//支持本Page請Click入內文比Clap，已成為Medium收費會員請直接Click入內文閱讀，謝謝！//
11月10日，短短一星期之間經已發生咗兩件令人震驚嘅事：11月8日，周梓樂同學終於失救身亡；11月9日，盛傳有18歲少女於荃灣警署被輪姦，抗爭者怒火經已被迫至極限──因此雖然11月11日被定為總動員三罷，好多人覺得需要留力，但由星期五晚開始其實已不斷響各區出現斷斷續續嘅衝突，去到星期日再黎一次大爆發。
今日嘅衝突個主軸同上星期好似，一樣係以各區商場為點火起點，再以旺角彌敦道作結，但警方嘅策略同濫權程度又再提升一個層次。首先今次響商場驅散行動中，警方係埋伏咗大量卧底於群眾之中，再加上肆無忌憚咁走入場亂打亂拉人，商場個弱點就立刻突顯出黎：基於商場本身就係一個狹窄、出入口極少同埋完全開放嘅空間，一旦比防暴制壓住電梯上落位，就立刻變成困獸鬥。
警察將臥底安插響群眾之中其實係極之危險，因為當你嘅增援未到之前，狹窄嘅空間立刻成為臥底被圍攻嘅目標，所以點解今日嘅又一城、之前嘅新城市咁多救義士事件嘅原因就係咁。但亦好不幸，由於商場本身就係無位走，結果呢頭比你救走咗個義士，另一頭又比人捉番。
無論如何，癱瘓商場係最有效將不滿推向政府嘅做法：當只有抗爭者在場時，除咗藍店其他舖頭係全部都可以照常營業，永遠都係防暴一掃場就要全城拉閘。問題只在於，究竟要作出點樣嘅策略調整，先可以減少傷亡。
除咗商場以外，警察對於私人業權嘅侵犯亦更加明目張膽：除咗響尚德廣明苑射橡膠子彈兼拉人、闖入乙明邨私人範圍拉人、響無任何指定拘捕目標嘅情況下強行闖入麥當勞，將所有食客面容紀錄並進行問話或搜身之餘仲要將位經理拘捕；亂響上水籃球場全面截查打藍球市民甚至拘捕一人、響荃新天地室內發射催淚彈、旺角、銅鑼灣繼續濫打濫捕……
但點都唔夠響嘉湖山莊景湖居離譜，防暴竟然可以直接爆開度閘直接闖入拉居民──爆閘拘捕居民？究竟係賊定警察，我經已分唔清。而家警察擺明就唔係要拉人咁簡單，仲係要話比所有香港人聽，警權就係無孔不入、就係為所欲為。
所以點解響中大畢業禮前一晚，警察會特登闖入中大校園範圍截查學生？甚至乎響今晚防暴係直頭闖入港大宿舍範圍，當住所有學生面前進行拘捕──咩刑事毀壞當然係藉口、更加唔係巧合，而係等你以為大學係一個神聖不可侵犯嘅自由領域？我就偏要侵犯比你睇。仲有人因為劉業成提早退休、盧偉聰北上面聖，妄想警隊將會被整肅？呢啲時事評論員究竟訓醒未？
然後響今日又一城嘅殘酷鎮壓之下，又再出現一次打死人疑雲：響多名抗爭者被打穿頭血流披面之後，警方突然全面封鎖又一城三樓，並有奇怪地戴上膠手套及有疑似法醫前往現場；之後仲比記者響唔同地方發現多處血跡。雖然又一城保安響警方解除封鎖後，已全力配合記者前往商場搜證，但時間隔咗咁耐，足以令差佬毀屍滅跡。結果又係要向又一城全面索取當日閉路電視片段，先有可能確認有無人死到──香港人係唔應該每一次鎮壓、就要花無窮盡嘅時間去引證究竟有無人冤死到。
所以去到今時今日，如果仲有人講和理非可以令政府屈服：重點係和理非要成功，首先要個政府肯同你講道理；但而家同政府講和理非，其實就同當你比食人族煮緊黎食嘅時候，向佢解釋食人有幾唔文明一樣咁戇尻，呢啲人係可以專心搞移民生意，因為你根本同香港完全脫節。
寫到呢度，其實原本仲想寫今日響旺角彌敦道比防暴多方包夾嘅所見所聞，但由於本身其實係病，仲要病住出街買藥順便「觀察」抗爭，去到呢刻已支持唔住，唯有留番下次有機會再講……Sorry。
