【龔成問答信箱】（Q17441-Q17460）
Q17441：
龔sir我有一個頗特別的問題，就係好認同你既理念，創富方程式 ，閱讀學習財務知識，不短炒長期持有優質股等等的理念
但身邊沒有朋友跟我「並肩作戰」行呢條致富路，有時想同知己分享/互相監督進度都沒有對象，感到好孤單，身邊大部分朋友都係停留係短炒
財務知識都唔學，什至不儲蓄既階段，我知道時間過左 我同佢地差別會好大，我想有戰友一齊贏，呀sir你有無曾遇過呢個情況
龔成老師：
我過往都有類似的情況，因為坊間的人都只會短炒，但我從過往銀行工作中，知道咁樣唔會賺錢，但朋友唔會聽。
你好難說服到佢地，你只有做好自己。
就算我過往同家人、同朋友講，我一定會日後賺到過千萬，佢地都唔會理你。你講唔到，你只有「做」！
講是無用的，你只有做到比人睇，佢地會會信你，所以，你唔好理其他人，你只有做好自己就得，成功者往往都是獨立去做，有時的確無戰友，但成功人士就是與別不同，你要明白這點。當你的世界觀增大後，就唔會在意這些事。
------------------------------------------------
Q17442：
老師，你最後一堂講自己，講到我眼濕濕，我都係80後，當年家道中落，由私樓轉到板間房，住了7年再搬到公屋，真係一直願望好想有自己一間房，都有埋怨家人點解搞到生活環境咁差，成績一度滑落，最後連大學都入唔到。
好彩之後工作順利，收入穩定，改善家庭生活環境，但卻令我走入另一個漩渦，但因為生活實在太忙，加上有左小朋友，要付出時間照顧佢地，而且開資也大，生活逼人。所以真係好想早日財務自由。
好彩之前有空可以報到你既course。我覺得自己可能掌握到6-7成，市盈率市漲率部分應該無問題，反而年報第七堂未能掌握。我可能要溫習一下先可以再上你進階。
龔成老師：
香港生活環境從來不易，家人好多時已盡佢地最大的努力，有時都無計，我地只有自己努力，這就足夠。
你已經行在正確方向，之後保持進行就得，我相信大家都可以完成到夢想的！
進階班是基礎班的延續，如果你掌握到7成，有信心就可報，如果未得，就遲少少先，反正我會不斷開班，你可以利用這段時，溫翻基礎班的知識，同時試下自己分析年報，實戰，用「企業評估表」。之後先報，遲D見啦！
------------------------------------------------
Q17443：
龔成老師你好，本人54歲，有一物業要供，現欠銀行約180萬，收租可cover供款和雜費。另一車位出租但回報很少，只收2100元。
現持有股票包括：
5：3225股
11：2000股
3988：100,000股
2628： 5000股
現金60萬，每月可儲3萬，請問我這年紀，應如何分佈資金？請請指教。
龔成老師︰
由於你已經接近退休之年，我地策略上會保守一點。我建你3萬用一半作月供股票，比重係50%在平穏增長股，50%在收息股。而餘下一半資金先儲起，等待機會。
平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（0823）、港交所（0388）、深高速（0548）
收息股︰港燈（2638）、香港電訊（6823）、工行（1398）、匯豐（0005）、置富（0778）、陽光（0435）
由於現時大市只在初步平宜區，你60萬資金同樣可以先投入一半，用"分注"形式買入上述股票。餘下一半和每月儲到的1.5萬，就待大市出現較大程度的下跌，才大力度掃貨，然後長線投資。
但有一點你要留意，你現時組合中銀行股佔7成多，出現一個嚴重過度集中的風險。當銀行業出問題，你個組合就會被受重挫。所以，你投入的60萬現金不要買銀行股了，但月供部份就無這個限制。
------------------------------------------------
Q17444：
老師，月供股我都有HSBC 5號，2388，0003 各1千，2800 2千
1手手買嘅就keep有9988，1928，0778
因為來緊要供樓比預期多，所以短期內月供只會維持5千
諗緊cut左5號去去供2800好嗎？
謝謝老師麻煩你給意見了。
龔成老師：
如果你供樓的金額要較多，就要減少小月供股票，同時持有部分現金。
由於上述有兩股都是銀行股，因此減少其中一隻是可以的。如果你想供款匯豐（0005）轉盈富（2800），可以的。
