<幼稚園工作真係你理想？>
打份工，
最緊要準時放工，
Work life balance ，
最好就人工高，
假期多，
工作量輕省。
如果你覺得幼稚園可以符合以上嘅條件，
咁你可以唔使入行啦！
因為做幼稚園，
唔係打份工！
你問我咁係咩？
就係燃燒青春同生命！
幼稚園老師，
唔係輕鬆嘅工作。
我哋日日面對住廿幾三十個小朋友，
要確保佢哋零損傷、食得好、整整齊齊，
少啲眼力同警覺都唔得
佢哋手指有一點傷都要知，
因為每個小朋友都係家長嘅寶貝，
一放學家長就會舉鉅細無遺咁檢測個小朋友，
你一定要快過個家長發現呢啲問題！
仲有蚊叮啦，衫攝得唔好啦，少少顏色啦，
全部都要處理好先可以放學架！
遲收工，
已經唔係新鮮嘅話題，
即使你被迫收工
（學校揸匙人要鎖門、老闆逼你走等等原因），
其實都只係將啲工作帶返屋企做，
你問我有冇咁多嘢做？
10個有10個都答你一定有！
反思、教案、活動計劃、活動報告、兒童發展報告、持續性發展評估、相片分析、功課簿格式更改、老闆突如其來嘅要求等等……
一直做，做到星期日，
又到返星期一，
無了期循環……
到有一日你真係可以準時放工，
你又會懷疑人生，
懷疑自己有冇嘢做漏呢？
懷疑點解可以準時放工呢？
當你見到其他班嘅同事仲留喺度嘅時候，
你嘅忐忑感會更加大，
你話咁樣係咪犯賤啦？
係呀，就係咁犯賤！
個個都話小朋友係天使👼🏽👼🏽
係架，佢哋唔激你嘅時候確實係天使！
你問吓啲家長🙋🏻♂️🙋🏻♀️
小朋友係唔係時時都係天使？
係班房入邊，
其實都幾似侏羅紀公園嘅生活，
小朋友聲量之大唔再話下，
加上佢哋無端端會暴走，
有時候會忘記咗規則，
玩得開心嘅時候唔知點解總係會令到玩具跌晒落地下，
粉彩跌落地有一定會用腳去踩到碎晒😱
講真，
咁樣嘅情況其實好常見，
亦都係好正常，
如果小朋友一入嚟已經識得所有規則，
就唔使嚟幼稚園學習啦！
嚟到幼稚園，
最緊要就係學習常規同自理，
呢兩樣野其實比起學術上面嘅嘢係重咗要好多，
做幼稚園老師，
你嘅責任就係教識小朋友常規同照顧自己，
當後期你見到佢哋嘅進步，
真係會由個心到笑出黎！
所以做得呢行，
真係要好有心理準備，
小朋友初頭就係咩都唔識，
係要由你一手一腳去教佢哋，
佢哋瀨尿、瀨屎、
倒濕左枱面仲玩枱面啲水、
講嘢大聲、冇常規、
唔識排隊、唔識橋腳仔坐，
呢啲全部係要你教出嚟！
直到工返佢同人相處、寫字姿勢、
識唔識教學內容等等，
呢啲全部都係你教出嚟。
返呢份工，
唔好淨係為咗人工同假期。
如果你睇完我講嘅嘢，
你有所考慮嘅，
我建議你諗清楚，
因為，
真係唔容易做㗎！
各位在職嘅同行，
加油！
一直以來辛苦晒，
多謝大家一直努力！
各位將要入職嘅同行，
無忘初心，
未來有好多小朋友等緊你，
希望大家都盡力，
同路人會一直大家互相支持！
考慮入行嘅你，
請你真係考慮清楚，
我哋嘅工作唔係為人工同假期，
如果你只係為呢兩樣野，
請你去讀過其他科目，
我相信一定有其他科目更加適合你！
大家！
加油！
#幼稚園老師
#不斷學習同反省
#唔好為咗人工同假期就入行
#唔係你想像中咁容易
#VVinnie


不斷學習同反省 在 不斷學習，實踐，反省，改進，突破自己 - Facebook 的推薦與評價
Facebook. facebook · 2. 1. 2. 4. 1. 不斷學習，實踐，反省，改進，突破自己. Loading... Try Again. Cancel. Loading... Loading... ... <看更多>
相關內容