A股持續向好 內險相對內銀更令人放心
2020年12月02日 09:00
12月2日，天晴乾燥，接近周末氣溫將顯著下降，早晚相當清涼。雖然外面天色明朗，但古天后呢兩日心情沉重，對於噚日本港新聞界發生嘅事，感到相當沮喪，不解釋，你懂的……。目前只有靠自己努力，喺仍有利用價值嘅港股搵多啲錢，老土啲講句，錢唔係萬能，但無錢真係萬萬不能，有錢先有選擇權，去或留可以有話語權，各位缸邊友共勉之。
講返個市，美股受疫苗快將面世並分發予美國國民嘅利好消息刺激，美股隔晚再炒上，12月首個交易日開局表現理想，標指跟納指再創收市新高。大型科技股普遍做好，Black Friday網購刷新紀錄，亞馬遜指今年假期旺季銷售係歷來最好，刺激股價隔晚升1.6%；其他重磅科技股普遍做好，蘋果公司、facebook收市更漲逾3%。
預期明年上半年肺炎疫苗有望廣泛推出市場，投資者憧憬社會跟經濟活動可回復正常，咁嘅情況下，再加上目前市場資金泛濫，全球股市應有動力進一步向上。不過經合組織(OECD)周二下調2021年全球經濟增長預期，將2021年全球增長預測從9月份嘅增長5%下調至4.2%。該組織表示，疫情下，封鎖好可能將持續一段時間，造成永久性傷害嘅風險在上升。
疫情下持續封鎖，限聚及保持社交距離，對實體經濟帶嚟負面影響係避無可避，而疫情亦改變傳統辧工及消費模式，傳統行業點樣改變去面度疫情帶嚟翻天覆地嘅改變，先係未來繼續生存嘅關鍵。就以零售業嚟講，大型連鎖零售商致力加強線上銷售，關閉全球各地多間實體店，呢個舉動當然會影響租金價格，從而影響收租股收入。即使疫苗面世，好多喺疫情期間已改變嘅習慣已無得返轉頭，零售業由線下轉戰線上，WFH措施更演變為WFHF，更多職位改作在家工作，同樣令企業減少辦工樓面面積，乜嘢級數嘅寫字樓租金都有下調壓力。凡此種種，正正就係OECD所講嘅永久性傷害風險。
雖然近日科技股氣氛轉弱，「螞蟻撻Q」確大大打擊科技股炒作氣氛，而阿爺一出反壟斷呢一招，增添政策不明朗因素，短期借勢調整好正常。不過阿爺從未有就維穩而鬆懈，既然之前支撐大市向上嘅科技股要抖抖，自己向傳統股埋手，而北水一向重倉嘅內銀股，呢期順利成章孭起維穩重任。
不過內銀股由低位已反彈唔少，依家先嚟上車已遲咗一步，況且內地近日頻爆企業信用債災，逼使人行意外地增加市場流動性，內地金融業隨時再起波瀾。阿爺再努力維穩，內地金融業嘅風險仍不容忽視，古天后點都唔贊成追入內銀股。反而內地股市持續向好，持重貨嘅內險股或者係一個較內銀股更令人放心嘅選擇。
古天后
#300likes30shares
#古天后 #古天后日誌 #頭條財經網
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
依家我嘅聊天室已經停止免費試用, 直接課金入來聊天室啦：https://bit.ly/2BmeAhZ
立即下載秒投：https://link.stockviva.com/L9J41qUp01
對聊天室有任何疑問，可以直接聯絡秒投小編：電郵 cs@stockviva.com
注意：本人僅在 "秒投App" 及其網站內開設聊天室，本人並沒有與其他網站，或以外的平台，開設過任何通訊群組，亦沒有任何所謂的「私人whatsapp 群組」「Telegram 群組」等等，為保障大家利益，切勿加入任何類似群組。