基本上上述的方向可保持，但股市波動，你點都要同時留有現金，等機會入市。
------------------------------------------------
Q17445：
請問老師有無投資其他市場嘅股票 例如美股或者歐洲股 去平衡/分散返係香港市場嘅風險？
另外請問老師會唔會考慮開一啲係週末/網上舉行嘅班？
週中個時間對學生同一啲在職人士比較難遷就
純粹想分享一下我嘅個人意見 麻煩曬老師
龔成老師：
我自己暫時集中在港股，始終自己較熟識港股，集中投資可以有最大回報。
當然，你可以投資其他市場，只要是優質股、你熟識的企業，就可以。這可以令你的組合更環球化，風險可以平衡。如不懂選股，可投資相關的ETF都得。
我年尾應該會開一次星期六班的，你可留意，或whatsapp 55457212 ，打「留位星期六班」，同事有資料就會whatsapp你。
至於網上，就暫時唔會。
因為之前實體班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。
------------------------------------------------
Q17446：
你好，我最近看了你兩本書，股票勝經同80後的百萬富翁，學到吾小股票基本知識，所講都係尋找優質股票同長線持有，書中所提及到在股市狂熱時先放一部分，咁如何分析股票高出其價值，同埋如何尋找優質？
想學習填寫企業評估表，希望等待疫情過後
能夠上你的堂
龔成老師：
賣出股票，我地會睇兩個因素，第一，大市或個股已進入了狂熱期，例如全民皆股等等的指標，股票班會詳細教。
第二，進行企業估值，當股價已超過企業價值時，就可以賣出一部分，當然，我地會偏向長線投資，愈優質的股票就會愈偏向持有。但如果真的好貴，賣出部分都是可以的。
我課堂有「企業評估表」提供比學員，6頁紙，十分有用，可以有系統去評估企業的質素。希望遲d在課堂中見到你。
------------------------------------------------
Q17447：
龔Sir ,買左你本50隻潛力股，我想起0002 中電同1038長建中，揀一隻月供，現時我見1038較平，但你書中顯示中電的優質程度5>4長建，所以想問一下你意見
我33歲，想增長同收息同步，其他月供緊有66,12,823,2388,2800,1810,1928 , <-這組合再加0002 或1038
另外都買咗你新作5年買樓4步曲睇緊
龔成老師：
中電（0002）與長建（1038）都是有質素的股票，都可以選。其實好難話選那一隻好。
如果能承受風險，可以長建，佢由於歐洲業務較多，因此中短期會較弱，但值博率反而會高少少，不過就要睇你的風險承受能力。
不過，長建始終只是收息股，業務增長力比過往弱左，只是平穩型。
你現時持有的，都是有質素的股票。
加入中電或長建其實都得，穩健D就中電，想值博率高少少就長建。
《5年買樓4步曲》，記得跟書的指引去做。
------------------------------------------------
Q17448：
1895我在上市時高位接近$4元買入約10萬
經歷到$1.1，到昨天價位升回$3.5，想問這隻股票質素，現時是否合適時機考慮賣出？
龔成老師：
我地最重要是睇佢的業務價值，長遠發展。
鑫苑服務（1895）本質不差的，業務穩定，現金流不差，其實有持有價值。如果你持貨佔你組合比例不過多，可8以守。
如果太多，就要當見到有較大上升時，賣出部分，以平衡你的組合風險。
這企業規模細，股價上落大，這都是風險，加上背景因素不及其他行業較強者，因此投資都唔能夠太大注。
------------------------------------------------
Q17449：
老師你好！本人44歲，去年年尾被裁。但由於幾年前患病，需要經常出入醫院，所以打算明年等環境好轉才開始尋找新工作。
本人有一已供完物業自住，有$120萬現金但並冇任何投資，而現時月支出大概$12000-15000。因為對投資完全冇概念，想請問我嘅投資方向應該點樣分配，月供股票 + 部分直接購買？邊啲股票適合我呢？
由於身體狀況，如果明年再有工作，收入大概會在$15000-20000左右，而我希望55歲以後可以「退休」。多謝指教！
龔成老師：
