《好好好戲》
前排多事，好耐都無心機睇電影喇。尋晚，終於都睇返。今次呢套係黎自韓國既驚慄片，叫《明天的回憶》，套戲上個月先响韓國上畫，仲攞埋首週票房冠軍！揀佢係由於套片既簡介吸引到我：「女主角秀珍响意外之後失左憶，但同時又多左種超能力，能夠預知即將發生既事，甚至見到佢老公志勛殺人⋯⋯」聽落有少少科幻，但就似我前排睇果套《一秒拳王》。所以，我都想睇下果幾分鐘既靈力用响驚慄片度會有咩火花。
因為睇左簡介，當然你一開波就會認定個老公係大反派，想睇下佢點潛伏响自己既老婆身邊扮野，點灌輸啲錯誤既記憶俾佢黎陷害佢。而更引人入勝既當然係女主角又點樣抽絲剝繭黎將個大話揭穿，最後尾報警拉左佢老公。過程中，編劇仲專登加插左幾件睇落同主線無乜關連既事黎誤導觀眾，令觀眾（至少我係咁）不停咁懷疑：到底個女主角真係有預知能力定有思覺失調乍？進而多次懷疑：其實會唔會佢老公先係好人呀？
如是者，套戲係咁扭，扭到我已經覺得：嗯，其實你停喺邊度，個老公到底係人係鬼都已經好正架喇既時候，個編劇仲未夠喉，竟然再殺多個男人出黎，話自己先係女主角既老公！果刻我直頭同個女主角一樣痴晒線！而劇情就由呢一刻鐘開始暴走至戲肉，再一步一步咁話你知：個女主角見到既嘢係真定假？邊個先至係好人？跟住有爆炸同打鬥既場面，有人死，有人俾人拉左，然後個結局竟然有洋葱！其中一個OPPA係大暖男！
到最後我想講一句：套戲真心好睇！冇鬼，但係劇情緊張超乎我想像！大家不妨趁星期日（落雨又唔出得街）搞搞佢。順帶一提：其實我覺得個女一徐睿知做得幾好既，佢個驚慌／愕然樣响套戲入面係加分既。可惜丫，聽講佢因為管得條仔（佢條仔金正賢）太犀利而被韓國輿論評定為「變態女友」搞到甩曬啲job，好似話呢套隨時會係佢既收皮作，大家不妨捧下場喇！
🙃
#明天的回憶 #迴憶 #韓國電影 #驚慄片
一秒拳王結局 在 一秒拳王- 劇透影評丨細節位逐個睇｜我哋對電影嘅疑問 的推薦與評價
可能抱住一個睇年度最佳嘅心態進場坦言我哋對《一秒拳王》真係有啲失望...不過!無可否認呢部電影真係誠意之作 相信會感動到好多香港人所以鼓勵大家 ... ... <看更多>