補給，所以真係要慳住飲。
返到烏蛟騰已經天黑，原本路線係跑返洞梓，但精神肉體都頂唔住，又咁啱有的士，所以就喺烏蛟騰以33.67km完結，總共用咗7小時48分鐘，比我預計耐得多，但總算轟烈地解鎖另一個人生成就！
#鬼手岩 #trailrunning #孤獨hike #hiking #考牌路線 @ 鬼手岩
鬼手岩 在 鬼手岩- Explore 的推薦與評價
但大人細路都玩得好開心～ 除咗喺可以親身欣賞到多種海蝕嘅自然景觀外，大家仲嘗試分辨邊度係鴨洲嘅「鴨咀」同「鴨眼」，搭船期間仲見到「鬼手岩」添. ... <看更多>