由於你現時無工作，在理財中應該較為保守。就算有資金，都應該有一半持有現金，只能部分投資股票。
你可以考慮穩健的「平穩增長股」及「收息股」，如果你較保守，就收息股比例較多。
平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（0823）、港交所（0388）、深高速（0548）
收息股︰港燈（2638）、香港電訊（6823）、工行（1398）、匯豐（0005）、置富（0778）、陽光（0435）。
另外，以你的情況，建議你多增加投資知識，在選股、企業估值、投資時機上落功夫，對你長遠財富有好大影響。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
至於之後你收入的策略，可以等你有具體工作再分析。
------------------------------------------------
Q17450：
龔成老師你好 請教一下 我今年二月開始月供股票 根據當時你建議既組合2800-$2500、0012-$1500、0027-$1500、1211-$1500
問題1- 比亞迪升左甘多會唔會唔再適合月供 需要停一停？
問題2- 如果想將個組合變得更進取 有何建議？
感激
龔成老師：
1）你現時所月供的，都是有質素的股票，基本上可以保持。長線進行就得。
月供是一個長線策略，就算有時在合理區頂，都可以照供，因為長期會將買入價平均。比亞迪（1211）在$8X你可以停一停，以下的價就可以保持月供。
2）如果你進取，可以加上阿里（9988）、中生製藥（1177）去月供，當然，這些股都唔平，因此注碼唔建議太多，同時你都要明白當中的風險。
------------------------------------------------
Q17451：
老師，請問670，1055近期跌了不少，應否繼續持有或沽出，有否中長線投資價值，感謝
龔成老師：
航空股本身的投資價值不算高，加上經濟與疫情上，都令佢充滿不確定性，就算股價下跌，也不太建議投資。如果你持貨較多，要減，如不多，可以等反彈賣出。
------------------------------------------------
Q17452：
依家舊經濟股系5系已經玩完？地產，房托，銀行，公用股系5系已經沒左投資價值？日日都系咁跌
龔成老師：
傳統經濟點都有價值的，不過增長力就不及新經濟，但新經濟的風險都唔少。
由於疫情對傳統經濟有較大影響，因此市場較負面，不過在長遠計，其實點都會慢慢好轉的，作為投資者，要有長遠的眼光。
------------------------------------------------
Q17453：
我23歲，現時剛剛畢業 搵到一份工月入 16000
沒有任何保險
但要比家用 媽媽要求要比 5000 我想30歲前 達成月現金流。並積蓄望有500,000或以上 ，有什麼方案可以達成？
另外我現時覺得小米 幾好 想入手 應入手多少
5000蚊個個是家用
雷蛇也有興趣
龔成老師：
你這個年齡，是財富增值的黃金時期，要好好把握，盡你一切的力量去儲蓄、投資、學投資知識。
你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，你可以小注潛力股。
建議你每月利用月供，或儲蓄準備投資的方法，每月儲$3000-$5000，你無本金就無可能完成到目標。
之後，可以投資盈富（2800）等較穩健的股。同時，可投資一些潛力股，雷蛇（1337）業務是潛力股類別，不過發展不太好，暫時仍未有太大成績。不過你小注當買佢將來發展，是可以的。
至於小米（1810），都是潛力股類別，現價在合理區中上部，小注都得。
如果要完成目標，你要提高收入，這才是關鍵因素，正職收入的長遠提高、兼職、小生意，都是你要思考的方向，23歲是你的黃金期，你要好好把握。只要你在收入上有突破，30歲有$50萬無問題，可以推目標上$100萬以上。
------------------------------------------------
Q17454：
阿Sir,現在上緊你的堂，獲益良多，多謝！
但想問問我男朋友早年前以$2.4高位買入1508中國再保險，想問應否止蝕或應該如何部署？Thanks!
