【#Nj評::〈作家的謊言：筆忠誘罪〉】懸疑有紋有路寫到水準／演員一流... Jeana夠核突
首先，兩個月前我經已看過試映，當時是燒山（蕭若元）包場請一些行內人／網民去睇，感謝他。而投資方電影公司hmv數碼中國係燒山個仔蕭定一旗下，其實我並不鄙視此公司出品，好多作品（肉蒲團／29+1／一路向西／壹獄壹世界／導火新聞線／棟篤神探...）好多時都能夠引起話題，這對積弱的香港電影有好大正面影響。其次係向西村上春樹第三次作品被改編電影，他的網絡文章一向好笑，上次《西謊極樂：太爆太子太空艙》除了結局太離題外其實都幾好睇，另外Netflix有得睇的《向西聞記》也是十分高質作品，今次走正經路線都有紋有路寫到水準。
.
這類打著懸疑燒腦旗號的故事，唔好意思講句好易拍得柒。柒個位係，好多時佢好認真去講故事，但相當兒戲的佈局又引不起觀眾興趣去思考，最後得無聊兩個字。《作家的謊言》劇本我唔敢講話一流精彩，主角進退兩難的處境描寫，的確達到令人想知故事發展下去會是怎樣的效果。而當然實有要批評的地方，例如最後的『射豬』太好笑好似拍多了，另外有些伏筆太明顯。相信故事規模夠小是讓人好好專心去思考劇情的原因，太多同類懸疑作品牽涉太多人走太多地方反而使得結構鬆散，今次恰到好處。
.
而小格局，自然不幸地因為錢少。場景來來去去幾個，主要在家，演員亦來來去去幾個。感覺上可以的話加多少少景會更好，不要太多。現在幾幕戲在同一酒吧餐廳內扮幾個時段拍，單調咗啲。不過我真心欣賞演員表現，監製兼主角張建聲，過去很多演出如咸濕仔黑幫老闆都演得好演得落力，今次不例外，亦親自找資金拍戲是做實事之人。另外日本代表松岡李那走到香港搵食好似都是這個年代少見，她努力學廣東話去演足全程好勁，好淫好入戲。最大驚喜係Jeana何佩瑜，她一向走靚女路線，戲中個樣超核突懷疑冇化妝，放低形象演得放盡去配合角色。我一向對她的印象認真麻麻，但今次不得不認同她的付出。再另外農夫兩人繼續搞笑，至於個個都話因陳國坤罷睇，算啦你唔講我都唔記得有佢，根本大茄一個不足掛齒，無必誤殺良民錯過有心製作又幾唔錯的電影。
.
反而想講講陳浩民，好似都好耐無在香港大小螢幕見到佢。其實我事前完全不知道有他參與，睇完都認佢唔到，但我非常歡迎這次回歸。不過角色寫得有點怪，造型上實在太典型探長，本來好認真的一件事立刻卡通化。另外每每他出場便煞有介事，講些話來推進劇情，無問題，不過真真正正描寫這名角色可以話無。最後他只用來引導觀眾思考並沒有自身吸引的地方，假如可以讓他和真兇多點正面鬥法便更好。我寫咁多，都係想大家去支持下，感受到整個團隊的誠意，感受到張建聲為電影不幸在此時上映的無奈，更因為豬隊友錯時間亂發噏風而連累成村人真係慘上加慘。
.
*追蹤instagram【 madman.movie 】有你著數！
*// https://www.instagram.com/madman.movie/ //
*
*讚好專頁【 電影狂人-影評情報交流平台 】緊貼最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan
.
作家的謊言：筆忠誘罪 Deception of the Novelist hmv Digital China Group 張建聲 Justin Cheung
