《電競與運動》陳心遙
《信報》2017年8月16日《視線所及》專欄
最近睇番新聞先知「電子競技」成為2022亞運的正式項目。睇趨勢，提倡「電競」成為一個產業的確大有可為。有一份來自荷蘭嘅市場研究報告話：全世界電競經濟產值喺2017年會達到差唔多7億美元，2020年會到15億美元。的確係好驚人。一向睇錢至上嘅香港人冇理由唔諗辦法分一杯羹嘅。啱啱舉行嘅第一屆電競音樂節大受年輕人歡迎，就知道呢個「產業」真係有未來。
如果話扶植電競成為香港一個真正賺錢嘅產業，大家唔反對，問題係點扶植呢？鼓勵多啲人打機？多啲人欣賞打機？定係多啲人投身設計遊戲程式嘅行列？三個方向都好唔同。其實最令我大惑不解嘅係，將「電子競技」定為「體育運動」呢件事上面。
我讀書時候都鍾意捉棋同打橋牌。早喺1995年同埋1999年，國際奧委會先後認可「世界橋牌聯合會」同埋「世界國際象棋聯合會」成為「國際體育聯合會」（International Sports Federations）的成員之一，換言之認為橋牌和象棋屬於運動。此後兩會一直向奧委會爭取橋牌同象棋成為正式奧運競賽項目，但當然極具爭議性。
一直以來，贊成者將棋牌冠以「思維運動」（Mind Sports）嘅稱呼，有公平競爭成分、有嚴格規則、有體力同專注力要求、有嚴格訓練制度、合乎體育精神等等。反對者則認為，當仲有很多類別的球類運動、搏擊運動等，都仲未成為奧運項目，而目前奧運項目已經太多，多到好多國家都吃不消嘅情況之下，奧運應該留番去表揚同提倡至少用體能去進行嘅項目上面。
其實電競應唔應該成為「運動項目」嘅爭論都係類似。睇番橋聯同棋聯，其中一個動機就係想透過爭取成為奧運項目，達到提倡更多人玩，同有業界更多收入嘅目的。電競目前已經係如日方中，其實仲有冇需要同好多資源緊絀嘅運動項目去爭資源呢？
另一個我唔理解嘅就係，邊個去決定咩電子遊戲成為競賽項目呢？邊個電子遊戲成為項目，同某一兩間公司嘅商業利益就係直接掛鈎。同橋牌同象棋，或者游泳唔一樣，作為一間商營公司，你可以推出啤牌、出棋、出個波、出件泳衣嘅產品，但你冇辦法包攬成個項目。但係電競就唔一樣，成為奧運認可項目，最直接得益嘅，唔係電競運動員，而係某一間遊戲軟件開發商，咁試問要有幾多個項目先係公平呢？
另一方面，遊戲係興一時嘅，我全力操練一種遊戲成為運動員，世界五年後仲係玩呢種遊戲嗎？我半生操練游水退役後可以做教練。玩電競可以嗎？
#電競與運動 #電子競技 #電競 #奧運 #亞運 #電競音樂節 #信報 #陳心遙
