［真正炒到上太空］維珍銀河，下隻BEYOND MEAT？其實係下隻LV
（鍾意嘅睇CNBC報 https://cnb.cx/2BQwNRG Virgin Galactic shares rise as the space tourism company begins trading under the ticker SPCE）
1. 是日新股，維珍銀河Virgin Galactic。又要講句我識條鐵，但公司本身好出名。之前睇 星際任務（Ad Astra），畢彼特都係坐維珍（不過如果我冇睇錯，好似係Virgin Atlantic而唔係Virgin Galactic）
2. 上太空嘅新股，唔好期望我會識評論。不過我最奇怪嘅係，唔集資直接上市，冇問題。但明明今日先上市，做乜會有以前嘅股價？
3. 睇咗陣資料，大約明明地，其實都唔係好明。嫌悶嘅可以成段skip．類似借殼（其實唔係）。之前間公司係IPOA，係間SPV（Special Purpose Vehicle，你當搞間公司嚟只係為做一樣嘢），就係用嚟拎住維珍銀河49%股權。呢間SPV，係創投基金Social Capital嘅東西。背後乜水？Chamath Palihapitiya，Facebook好早期嘅高層。有機會再講呢位仁兄。總之上星期檔嘢就同維珍銀河合併咗，星期一改埋名，代號係SPCE
4. SPV49%，背後仲有好多人，中東佬，富豪。仲有51%邊位？當然係Richard Branson。
5. 唔好講啲悶嘢，講錢實際啲。點解話係第二隻BEYOND MEAT？一個原因啫，因為，只此一隻。做類似生意嘅唔止一間，但獨立上市嘅，暫時得佢一間
6. 做過低級分析員（如我）就知，由朝到晚做幾十個comps table，同業比較，列晒啲同業出嚟，咩PE咩增長。揀平嗰隻咪話夠平，揀貴嗰隻咪話貴得有道理，之類。
7. 最好炒係咩股票？就係冇同業可以比較嘅股票。試想下有隻新嘅大陸銀行嚟上市，咁市面上大大少少冇廿隻都十幾隻，你一定係在果個range咁滯。內房亦都係咁情況，冇一百都五六十間起碼，你吹得勁可以勁過晒同業（畢竟點都有一間係最貴，你咪話自己會係）。但總不可能貴到離晒罩
8. 但冇同業比就唔同你，任你吹。最好就盈利都未有，賣想像，仲好玩，好似BEYOND MEAT咁。固然Wework炒咗車，UBER早上市但股價都唔多掂。但，Richard Branson喎，死後必定上國際版頭條，會上Economist 訃文版，Financial Times會全版講幾日嘅傳奇人物，唔係啲濕鳩劏房或泥鯭的KOL可以相比
9. 維珍銀河仲勁，懶睇，但好似連收入都係未有的！都未飛，收乜鬼入。但唔緊要，公司唔係上面啲濕鳩劏房或泥鯭的，預期下年（2020）已經賺錢，喂，而家2019年11月啦喎！即係好快有錢賺。吾友尹思哲話頭，冇無利潤嘅公司 十足無性愛嘅婚姻（http://bit.ly/2lDYZCI）。呢間好快有性愛啦（叉開講，其實我一路想寫篇姐妹作，就係派息等於婚前性行為，派咗唔等於唔呃你，但好過冇，至少都搭好大個棚呃你，況且你都爽咗）
10. 何解？因為公司雖則仲未載客上去，但條龍已經由屯門排到也門，人人科水排隊等上太空。咩人去？就梗係富豪，名人。上太空打卡，上太空唱Space Oddity。里安勒度迪卡比奧，Justin Bieber，無數大陸佬。
11. 係啦，呢間其實係，終極奢侈品公司！終極高端旅遊股
12. 你諗下，阿豬阿狗都買得起LV（但我買唔起），甚至愛馬仕，阿水都去食米芝蓮三星（我冇），個撚個都坐頭等住六星級酒店。咁有咩係真係富豪先做到，同你班蟻民劃開界線刷存在感（有錢唔刷存在感生存仲為乜？搵多啲錢？）。就係 上 太 空。「我幾乎肯定會有人在太空拍四仔」
13. 最重要係，根本嚴重供不應求，人嘅青春就有限，佢一次就只係載幾條友，世界大把有錢人。邊個唔想死前去一次？（都話要同你劃清界線）。至於加價能力？基本上係無限，你睇下啲客係咩人？係，係有對手的，但都係嗰句，加埋啲對手都仲係供不應求。
14. 反而憑我粗淺嘅理解，最大鑊其實係乜？航空公司梗係怕空難。你上太空炒咗架機點算？炒架機事少，炒咁幾件超級富豪出外太空，唔知之後仲有冇咁多勇士喎。雖然有錢人諗嘅嘢我未必想像到，可能根本就係獨孤求敗求一死，只要夠型有乜所謂。