我男朋友現有股票如下:
[email protected] 買入(ard$50萬)
騰訊@261買入 (ard$50萬)
中國人壽 （打和）
建設@5.x (ard$20萬）
佢現在考慮好唔好一次過清晒倉先當打番（同1508蝕個d）。
但我唔知有無理解錯老師你上堂講優質股升一倍放一半。如果一次過放晒騰訊但其實係優質股而手頭上變晒現金我覺得都好似又唔係好合適？唔知老師你有咩高見？唔該晒！
龔成老師：
首先，你地唔好太著重買入價，這只是一個心理因素。
你要睇翻個股的質素，決定去留，決定持貨多少，較有質素的，佔比可較多。
中國再保險（1508）賺錢能力有向下情況，但不是完無質，但這股佔你地投資組合比例較多，宜減持一半，餘下守住先。
至於騰訊（0700），有質素，其實可持有，在$500以上略貴，你減持小部分可以，但如果本身都打算長線，就算持有都無問題。
中人壽（2628）都有質素，但比過往年代質素略有減，因此都唔建議太集中。
至於建行（0939），只是收息股，唔好對股價有太大期望，你要睇下是否適合你地投資。
另外，建議加入其他優質股建，建立更平衡的組合，唔好太集中在幾隻股票。如無心水，可加盈富（2800）。
------------------------------------------------
Q17455：
我2008年入了些2899紫金@8，我想趁現在金價升便沽出，
換去1830必瘦站
或788鐵塔
請問你有什麼意見？
繼續持有2899？
換馬去1830？788？或其他更有潛力的企業？
6869的合理和便宜價是多少？
謝謝你的回覆
龔成老師：
紫金（2899）始終是商品企業，質素不會是最高類別，賺錢能力會較被動，你賣出是可以的。
至於轉鐵塔（0788），可以，這股有質素，可長線。
而必瘦站（1830），雖然都可轉，但注碼要相對較少，香港因素始終有不確定，股價上落會較大。
長飛光纖光纜（6869）現價合理，不過增長力就不算好強。
------------------------------------------------
Q17456：
你好，成哥，我係你上年年中的股要班同學。感謝您用心的教導，令到我這年財富也增值不少。
見到你出新書，我當然也成為你的捧場客。
關於置業，我也有一個問題，向你請教。
本人為80後，努力工作儲錢及投資，現在約有200萬資產在手，以大量股票及外幣現金為主。
以200萬來置業現在有兩個選擇：
1。用80-90萬左右，買800萬的單位，做9成按揭
2。用200萬，買1000萬的單位，做8成按揭
以上兩個以我現在的人工都可以通過壓力測試的。
當然我明白一分錢一分貨，（800萬其實好難買到市區樓放租）
但同時也是風險的問題。
求指教指教！謝謝
另一方面，我持有的股票都是優質股，例如1177，388，如果要賣出去做首期，如唔係好捨得
應該點樣選擇好呢？
龔成老師：
比較好的策略，是投資$800萬，你可以餘下更多的現金與股票，之後有更大的財富增長，而不是只集中在「物業類」。對你的財富平衡會較好。
我相信$800萬要在市區找優質盤，仍是可以的，只要唔好太新，呎數合理，地點適中就得，並不是無選擇的。
當然，如果你心底好想買$1000萬樓，我認為都可以，但之後要加強翻股票現金方面的部分。
------------------------------------------------
Q17457：
想請教多一隻股票，比亞迪市盈率似乎偏高，是否因為市場比較睇好？8X是偏貴？
如幾十年後其他品牌也轉電動車，如寶馬Benz，會否削弱比亞迪的競爭優勢？
龔成老師：
比亞迪（1211）是潛力股，在估值時會比較困難，因為市盈率是一個「過往」的數據，而潛力是睇重的是「將來」，所以，當進行估值時，都會考慮較多「將來」的因素。
這股以現時的業務與規模，去到$8X就開始進入貴的水平，不過，潛力股值得長線的，因此在這些水平，可以賣部分，餘下就留作長線。
至於其他車廠，多年後的確會轉電動車，因為好多國家如中國，都定目標長遠會淘汰傳統車。'
