「港唔斷戲」第38屆香港電影金像獎
九大獎項個人心水分析
（究竟寫唔寫到九篇...?）
—
（5/9）「最佳女主角」
提名名單：
1.曾美慧孜《三夫》
2.蔡卓妍《非分熟女》
3.余香凝《非同凡響》
4.Crisel Consunji《淪落人》
5.張靜初《無雙》
—
最後選擇：曾美慧孜《三夫》
—
毫無疑問，我心目中今屆嘅香港影后，絕對係《三夫》嘅曾美慧孜。原因唔複雜，就係如果《三夫》小妹嘅角色比另外幾個提名人去演，究竟做唔做到？唔好話演唔演到，其實我連想像都無法想像。曾美慧孜嘅功力，甚至喺呢幾年亦必定係絕類離倫嘅一個，就五年計，應該只有《踏血尋梅》嘅春夏可以一戰。
—
拎影后嘅第一因係犧牲，雖然喺影像運用上《三夫》並唔算特別大膽，但意識上處處都係對觀眾嘅挑戰，有論者云《三夫》電影剝削女性，好多位無必要咁拍，扯到去父權、沙文主義、厭女等等。而根據了解，呢一種「非必要」，究竟又係咪透視緊另一種「必要」呢？睇咗唔少《三夫》嘅訪問，小妹嘅角色無乜香港人願意／啱做，但陳果導演最後揀咗曾美慧孜，亦一拍即合。所謂剝削，我諗要睇返演員同導演之間嘅角力，而不足以外人道也，唔應該靠估。某啲情節畫面非必要，唔通今日香港人被肆意抽插，又係一種必要咩？《三夫》又可唔可以試圖以畫外音呈現緊呢一種狀態？
—
講返曾美慧孜，除咗裸露或者癲狂情節上嘅犧牲，為咗演出角色，佢亦要增肥，摧毀自己嘅身體同靚女嘅形象，相比之下，呢種犧牲比其他提名人實在重大得多。但演戲又係咪鬥犧牲呢？除咗犧牲，小妹嘅演技亦去到爐火純青，亦試圖顛覆咗觀眾對於演技嘅想像。曾美慧孜喺作品入面純用表情、身體語言、肢體動作，同埋「語音」做戲，但演出仍不乏層次，有慾求未滿、有滿足、有厭惡、有迷失、亦有絕望，再重新上路，繼續飄泊。渾身是戲，忘情演出，影后必然之選。
—
因為太超班嘅關係，其他提名暫且不贅。
三夫電影 在 情慾電影《三夫》女主角曾美慧孜變「色」為攞奧斯卡 ... 的推薦與評價
【金像獎大熱影后 】 要「癡癡地」先可以拍#陳果導演嘅戲？！ 《#三夫》女主角#曾美慧孜以大熱姿態殺入#香港電影金像獎！已經奪得多個影壇殊榮嘅小美 ... ... <看更多>