［韓國樂天一度升20%，因為創辦人香咗］ 呢個應該獨家啦掛
1. 之前貼過了，曼聯一炒摩連奴股價即升，微軟同Tesco之前炒CEO都係咁。呢啲就係市場對CEO能力嘅評價（http://bit.ly/2BT8pPC）。
2. 正如麥當勞個CEO 好地地，上任前5年股價一路跑輸指數，佢上任後就跑贏，但就因為搞同事而走咗（http://bit.ly/2RbRDmR）。當時股價反應都係負面，訊息就係：呢條友做得好地地，真係可惜（或冇天理）
3. 不過，如果係創辦人，家族財閥生意，又另一種講法。之前（http://bit.ly/2BT8pPC）都見到，756老林生林偉駿一死，股價即時飛天。就應該唔係覺得佢做得差，而係估賣盤，私有化之類
4. 正如今日呢隻嘢都係，樂天嘅創辦人香咗。各大傳媒都有報，但冇乜人講股價。外國都唔多
5. 照計，辛格浩（日藉韓人，日文名重光武雄）99歲，笑喪，亦都一早退咗落嚟，對公司應該零影響。但大家知道啦，東亞儒家文化圈嘅嘢，老嘢一日未走，好多嘢都睇佢頭唔做得。老嘢一走，券商就估樂天會加快各種整合，或者精簡架構，例如拆隻樂天酒店出嚟上市咁
6. 亦都有報導有講，至此，韓國五大財閥嘅創辦人，全數歸西。邊五大？就真係一定係嗰五大，好似仲會分先後：三星（李秉喆），現代汽車（現代集團鄭周永，留意好多其他現代公司已經冇直接闗係），SK（崔鍾建，SK一名嚟自鮮京織物，朝鮮東京），LG（具仁會，L for 樂喜Lucky，G for GoldStar金星，所以LG就係樂金），仲有樂天
7. 又，韓國樂天同日本樂天Rakuten就真係冇關係的（應該冇），正如英國Prudential 同美國Prudential保德信亦冇關係（好似冇），中國嘅ICBC同台灣嘅ICBC都冇關係—但台灣上海商業儲蓄銀行，大陸上海銀行，同香港上海商業銀行就有啲關係！
8. 樂天個名，Lotte，嚟自……德文！少年維特的煩惱，Charlotte夏綠蒂。
9. 樂天，最出名嘅業務，應該就係熊仔餅，細細個就識。另外留意佢啲小食全部都係抄日本包裝，根本就係咁做，反正樂天最初其實係日本成立之後先反攻韓國，好似郭富城（！）咁，香港人在台灣紅咗先反攻香港。當然去韓國就會知有酒店有戲院有主題公園有快餐店有汽水有百貨
10. 樂天近年啲股價都認真麻麻，而家係高位（2016）一半，而家股價仲低過10年前。都係嗰幾味啦，爭產呀，兄弟唔啱呀，行賄逃稅呀，呢啲都係韓國（其實全東亞都係）財閥指定動作。不過樂天比較獨特嘅係當年仲畀中國抵制，因為薩德系統。
11. 仲有單花邊，辛格浩當然三妻四妾，十分正常，企業家有錢人，仲要嗰個年代。咁離開個正室再娶都唔出奇，而佢娶咗個日本妹都唔係咩出奇—但佢第二任老婆係重光葵嘅外甥女。
12. 重光葵乜水？甲級戰犯，重量級人物。連日本投降都係佢簽（你以為天皇簽？），亦係佢刮咗溥儀出嚟成立滿州國。不過此人雖則戰犯但冇死到，戰後繼續受重用，做埋外務大臣。辛格浩同樂天亦都因為咁雞犬升天。
13. 呀仲有，你見有啲報導話辛格浩99歲，又有話97歲。呢個就涉及韓國人計虛歲嘅問題
