《規範香港》陳心遙
《信報》2018年12月5日《視線所及》專欄
網上瘋傳，有家長投訴小學中文老師過分執着中文字嘅字形，例如個田字，入面嗰一橫兩邊唔畀掂到出面，四隻角又要黐到實一實，搞到寫一隻字都好似做手工咁樣，要學生改完又改。家長金句：「孩子最重要的時間，都已花在不重要的事情上；家長最後的青春，也陪伴孩子花在標楷體上」，聞者心酸，但又哭笑不得。
因為已經唔係個別事件，事緣係教育局嗰份《香港小學學習字詞表》，美其名係減少異體字，等中文老師教寫中文嘅時候有標準依據。實情係小朋友學識呢啲字之後，無論係睇書、上網、出街睇招牌餐牌等等，都唔會見番一模一樣嘅字，更何況呢個世界愈嚟愈少機會寫字，咁小朋友用九牛二虎之力學呢啲所謂「規範中文字」係為乜？
恕我多心，「規範中文字」重點不在「中文」，而在「規範」。唔理在上者有心定無意，「規範」加埋至尊無上嘅「考試升學」制度，今日已經完美地令先生、家長同學生花光心機、不問情由去迎合教育局所有主張同埋標準。我要「規範」要你咁樣學，你就要咁樣學，如果唔係就唔及格影響你升學；我有「指引」要你咁樣教你就要咁樣教，如果唔係就唔及格影響你份工。呢個制度唔係教育，而係正在訓練聽命嘅機械人。
先兩日某單新聞，先唔好亂判誰對誰錯，但案發後老師被要求佢到場協助時候，老師竟以「學校冇指引」做理由拒絕。不知不覺，「規範」同「指引」已經巨細無遺咁「規範」同「指引」香港打工仔日常生活，唔使用腦，跟「規矩」做好，唔記得仲有樣嘢叫「Common Sense」。
日常生活聽到重複嘅規範加指引，直到習以為常，或者變成不隨意肌自然反射為止。每日搭港鐵，最令人困擾嘅就係non-stop嘅三語廣播，不斷重複「捉實扶手」、「請勿助長行乞」諸如此類嘅訊息，明明毋須無限loop；絕對有催眠大腦潛意識，不斷同自己講「唔准」、「要遵守」嘅功效。訊息係乜唔重要，「唔准」同「要遵守」先係重點。
我讀書嘅時候從來無聽過「規範」呢兩個字，學寫嘅就係各朝各派嘅書法，識認部首，字形筆畫無誤就得，從來毋須仔細研究一筆一畫點先為之標準。我相信大部分香港人都係咁樣學中文嘅，幾時開始要咁嘅呢？奇怪嘅係，如果咁在意唔想中文混亂，點解又要提倡同時學簡體字呢？如果咁在意為中文立下標準，點解又從來唔出指引「規範」粵語字呢？
#規範香港 #規範字 #信報 #陳心遙
