【不誠實使用公關】 歡迎受害人提供故仔
雖然我覺得media pitching的確係水尾嘅水尾,好多media都係要廣告行先訪問再傾,但幸好仍有些有心有力嘅記者,會用心做份稿。
而一份見得下人嘅稿,你估真係公關寫咩佢做咩?係嘅話,果份叫advertorial。而editorial,真係嘔心瀝血同記者傾返嚟;當然記者buy我哋嘅proposal angle係好開心,但更多時候,係要同記者jam個新angle,然後再問客攞料,先至攪得成。
而最最最最最最最X10000 怕,就係阿客講大話。所謂講大話,咪即係吹水唔抺咀,但講出嚟無人信果下威囉!
以下為真實個案:
個案一:掩耳盜鈴,當世界唔知
「我哋呢隻進口食品係獨家,全港第一間公司引入。」
然後,君不見某鬼佬超市早已有售,而且仲賣咗好幾年。
如實陳述俾阿客知,話呢個angle唔可以sell,佢竟然厚顏無恥哋答:「你照寫啦,啲記者鬼知咩!」
我一個食物鏈最底層嘅公關仔都知,又會記者唔知啦!你識唔識商品說明條例架!
個案二:自大無料型
「我上網睇過晒,無人有咁嘅設計我先做架!你咪同記者我講所有設計都獨一無二囉!」
你要我同記者講呢句簡直侮辱我嘅common sense呀!
個案三:名牌過橋型
「某某名牌個款都係抄我之嘛。」
你呢句係咪淘寶tag嚟架?
個案四:懶有人脈型
「呢個明星我同佢好熟,你打去話咩咩咩搵佢拍硬檔錄少少野,佢實肯架!」
當然,呢啲無得查證唯有焗打。打到去人哋經理人度講,人哋係識你老鼠啦。
「上次咩咩咩酒會我同佢見過,佢有我咭片架喎!無理由唔肯架!」
如果你嘅邏輯係咁,我閒閒哋一個event可以請幾十個明星名人返嚟。
#真係越講越激心 #以上個案當然完全唔掂 #當然個客有剷我哋但的確係問心無愧做到都覺得有鬼 #而偏偏呢啲客遍佈各行各業港九新界
Search