［金融101］［香港有水到！］事先張揚！真係大師冇點你，我冇乜見有人講。當然我在收費專欄上星期已講咗，而家先在呢度講，保障返課金讀者。未課嘅記住幫手。
1. 講返，少少標題黨，但真係冇呃你。
2. 上半格呢舊咁嘅東西，除咗睇本地銀行股嘅行家，或者金管局職員，或者各大銀行做Treasury 之外，應該冇人會睇。而再三強調埃汾正係做Treasury出身，剩係呢樣都比絶大多數其他評論員有資格講。當初真係估唔到蕉行嗰年半經驗咁有用，「好似教主去上書法堂咁」。
3. 講返，係咪冇媒體報？係有嘅。但呢啲咁悶嘅新聞，冇乜人睇。但其實各大傳媒都有報（金管局啲新聞稿？）（https://bit.ly/3cg7Jnb）。信報寫到明，銀行結餘將增至740億
4. 咪就係，上半格，我圈住咗嘅數。由540億，升到740億。冇花冇假。升四成喎！唔係細數目，對不？
5. 然後你心諗，嘩，香港銀行體系結餘得嗰540億架咋？咪李嘉誠副身家四份一都冇（誠哥講緊大約300億美金身家）。計下數，得540億，香港800萬人，咪每人拎7000銀就提晒！（當得200萬人響應，都係每日提三皮嘢）。
6. 呢個謬誤，舊年咩提爆香港體系時常見。錯在邊？好簡單，邊個話你提嘅錢係嗰舊「結餘」，根本就兩個概念，完全唔明點解有人覺得間分店得一個魚柳包我去買兩個人地就會執笠。FYI，香港銀行體系嘅「存款」，港紙講緊70000億，外幣亦都係大約70000億港紙等值，夾埋係14萬億。你提嘅係呢舊東西。
7. 係喎，14萬億嘅存款，但成個銀行體系結餘其實540億。好似潛烏龜咁，根本大家 net net ，你諗下呢540億，其實可以話係idle嘅，銀行當然唔會放得多，有剩嘅都放出去，平價貸款又好，拆畀同業又好，乜都好。
8. 講返，做乜個銀行體系結餘會大升？有啲technical，但你睇返信報段文，咪有講甚麼減發外匯票據咯。見唔見我張圖圈咗EFBN？Exchange Fund Bill and Note是也。呢啲就專業啦，好心睇少啲鳩文啦。
9. 某程度上，你可以當EFBN係收水放水嘅工具，金管局發呢啲東西，銀行去投（同美國投國債有啲似），價高者得咁。投嚟又有息收，另外仲幫到下盤數，滿足啲各樣監管需求（呢啲太複雜，不講）。
10. 咁你話係咪金管局放水？減發喎。一半半，你可以咁理解。但金融101話你知香港行聯繫匯率，金管局做嘅其實好有限，只係順手推下咁解。
11. 成件事個源起，當然就係因為美國大放水，而港紙拆息一直高過美金，所以你見咪吸引資金流入套利—個做法就係借平息嘅美金，存高息嘅港紙。咁人人搶港紙，港匯就當然強啦，早排三年新高添。早排咪寫過，睇多次啦（https://bit.ly/34vVUXc）（http://bit.ly/2VThJO5）
12. （呢段嘢我一年打幾十次，倒轉都識打，反正以前在蕉行同啲新仔解我都係咁講）
13. 好啦，明啦嘛？基本上係因為美國減息，香港拆息高，錢咪流入港完，最後入埋銀行體系結餘咯。
14. 有幾多？咪話升咗四成。返返去一年前嘅水平咁咯。
15. 當然了，又唔使太興奮。你知我呢啲唔玩嘩眾取寵，更唔寫埋啲好似吸引但錯嘅嘢。銀行體系結餘升，等唔等於股市樓市升？答案係，冇乜咁嘅關係。
16. 應該會再寫，但畀個簡單數字你：呢個銀行體系結餘，由2016年開始，每年都係跌嘅。由4000億跌到而家540億。咁但，你有冇見層太古城跌咗九成丫？
17. 況且，講明啦，年年個結餘都跌的，但樓就年年升，同時間，股票呢？2016年冇乜升跌，2017年升到七彩，2018年大跌，2019年小升。但年年個銀行體系結餘都係跌架喎。
18. 所以，早兩年啲人開心大發現話我知銀行體系結餘跌就代表股市跌，我當然話戇鳩。咁同樣地，今次銀行體系結餘升，都不代表股市實升嘅。
19. 當然，又可以睇下M2嘅情況。又講時講，大陸嘅M2增長，靜俏俏地又上返雙位數啦噃。
20. 記住，你話hard sell都好，以上呢啲，收費專欄寫咗的。根本個圖都係嗰度cap出嚟，而家讀者人數不錯，但暫時都未夠維持呀埃汾嘅基本生活（例如個個禮拜打返次高流灣，一年去幾次日本，最好去多幾次韓國，又去次歐洲咁）。所以繼續努力。
——————————————-
版務：收費專欄已推出，支持埃汾高質文章。幾舊水睇三個月，一星期三篇
請去呢度訂：bit.ly/2wVXndj
課程編號填: CC01
科咗水後後有Login及Password畀你
逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。
七彩魚生做法 在 冼佩瑾- 小瑾Celeste Syn - 初七撈魚生- 想起之前在台北過年專訪 的推薦與評價
七彩魚生 是由九江魚生演變而成，近日也有用鮭魚生魚片。材料包括魚生、生菜絲、西芹絲、紅蘿蔔絲、沙葛絲、黃瓜絲、紫包菜、薑絲及花生碎等，醬料以酸梅膏加桔子汁添 ... ... <看更多>