而比亞迪的優勢，就是電池的技術，這個技術會令好多無技術的車企，要同比亞迪合作。即是佢是「賣電池」，因此，只要整個電動車市場不斷發展，而佢在這方面擁有領先的技術，佢就會好有價值。
------------------------------------------------
Q17458：
龔sir你好！小弟今年28歲，由2018年8月開始進行月供股票，月供媒氣同盈富各供$2000同$3000，直到4月份加碼，各供$3000！另外5月又供多隻比亞迪月供$3000，但現在發現媒氣不斷虧蝕當中。
現在組合:
煤氣$3000
盈富基金$3000
比亞迪$3000
共$9000
雖然月供係睇長期，但見龔sir你説對於煤氣呢隻股票可以進行調整，所以想有以下方案:
煤氣$1000
盈富基金$5000
比亞迪$4000
共$10000
請問龔sir，調整後的方案會較原先的方案好嗎？對於這個組合有什麼意見呢？還是有其他股票更適合我做月供？
龔成老師：
我地最重要是睇企業的質素、前景、增長力。煤氣（0003）仍有質素，不過增長力的確有所減少，因此，你減金額是可以的。
不過比亞迪（1211）近期都上升有唔少，這刻加大金額未必最好，你可以盈富（2800）供$6000，比亞迪供$3000，如果比亞迪落翻多D，你先加金額。
------------------------------------------------
Q17459：
1:老師想問2840同1787，邊隻會好d，2隻其實係咪都有d潛在成本，如果假設唔想買實金，投資邊隻好d?thanks
2:老師，請問如果物管股，應該點將佢估值，我試過用市盈率計3319，但好似冇機會落到去個合理價位，但佢又真係咁優質，果時出左壞消息都跌得幾%，我37蚊左右有貨在手，係味都唔算買貴左?
龔成老師：
1）ＳＰＤＲ金ＥＴＦ（2840）同山東黃金（1787）都是同金有關的工具，前者會真正的追蹤金，後者就是一間企業，佢主要於中國從事黃金採礦及加工，以及銷售黃金產品。
如果你目的想追蹤黃金走勢，就投資2840。
2）因為物管股上市時間較短，較難做估值，估值時除了自己的數據，可以用行業作為比較。雅生活服務（3319）有增長力，當我地估值時，會考慮較多前景的因素。
你買入價是合理區中上部，無問題，你長線持有就得。佢現金流強，加上有增長，所以是值得比較高的估值。這股有長線投資價值的。
------------------------------------------------
Q17460：
老師你好，一直有睇開您嘅書，有留意您對1928嘅分析，亦打算將1928加入我月供嘅行列。
請問以現時情況如果打算搵一隻賭業股嚟月供，您會覺得1928同0027邊隻前景比較好？
因宜家中美關係好似唔太穩定，害怕到時金沙如果續賭牌有阻滯就好危險
龔成老師：
金沙（1928）同銀娛（0027）都是有質素的股票，金沙收息方面、穩定性方面較好，銀娛增長力方面就較強。
如果因為中美關係而刻意令佢續唔到個賭牌，相信中美已去到好壞的局面，同時當金沙無牌，對澳門經濟、民生、發展都有影響，金沙係澳門請左全職加兼職員工超過2萬人，當中的褔利及條款等如改變，對佢地的影響都好大。
所以，我這刻又唔太擔心，自己仍長線持有中。
----------------------------------------------
若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。
另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。
由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
中國海關現金限制 在 出入境大陸地區可以帶多少現金呢| Facebook 的推薦與評價
中國 大陸出入境可以攜帶的現金規定如下： ... 外幣：攜帶外幣入境不予限制，但超過等值美金10,000 元現金者，應報明海關登記，未經申報依法沒入。 ... <看更多>